ول ءبىلىم سالاسىنا كەزدەيسوق كەلگەن جوق. ونى بۇل جولعا ءوزى ءبىلىم العان مەكتەبىندەگى ەرەكشە جۇيە جەتەلەگەندەي. كەيىپكەرىمىز وقىعان ءبىلىم ۇياسىندا جوعارى سىنىپتىڭ وقۋشىلارى تومەنگى سىنىپتىڭ بالالارىنا ساباق تۇسىندىرەتىن جۇيە بولىپتى. سول كەزدە بيولوگيا پانىنەن كوپتەگەن وليمپياداعا قاتىسىپ جۇرگەن وقۋشى مەكتەبىندەگى ەرەكشە جۇيە بويىنشا وزىنەن كىشى بالالاردى ءوزى ۇزدىك پاننەن جارىستارعا دايىنداپتى. كەيىپكەرىمىز بىلگەنىن وزگەگە ۇيرەتەتىن ۇلى قىزمەتتىڭ جانىنا جاقىن ەكەنىن وقۋشى كۇنىندە تۇسىنگەن. جاس بۋىنعا جاڭا نارسەنى ۇيرەتكەندە ولاردىڭ كوزدەرىنەن وت كورىپ, بويلارىنان بىلىمگە, ومىرگە دەگەن قۇلشىنىستى سەزىنگەنى پەداگوگيكا سالاسىنا تۇبەگەيلى باعىتتاپ جىبەرگەن كورىنەدى.
مىنەكەي, بۇگىندە ول – ەلىمىزدەگى ەڭ جاس مەكتەپ ديرەكتورى. ەسىم-سويى – شاكارىم سەيسەمباي. كەيىپكەرىمىز «100 جاڭا ەسىم» جوباسىنىڭ جەڭىمپازى اتاندى.
نەگىزى شاكارىمنىڭ اناسى دا مەكتەپ باسقارعان, ياعني ءبىلىم بەرۋدەگى مەنەدجەرلىك, بالكىم كوشباسشىلىق كەيىپكەرىمىزگە قانمەن جانە تاربيەمەن سىڭگەن سەكىلدى. سەبەبى ول كىشكەنتاي كۇنىنەن اناسىنىڭ جۇمىسىندا ءجيى بولدى, مەكتەپتەگى باسقارۋ جۇيەسىنە قارشادايىنان قانىقتى. ديرەكتور-اناسىنىڭ قىزمەتكەرلەرىمەن, مۇعالىم, اتا-انا, وقۋشىلارمەن قالاي قارىم-قاتىناس ورناتقانىن كوزىمەن كوردى. مىنە, شاكارىمدى ءوز ءومىرى ۇستازدارعا ۇستاز بولۋعا بالاڭ كەزىنەن باۋلىعانداي.
كەيىپكەرىمىز مەكتەپتى بىتىرگەن سوڭ ءال-فارابي اتىنداعى قازاق ۇلتتىق ۋنيۆەرسيتەتىنىڭ مولەكۋليارلىق بيولوگيا جانە گەنەتيكا فاكۋلتەتىنە وقۋعا ءتۇستى. جوعارى وقۋ ورنىن عىلىمي بيولوگيا باعىتىندا بىتىرگەنىمەن, ءبىلىم بەرۋ سالاسىنان قول ۇزگەن جوق. ول ۋنيۆەرسيتەتتە وقي ءجۇرىپ قوسىمشا مەكتەپتە وقۋشىلارعا ساباق بەردى. ال جوعارى وقۋ ورنىنداعى وقۋىن اياقتاپ, عىلىمي بيولوگيا باعىتى بويىنشا باكالاۆر دارەجەسىن العاندا الدىندا ەكى تاڭداۋ تۇردى: نە عىلىم, نە مۇعالىمدىك قىزمەتتى جالعاستىرۋ. ول ەكىنشىسىن تاڭدادى. سەبەبى وعان مۇعالىمدەر مەن وقۋشىلاردىڭ اۋديتورياسى ۇنايدى, ولارمەن جۇمىس ىستەگەننەن شابىت الادى.
