...تۇكتى كىلەم, كوك كىلەم

وتكەن كۇز بەن قىس مەزگىلدەرىندە جاڭبىردىڭ جاۋماعانى, قاردىڭ دا از تۇسكەنى, ءارى توپىراق قاباتتارىنا ىلعال ۇستاۋعا سەپتىگى تيەتىن توڭ جينالماعانى اتالعان وڭىرلەرگە قۇرعاقشىلىق قاۋپىن تۋعىزدى. ايتسە دە ءساۋىر مەن ماماىر ايلارىندا حالىق اراسىندا نۇر دەپ اتالىپ كەتكەن جاڭبىردىڭ نوسەرلەتىپ ءجيى جاۋعانى بۇل قاۋىپتىڭ بۇلتىن سەيىلتىپ جىبەردى.

سول نۇر-جاڭبىردان كەيىنگى كوكتەم قىزۋى مەن شۋاعى دالانىڭ بويىن شيراتىپ توپىراعىنا ءنار ءسىڭىرىپ, وسىمدىكتەر مەن جانۋارلار دۇنيەسىنىڭ شىرايىن كەلتىرگەنى قانداي عانيبەت. اقتوبە قالاسى ماڭىنداعى مارجانبۇلاق اۋىلىن باسىپ ءوتىپ, قوبدا اۋدانىنا قاراي بەت تۇزەگەن كەزىمىزدە جولدىڭ ەكى جاق قاپتالىنان باستالىپ, كوز جەتەر جەرگە دەيىنگى كەڭ جازىقتىقتا وتكەن جىلدارداي ەمەس, دالا ءشوبى مەن گۇلدەرى تۇتاس ءارى بىتىك وسكەنىنە كۋا بولدىق.

وسىنداي تاڭعاجايىپ كورىنىستەر شىڭعىرلاۋدىڭ شۇرايلى شوقىلارى مەن قاراتوبەنىڭ قۇبا بەل قىرلارىنا جالعاسىپ كەتە بەرەدى. تەك جىمپيتىعا جاقىنداعان كەزدە عانا ماساتى كىلەمدەي قۇلپىرعان دالا رەڭى ءسال سولعىن تارتىپ, وسى تاس جولدىڭ سول جاق بەتىندەگى جۇماعازى قازىرەت مازارىنا جاقىنداعان كەزدە قايتادان قۇلپىرىپ, قويۋلانىپ سالا بەرەدى.

وسىندايدا قازاق پوەزياسىنىڭ كورنەكتى وكىلى قادىر-مىرزا ءالى: جاسىل جايلاۋ, تۇكتى كىلەم, كوك كىلەم... دەپ قالاي ءدال تاۋىپ, بەينەلەپ ايتقانىنا تاڭ قالماسقا شاراڭ جوق. مامىردىڭ مايدا جاڭبىرى دالا وسىمدىكتەرىمەن كوكوراي شالعىن بايشەشەكتىڭ سانالۋان تۇرلەرى ءبىر مەزگىلدە قاۋلاپ وسۋىنە سەپتىگىن تيگىزگەنى ايقىن بايقالادى. مۇنداي كەزدە تابيعاتتىڭ شەكسىز قۇدىرەتى مەن تىلسىم سىرىنا باس يمەۋ, ءتىپتى دە مۇمكىن ەمەس ەكەنىن تەرەڭىرەك تۇيسىنگەندەي كۇي كەشەسىڭ. مىنە, مامىر ايىنىڭ دالامىزعا تارتقان باعا جەتپەس سىيى وسىنداي.

جاسارىپ, جايناپ تۇرلەنە بەر دارحان دالا! ەلدىك پەن ەرلىكتىڭ تۋ تىككەن قاسيەتتى تۇعىرى, حالقىمىزدىڭ اناسى مەن پاناسىنا اينالعان ۇلىلىق ولشەمى. دالا –سەنىڭ ۇلىڭمىن دەپ جىرلاعان ەكەن ومىردەن ەرتەرەك كەتىپ قالعان حالقىمىزدىڭ دارىندى اقىندارىنىڭ ءبىرى – جاراسحان ابدىراشەۆ. وسى اقيقاتقا وقىرماندارىمىز دا قول قويا الاتىنىنا سەنىمىمىز مول.

اقتوبە – ورال