ۇستىمىزدەگى جىلدىڭ 5 ايىندا 62 بالانى يت قاۋىپ العان. سوڭعى جاعداي مۇنايلى اۋدانى باسقۇدىق اۋىلىندا ورىن العان. كورشىنىڭ ءيتى 12 جاستاعى بالانىڭ اياعىنىڭ بىرنەشە جەرىن تىستەگەن. جاراقات العان بالاعا شۇعىل تۇردە وتا جاسالىپ, قۇتىرۋعا قارسى ۆاكتسينا الۋ شارالارى ۇيىمداستىرىلدى. بۇل تۋرالى ماڭعىستاۋ وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى حابارلادى.
وقيعا ورىن العان بويدا بالانىڭ اتا-اناسى شۇعىل مەديتسينالىق كومەككە جۇگىندى. ماڭعىستاۋ وبلىستىق كوپبەيىندى بالالار اۋرۋحاناسىندا يت قاۋىپ العان ناۋقاسقا بارلىق ءتيىستى ەم-دوم شارالارى جاسالدى. ونىڭ ومىرىنە ءتونىپ تۇرعان قاۋىپ جوق.
ايتا كەتۋ كەرەك, ەگەر جىل باسىنان يت قابۋ دەرەگى بويىنشا 62 بالا مەديتسينالىق كومەككە جۇگىنگەن بولسا, وتكەن 2019 جىلى وسىنداي 143 جاعداي ورىن العان. ماڭعىستاۋ وبلىستىق شۇعىل مەديتسينالىق جاردەم ستانتسياسىنا وسىنداي دەرەكتەرمەن مۇنايلى اۋدانىنىڭ باسقۇدىق جانە اتامەكەن اۋىلدارى, سونداي-اق تۇپقاراعان اۋدانىنىڭ اقشۇقىر جانە سايىن-شاپاعاتوۆ اۋىلدارىنان ءجيى حابارلاسادى.
ماڭعىستاۋ وبلىسى