ءوزىن دامىتۋدى قالايتىن ادام ارقاشان ىزدەنىستە جۇرەتىنى انىق. شاكارىم دە جاڭا تاڭداۋ جولىندا ءوزىن جەتىلدىرۋ ءۇشىن نازارباەۆ ۋنيۆەرسيتەتىنىڭ ءبىلىم بەرۋ باعىتى بويىنشا بويىنشا ماگيستراتۋراسىنا ءتۇستى. ونداعى وقۋىن تامامداعاننان كەيىن نازارباەۆ زياتكەرلىك مەكتەبى, رەسپۋبليكالىق فيزيكا-ماتەماتيكا مەكتەبى, ء«بىلىم-يننوۆاتسيا» ليتسەيى سىندى بىرقاتار بەلدى دە بەدەلدى مەكتەپتە ەڭبەك ەتتى. بۇل كەيىپكەرىمىزدىڭ جاڭا باعىتتا ءوزىن دامىتۋعا, جاڭارتىلعان ءبىلىم مازمۇنىن تەرەڭىرەك مەڭگەرۋىنە, يننوۆاتسيالىق ويلارىن ىسكە اسىرۋىنا ۇلكەن تاجىريبە بولدى. ول نەگىزىنەن جوعارىدا اتالعان الدىڭعى قاتارلى ورتا ءبىلىم بەرۋ ۇيىمدارىندا جۇمىس ىستەۋدى ماگيستراتۋرانى بىتىرگەن مەزەتتەگى ماقساتىنا جەتۋ جولىنداعى باستى قادامدارىنىڭ بىرىنە بالادى. شاكارىم مۇمكىندىگى مول, وقىتۋشى-پروفەسسورلىق قۇرامى شەتەلدىك مىقتى ماماندارمەن تولىققان نازارباەۆ ۋنيۆەرسيتەتىندەگى وقۋىنان كەيىن سوندا جيعان ءبىلىم-بىلىگىن جانە تاجىريبەسىن جالپى ءبىلىم بەرەتىن مەكتەپتەردى دامىتۋعا, ونداعى جۇيەنى وزگەرتۋگە جۇمساۋدى كوزدەگەن ەدى. سول نيەتىمەن جاعدايى جاقسى وقۋ ورداسىنان قاراپايىم قاتارداعى مەكتەپكە اۋىستى. بۇگىندە سول ماقساتىنا قول جەتكىزىپ كەلەدى. ويتكەنى ول باسقارعان مەكتەپ از ۋاقىتتا كوپ وزگەرگەن.
شاكارىم جالپى ءبىلىم بەرەتىن مەكتەپكە كەلگەندە العاشقى جۇمىستى وقۋشىلار, مۇعالىمدەرمەن ديرەكتور اراسىنداعى قاتىپ قالعان قارىم-قاتىناستى وزگەرتۋدەن باستاپتى. ديرەكتوردىڭ ادەتتەگى وقۋشىلارمەن سىنىپ ساعاتىندا, مۇعالىمدەرمەن پەداگوگيكالىق كەڭەستەردە تىلدەسەتىن قاعيداسىن جويىپ, بالالارمەن دالادا ويناپ جۇرگەن ۋاقىتتا, ۇستازدارمەن قوڭىراۋ كەزىندە ەركىن ديالوگ قۇرۋدى قولعا العان. جينالىس فورماتىندا ەمەس, قاراپايىم اڭگىمەلەسۋدى كەزدەيسوق ۇيىمداستىراتىن ادەت تاپتى. بۇل ولاردى مارتەبەسىنە قاراماي وي ءبولىسىپ, پىكىر الماسۋعا جەتكىزدى. بۇدان كەيىن مەكتەپتەگى وتىزعا جۋىق اجەتحانانى ساۋدا ۇيلەرىندەگىدەي ستاندارتقا ساي جوندەتكەن. نەگە؟ سەبەبى ونىڭ ويىنشا, مەكتەپتە تاربيە بەرۋدى قولعا الامىز, ال تاربيە تازالىقتان باستاۋ الادى. جانە جوندەۋ جۇمىستارىن مەكتەپتىڭ ءوز قاراجاتىنا جاساپ شىعىپتى.
جاس ديرەكتور وسىدان سوڭ مۇعالىمدەردىڭ مەنەدجەرگە دەگەن كوزقاراسىن وزگەرتۋگە بەت بۇردى. وسى ويىن ناقتى ىسپەن كورسەتىپ, ديرەكتوردىڭ بۇرىنعى كابينەتىن مۇعالىمدەرگە بەرۋدى ۇيعاردى. ويتكەنى مۇعالىمدەردىڭ جۇمىس ىستەيتىن, وتىرىپ سويلەسەتىن بولمەسى بولماپتى. ال ديرەكتوردىڭ الگى كابينەتى كەڭ ەكەن. مۇنىمەن قويماي ۇستازدارعا ارناپ جوسپار جازاتىن, قۇجاتتاردى شىعارىپ, شاي ىشەتىن شاعىن سoffee Boom سەكىلدى بولمەنى دە جاساقتادى. وسىنداي جۇمىستاردى, قىزمەتىنە جاسالعان جاعدايدى كوزىمەن كورگەن مۇعالىمدەردىڭ ەڭبەك ەتۋگە دەگەن ىنتاسى بۇرىنعىدان بەتەر ارتا تۇسكەن.
