سوڭعى ۋاقىتتا كورۋ قابىلەتى تومەندەگەن بالالار سانى ارتقان. ارينە, ول سمارتفون, تەلەديداردى ۇزاق ۋاقىت قاراپ, نازىك ءالى تولىق دامىماعان كوز تامىلارىنا كەلگەن زياننان تۋىنداعان ماسەلە. كوكشەتاۋدا كورۋىندە كەمىستىگى بار بۇلدىرشىندەرگە ارنالعان بالا باقشا بار. وندا ورىن سانى از جانە قوندىرعىلار مۇلدەم ەسكىرگەن.
كوكشەتاۋ قالاسىنداعى «وركەن» بالاباقشاسىندا كورۋىندە كەمىستىگى بار بۇلدىرشىندەرگە ارنالعان توپ جۇمىس ىستەيدى. توقىراۋ جىلدارىنا دەيىن مۇنداي ەكى توپ بولىپ, 30 بالا تاربيەلەنگەن. سونىڭ بىرەۋى جابىلىپ, قازىر ارنايى توپ 14 ءبۇلدىرشىندى عانا قابىلدايدى. نينا كارالاش تاربيە مەكەمەسىندە 1991 جىلدان بەرى ەڭبەك ەتۋدە. مەيىربيكە مامانداندىرىلعان توپتىڭ بولعانى وڭ ناتيجەسىن بەرۋدە.
– مەنىڭ تاجىريبەمدە وسى توپتان تاربيە الىپ شىققان بالالاردىڭ ەمدەلىپ, كورۋ قابىلەتى جاقسارعان دەرەكتەر وتە كوپ. كەيبىرىنە وتا جاساپ, ودان كەيىن وسى توپتا ارنايى جاتتىعۋلار, اپپاراتتاردىڭ كومەگىمەن كەشەندى ەمدىك جۇمىستار جۇرگىزەمىز. ەمدەۋشى دارىگەر جازىپ بەرگەن نۇسقاۋلىقتاردى ورىندايمىز. ءبىزدىڭ العاشقى تۇلەكتەر قازىر جوعارى وقۋ ورنىن اياقتاعان ۇلكەن ازاماتتار,–دەيدى №37 «وركەن» بالاباقشاسىنىڭ مەيىربيكەسى نينا كارالاش.
كەشەندى جۇرگىزىلگەن جۇمىستاردىڭ ناتيجەسىندە وتكەن جىلى 4 ءبۇلدىرشىن كوررەكتسيالىق توپتان دەنساۋلىعىنىڭ جاقسارۋىنا بايلانىستى وزگە توپقا اۋىسقان.
– بۇل جەردە ماسەلە بار, ارينە. ول ورىننىڭ ازدىعى. ەمدەۋ اپپاراتتارى ەسكىرگەن. 1970-1980 جىلعى اپپاراتتارمەن جۇمىس ىستەيمىز. وتكەن جىلى ەكى جاڭا قوندىرعى الدىق. ونىڭ بىرەۋىن بىزدە تاربيە العان بالانىڭ اكەسى سىيعا تارتتى. وسى قوندىرعىلاردى جاڭارتسا دەگەن تىلەگىمىز بار,–دەيدى بالاباقشا مەدبيكەسى نينا كارالاش.
كورۋىندە كەمىستىگى بار بالالار جالپى ءبىلىم بەرەتىن مەكتەپتىڭ كوررەكتسيالىق سىنىبىندا وقيدى.
– قايىرىمدىلىق قورلار مەكتەپ ماسەلەسىن ءجيى كوتەرىپ ءجۇر. نۇر-سۇلتان قالاسىندا ارنايى مەكتەپ بار. سول جەرگە پەداگوگ, مەديتسينالىق مامانداردى ءجيى شاقىرىپ, ارنايى سەمينارلار ۇيىمداستىرۋدا. كوزى ناشار كورەتىن بالا جالپى ءبىلىم بەرەتىن مەكتەپكە قابىلدانعاندا دارىگەردىڭ قورىتىندىسىمەن, دياگنوزى ەسكەرىلەدى. جارىق دۇرىس تۇسەتىن, الدىڭعى قاتاردىڭ ءبىرىنشى پارتاسىنا وتىرعىزىلادى. كوررەكتسيالىق سىنىپ بولسا, سوندا ءبىلىم الادى,–دەيدى تاربيەشى زينفيرا گاريفۋلينا.
مامانداردىڭ ايتۋىنشا بۇگىنگى تاڭدا بالاعا ەرتە جاستان سمارتفون ۇستاتىپ, تەلەديداردىڭ الدىندا ۇزاق وتىرعىزۋ سالدارىنان كوزى ناشار كورەتىن بالالار سانى ارتقان. ولاردىڭ كوز تامىرلارى وتە نازىك, تولىق قالىپتاسىپ, دامىماعان. سوندىقتان, بىردەن كورۋ قابىلەتى تومەيدەيدى. دارىگەرلەر زياندى زاتتاردان بالانى شەكتەۋگە كەڭەس بەرەدى.