31 مامىر – ساياسي قۋعىن-سۇرگىن قۇرباندارىن ەسكە الۋ كۇنى. جازىقسىز جازاعا تارتىلعاندار تۋرالى سىرى اشىلماعان تاريحي قۇجاتتاردى جانە باسقا دا اقپاراتتاردى قولجەتىمدى ەتۋ ماقساتىندا ىشكى ىستەر مينيسترلىگىندە «مەموريال» سەرۆيسى قۇرىلعان. قىزىلوردا وبلىسى بويىنشا وسى سەرۆيسكە 6 مىڭعا جۋىق ادام جايلى دەرەك ەنگىزىلدى.
2014 جىلى قىزىلوردا وبلىسىنىڭ پوليتسيا دەپارتامەنتى قىزىلوردا وبلىسى جانە بايقوڭىر قالاسى بويىنشا ۇلتتىق قاۋىپسىزدىك كوميتەتى دەپارتامەنتىنەن سوت ورگاندارى اقتاعان ازاماتتارعا قاتىستى قىلمىستىق ىستەر, سونىمەن قاتار ۇلى وتان سوعىسى كەزىندە تۇتقىنعا تۇسكەن بۇرىنعى كسرو ازاماتتارى تۋرالى ىرىكتەلگەن ماتەريالدار قابىلدادى.
سول ۋاقىتتان بەرى پوليتسيا دەپارتامەنتىنە قۋعىن-سۇرگىنگە ۇشىراعان ادامداردىڭ تۋىستارىنان, عالىم-زەرتتەۋشىلەردەن, مۇراعاتتار مەن مەملەكەتتىك ورگانداردان كوپتەگەن وتىنىشتەر مەن سۇراۋ سالۋلار كەلىپ ءتۇسىپ, ونىڭ 400-گە جۋىعى وڭ ناتيجەسىن تاپتى.
«مەموريال» سەرۆيسىنە ەنگىزىلگەن اقپاراتتار قۋعىن-سۇرگىنگە ۇشىراعان ازاماتتاردىڭ تۋعان جىلى, تۇرعىلىقتى جەرى, تۇتقىندالعان ۋاقىتى, سوتتالعاندىعى جانە اقتالعاندىعى جونىندەگى مالىمەتتەردى قۇرايدى. بۇل اقپاراتتار تۋىستارىنىڭ تاعدىرى تۋرالى مالىمەتتەر ىزدەگەن ازاماتتارعا, سونىمەن قاتار عالىمدارعا, تاريحشىلارعا قاجەت.
وبلىس پەن قازاقستاننىڭ باسقا دا وڭىرلەرىنەن, تمد ەلدەرىنىڭ تۇرعىندارىنان كەلگەن حاتتاردا وسى سەرۆيستىڭ ماڭىزدىلىعى اتالىپ وتىلگەن.
العان اقپاراتتار نەگىزىندە قىزىلوردا وبلىسىنىڭ قارماقشى اۋدانىندا ساياسي قۋعىن-سۇرگىن قۇرباندارى احمەت تۇرعامباەۆ, تىنىشتىباي جايشىلىقوۆ, سۇيىندىك بەكمىرزاەۆ پەن جۇقا تورەباەۆ سەكىلدى جازىقسىز جالالى بولعان ازاماتتارعا ارنالعان ەسكەرتكىش ورناتىلدى, - دەيدى پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى جاراس وسپانوۆ.
قازىر ىشكى ىستەر ورگاندارىندا جەدەل-تەرگەۋ جانە ىزدەستىرۋ شارالارىن جۇرگىزۋ ءۇشىن قۇقىق قورعاۋ ورگاندارى قىزمەتكەرلەرىنە قاجەتتى كەڭ كولەمدى جەدەل-ىزدەستىرۋ جانە انىقتامالىق اقپاراتتار دەرەكتەرى جيناقتالعان. اقپاراتتاندىرۋ جانە بايلانىس باسقارماسىنىڭ ارنايى مەملەكەتتىك مۇراعاتى – ىشكى ىستەر ورگاندارى جۇيەسىندەگى ماڭىزدى قۇرىلىم سانالادى.