بۇل ءوز كەزەگىندە مەكتەپتىڭ ءبىلىم ساپاسىنا ايرىقشا اسەر ەتەتىنى ءسوزسىز. ونىڭ ناتيجەسى مەكتەپ وقۋشىلارىنىڭ كەيىنگى جىلدارداعى جەتىستىكتەرىنەن انىق كورىنە باستادى. ايتالىق, بىلتىرعى وقۋ جىلىندا 4 بىردەي مەكتەپ تۇلەگى نازارباەۆ ۋنيۆەرسيتەتىنە وقۋعا تۇسكەن. بۇل كەيىپكەرىمىز باسقاراتىن №54 مەكتەپ-ليتسەيىنىڭ تاريحىندا العاش رەت بولىپ وتىر. ال ءبىر وقۋشىسى الەمدەگى ۇزدىك جۇزدىككە كىرەتىن گونكونگتاعى پوليتەحنيكالىق ۋنيۆەرسيتەتتىڭ ستۋدەنتى اتانعان. وعان جاس ديرەكتوردىڭ جاڭا زامانعا ساي stan زەرتحانالار مەن coworking مۇعالىمدەر بولمەسى, ينتەللەكتۋم كابينەتتەرى, رەكرەاتسيا زونالارىن جاساقتاعانى, سونداي-اق مەكتەپ ىشىنەن ترەنينگتەر, ءتۇرلى سەمينارلار مەن ءىس-شارالاردى وتكىزە بەرەتىن HUB كابينەتتەرىن قۇرعانى سەبەپ بولدى. وسىنشاما ەڭبەك پەن وزگەرىستىڭ ارقاسىندا جالپى ءبىلىم بەرەتىن قاتارداعى قاراپايىم مەكتەپ ەكى جىلدىڭ ىشىندە ءبىلىم دەڭگەيى بويىنشا تۇراقتى ناتيجەگە قول جەتكىزدى.
ال جاڭا فورماتتاعى ءبىلىم بەرۋگە كوشكەندە كەيىپكەرىمىز قاشىقتان وقىتۋدى ونلاين ساباقپەن شاتاستىرماۋ كەرەكتىگىن ايتادى. سەبەبى قاشىقتان وقىتۋدىڭ اياسى الدەقايدا كەڭ. بۇل فورماتپەن ءبىلىم بەرگەندە ءتۇرلى ءادىس-تاسىلدەردى, ءتيىمدى تەتىكتەردى پايدالانۋعا, جاعداي مەن مۇمكىندىكتەرگە قاراي تۇرلەندىرىپ وتىرۋعا بولادى. شاكارىمنىڭ پايىمداۋىنشا, قاشىقتان ءبىلىم بەرۋگە ونلاين ساباق تا, تاپسىرمالار مەن ينسترۋكتسيالار دا, دەدلاين قويۋ دا جاتادى. اتالعان جۇيەمەن ساپالى ءبىلىم بەرۋ ءۇشىن ءار مەكتەپتىڭ گەوگرافيالىق جاعدايى مەن جالپى مۇمكىنشىلىگىن كەڭىنەن قاراستىرۋ قاجەت. مىسالى, ءوزى باسقاراتىن مەكتەپ ەلوردادا بولعاندىقتان, وقۋ ورداسى google-ءدىڭ تەگىن پلاتفورمالارىن پايدالانىپ وتىر. بۇل باعىتتاعى جۇيەلى جۇمىستاردى 2 جىل بۇرىن قولعا العان ەكەن. پلاتفورمالاردا جۇمىس ىستەۋدى الدىمەن مۇعالىمدەرگە ۇيرەتۋدەن باستاعان. ەندى قاشىقتان وقىتۋ فورماتىنا كوشكەن كەزدە ورتاعا وقۋشىلاردى قوستى. زاماناۋي جۇيەنى كۇندەلىكتى قىزمەتكە ەنگىزۋدىڭ ناتيجەسىندە «توتەنشە» توقساندا دا توسىلماي, تىعىرىقتان شىعىپ, مەكتەپتىڭ ءبىلىم بەرۋ جۇيەسى ءبىر ىزگە تەز ءتۇستى. بارلىق قاجەتتى ماتەريالدار google ديسكىگە سالىناتىندىقتان, وقۋشىلار ەركىن الا الادى. شاكارىم وقۋ ورداسىنداعى جۇمىس جەمىستى, قاشىقتان وقىتۋ ساپالى بولۋى ءۇشىن ءبىر مەكتەپتەگى پەداگوگتار ءبىر جۇيەنى پايدالانعانى دۇرىس ەكەنىن ايتادى. ويتكەنى ولار ءارتۇرلى پلاتفورمالاردى قولدانسا, ورتادا بالاعا اۋىر تيەدى. جاس ديرەكتور جاڭا قاۋىپ-قاتەر تىڭ يدەيالار مەن تاباندى تاۋەكەلدەر تۋعىزاتىنىن ايتادى. سول سەبەپتى قاشىقتان وقىتۋدىڭ دا پايدالى تۇستارى بار ەكەنىن, ءبىلىم بەرۋ سالاسىنا ەلەۋلى وزگەرىستەر الىپ كەلەتىنىن ءتۇسىنىپ, سوعان ساي ارەكەت ەتە ءبىلۋ كەرەك.