شاھار باسشىسى باقىتجان ساعىنتاەۆ ءوزىنىڭ Instagram الەۋمەتتىك جەلىسىندەگى پاراقشاسىندا 1 ماۋسىمعا قاراعان ءتۇنى قالا پەريمەترى بويىنشا ورنالاسقان كەدەرگىلەردىڭ الىناتىنىن حابارلادى. سونداي-اق ول بلوك-بەكەتتەردە جۇمىس ىستەگەن بارلىق قىزمەتكەرلەرگە العىسىن ءبىلدىردى.
«1 ماۋسىمعا قاراعان ءتۇنى قالانىڭ پەريمەترى بويىنشا ورنالاسقان بلوك-بەكەتتەردى الامىز. تج رەجيمى كەزىندە بۇل بەكەتتەر قالادان شىعۋ جانە قالاعا كىرۋدى شەكتەدى. بۇل – كوروناۆيرۋستىڭ تارالۋىن توقتاتۋ ءۇشىن قاجەت بولدى. بارلىق پوليتسيا, سانيتارلىق قىزمەت, فيتو- جانە ۆەتباقىلاۋ قىزمەتكەرلەرىنە, اۋداندىق اكىمدىكتەر مەن ۇلتتىق گۆارديا, قورعانىس مينيسترلىگىنىڭ اسكەري قىزمەتشىلەرىنە العىسىمدى بىلدىرەمىن», – دەگەن ب. ساعىنتاەۆ وسى 2,5 ايدىڭ ىشىندە ولار وزدەرىنە جۇكتەلگەن مىندەتتى ابىرويمەن ورىنداپ, تاۋلىك بويى قىزمەت كورسەتكەنىن مالىمدەدى.
قالا اكىمى شەكتەۋلەردى الۋعا ەلدە, سونىڭ ىشىندە الماتى بويىنشا جاعدايدى تۇراقتاندىرۋدىڭ ارقاسىندا مۇمكىن بولعانىن ەرەكشە اتاپ ءوتتى.
ب. ساعىنتاەۆ بارلىق كاسىپورىندار مەن ۇيىمدار سانيتارلىق قاۋىپسىزدىكتىڭ كۇشەيتىلگەن شارالارى نەگىزىندە جۇمىس ىستەيتىنىن ەسكە سالدى. ۇيلەردى, اۋلا الاڭدارى مەن كوشەلەردى دەزينفەكتسيالاۋ جۇرگىزىلە بەرەدى.
«بەلگىلەنگەن تارتىپكە باعىنىپ, سانگيگيەنا مەن الەۋمەتتىك قاشىقتىقتى ساقتاپ, قورعانىس بەتپەردەلەرىن كيىپ جۇرۋگە شاقىرامىن. بۇل قازىرگى ءومىردىڭ قالىپتى نورماسىنا اينالۋى ءتيىس. ءوزىڭىزدى جانە جاقىندارىڭىزدى قورعاڭىز!», – دەپ قورىتىندىلادى ءسوزىن شاھار باسشىسى.