بۇگىندە ەل يگىلىگىنە ارنالعان باعدارلاما كوپ. تەك باردى ۇقساتىپ, ايانباي ەڭبەك ەتۋ قاجەت. «بيزنەستىڭ جول كارتاسى – 2020» مەملەكەتتىك باعدارلاماسى شەڭبەرىندە سارىسۋ اۋدانى, جاڭاتاس قالاسىنىڭ جاس كاسىپكەرلەرى ماديار كارىباەۆ پەن احان اجماعانبەتوۆ گرانتتاردى ۇتىپ الىپ, بۇگىندە مۇمكىندىگى شەكتەۋلى بالالارعا قاجەتتى قۇرال-جابدىقتار جاساۋمەن اينالىسۋدا. ەڭبەكتەرى جەمىسسىز دە ەمەس.
«بۇگىندە ەڭبەك ەتۋگە نيەتتى ادامعا جۇمىس كوپ. مۇمكىندىگى شەكتەۋلى بالالارعا ارنالعان ۆەرتيكاليزاتور مەن IT-اربا جاساۋ كوپتەن بەرى كوكەيىمىزدە جۇرگەن بولاتىن. تاۋەكەل دەپ, قولداعى بار ماتەريالدارمەن ويعا العان دۇنيەمىزدى جاساپ كوردىك. ناتيجەسى جامان بولعان جوق. كوڭىلىمىزدەن شىقتى. بىرنەشەۋىن قولجەتىمدى باعامەن ساتىلىمعا شىعاردىق», دەيدى ماديار كارىباەۆ.
جاس كاسىپكەرلەردىڭ كاسىپپەن اينالىسۋداعى نەگىزگى ماقساتى – مۇمكىندىگى شەكتەۋلى بالالارعا كومەكتەسۋ. ولار بۇل كاسىپتى ودان ءارى جالعاستىراتىنىن ايتادى. پايدا تابۋدى ەمەس, قايىرىمدىلىق جاساۋدى كوزدەگەن ازاماتتار العاشقى جاساعان بۇيىمدارىن تاراز قالاسىنداعى №1 بالالار اۋرۋحاناسىنا از قامتىلعان وتباسىلاردىڭ بالالارى ءۇشىن سىيعا تارتقان. بۇل قۇرال-جابدىقتار اياعىن دۇرىس باسا المايتىن جانە ءسىڭىرى سوزىلعان بالالار ءۇشىن وتە قولايلى ءارى پايدالى ەكەن. ەندى جاس كاسىپكەرلەر بۇل كاسىپتى ودان ءارى دامىتۋدى كوزدەپ وتىرعانىن جەتكىزدى. الداعى ۋاقىتتا مەملەكەت تاراپىنان بەرىلگەن قاراجاتقا عيمارات ساتىپ الىپ, جەرگىلىكتى ازاماتتاردى جۇمىسقا قابىلداۋدى جوسپارلاۋدا. قازىرگى تاڭدا 4 ادامدى جۇمىسپەن قامتىپ, ءتيىستى جالاقىسىن تولەپ وتىر. «كاسىپ بولعاننان كەيىن ءتۇرلى قيىندىق دا كەزدەسىپ جاتادى. العاشقى ۋاقىتتا ءبىراز قينالدىق. بىراق, تالپىنىسىمىزدى ودان ءارى كۇشەيتىپ, جۇمىسىمىزدى جولعا قويدىق. قازىر ەڭبەكتىڭ زامانى. مەملەكەت بۇل ءۇشىن بىزگە جاعداي جاساپ وتىر», دەيدى احان اجماعانبەتوۆ.
جامبىل وبلىسى