ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ توراعاسى داستان رىسپەكوۆ تۋريزم سالاسىن مەملەكەتتىك قولداۋ جانە قازاقستاندا ىشكى ءتۋريزمدى دامىتۋ شارالارى تۋرالى ايتتى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
جيىندا كوميتەت باسشىسى وتكەن جىلى 31 مامىردا قابىلدانعان «2019-2025 جىلدارى ءتۋريزمدى دامىتۋعا ارنالعان» مەملەكەتتىك باعدارلامانىڭ ناتيجەلەرىمەن ءبولىستى.
«ەلىمىزدە 2019-2025 جىلدارعا ارنالعان مەملەكەتتىك باعدارلامانىڭ جۇزەگە اسىرىلۋى وتكەن جىلى جوعارى دەڭگەيدە ءوتتى. اتالعان باعدارلامانىڭ نەگىزگى باعىتتارىنىڭ ءبىرى – تۋريستىك ايماقتاردى ينجەنەرلىك, كوممۋنيكاتسيالىق جانە ترانسپورتتىق ينفراقۇرىلىممەن قامتاماسىز ەتۋ. وسى رەتتە وبلىس اكىمدىكتەرىمەن بىرلەسىپ, رەسپۋبليكالىق بيۋدجەتتەن 44 جوباعا 51,5 ملرد تەڭگە ءبولىندى. بۇعان دەيىن بۋرابايدان باسقا ەشبىر تۋريستىك ايماققا وسىنشاما قارجى بولىنبەگەن. ينفراقۇرىلىم جۇيەسىن جولعا قويۋ ارقىلى ەلىمىزگە الىس-جاقىن شەت مەملەكەتتەردەن ينۆەستورلاردى تارتۋعا مۇمكىندىك بەرەدى. وسى ورايدا ماڭعىستاۋ وبلىسىن مىسالعا الۋعا بولادى. 2019 جىلى مەملەكەت ەسەبىنەن كولىك جولى جانە سۋمەن قامتاماسىز ەتۋ رەتكە كەلتىرىلدى. اقتاۋ قالاسىنداعى كاسپي تەڭىزى ايماعىندا 17,8 ملرد تەڭگەگە گاز قۇبىرى مەن جارىق جۇرگىزىلدى. ەندى بيىل جىل ورتاسىندا ورتالىق ازيادا ەڭ ۇلكەن قوناقجاي كەشەنىن اشامىز. 500 ورىنعا ارنالعان اۋقىمدى كەشەننىڭ جالپى قۇنى – 60 ملرد تەڭگە», - دەدى داستان رىسپەكوۆ.