وبلىستىق تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ۇيىمداستىرۋىمەن كوكشەتاۋ قالاسىنداعى «ورتالىق بازار» اۋماعىنداعى ساۋدا ورىندارىندا كارانتين تارتىبىنە ساي سانيتارلىق تالاپتاردىڭ قانشالىقتى ساقتالاتىندىعىنا رەيد ۇيىمداستىرىلىپ, جەكە كاسىپكەرلەرمەن تۇسىندىرمەلىك جۇمىستار جۇرگىزىلدى. وسى باعىتتا ارنايى قۇرىلعان ءموبيلدى توپتار اۋدانداردا دا بەلسەندى ەڭبەك ەتۋدە.
قۇرامىندا جوعارىدا ايتىلعان دەپارتامەنت وكىلدەرى مەن سانيتارلىق ەپيدەميولوگيالىق ماماندار, پوليتسەيلەر بار ءۇش موبيلدىك توپ «ترويا», «ۆاۆيلون», «رۋبين», «ورتالىق بازار», «ازيا» ساۋدا ۇيلەرىنە, دالاداعى قوعامدىق اسحانالار مەن جايما بازارلارعا بارىپ, قازىرگى كارانتين تالاپتارىنىڭ جەڭىلدەتىلگەن كەزەڭىندە ساقتالۋى ءتيىس سانيتارلىق ءتارتىپ نورمالارى بويىنشا تۇسىندىرمەلىك جۇمىستار جۇرگىزدى. جۋرناليستەر قاۋىمى ءبىرىنشى توپ قۇرامىنا قوسىلىپ, حالىقتىڭ كوپ باراتىن «رۋبين», «ورتالىق بازار» ساۋدا ورىندارىنا بولدى.
«رۋبين» ساۋدا ورتالىعىنداعى ءبىرىنشى كىرگەن دۇڭگىرشەكتىڭ ىشىندە ءتورت ساتۋشى نان تاعامدارى مەن تاتتىلەر, ءسۇت ونىمدەرىن ساتىپ تۇر. بۇل دۇڭگىرشەكتە سانيتارلىق تالاپتار تولىق ساقتالادى دەپ ايتا المايمىز, ءىشى دە تار. سانيتارلىق-ەپيدەميولوگيالىق ماماندار تەكسەرىس جۇمىستارىن جۇرگىزىپ, ساتۋشىلارعا سانيتارلىق تازالىق جۇرگىزۋ مەن جەلدەتۋ ءتارتىبىن ءتۇسىندىرىپ, وبلىستىڭ باس سانيتارلىق دارىگەرىنىڭ توتەنشە جاعداي جانە كارانتين تالاپتارى بويىنشا شىعارعان قاۋلىلارى مەن تازالىق ساقتاۋ ەرەجەلەرىن ءتۇسىندىرىپ بەردى. سونىمەن بىرگە, بالالار مەن سابيلەردىڭ تاعامدارىن, ەت, ءسۇت, سۋسىن, ويىنشىق, ماتا ساتاتىن دۇگىرشەكتەرگە دە كىرىپ, وسىنداي سانيتارلىق تالاپتاردىڭ ساقتالۋىن تەكسەرىپ, ەسكەرتۋلەر جاسادى. ساتۋشىلار ماسكا مەن قولعاپ كيگەنىمەن, انتيسەپتيك قۇرالدارى تەك وزدەرىنە عانا قويىلعان. ءبىز كىرگەنگە دەيىن قاي دۇڭگىرشەك بولسىن, ونداعى كەلۋشىلەر ەشقانداي الەۋمەتتىك اراقاشىقتىق ساقتاماي, ماسكاسىز, بەسەۋدەن ارتىق ءجۇردى. بۇل ازىرشە ءموبيلدى توپتاردىڭ تۇسىندىرمەلىك تەكسەرىستەرى. ەندى ولار الداعى كۇندەرى تەكسەرىس جۇرگىزۋگە ەسكەرتۋسىز شىعىپ, تالاپتاردى ساقتاماي, تارتىپكە باعىنباعاندارعا ايىپپۇل سالىپ, اكىمشىلىك جاۋاپقا تارتادى.
مۇنداي جۇمىستار تسەلينوگراد اۋدانىندا كۇشەيتىلگەن تۇردە جۇرگىزىلۋدە. وندا اتالمىش دەپارتامەنت پەن باسقا دا وبلىستىڭ اكىمشىلىكتەرىنەن جىبەرىلگەن مامانداردان قۇرالعان ءۇش بريگادا جۇمىسىن جالعاستىرۋدا. ءار بريگادا 5 ادامنان تۇرادى, ونىڭ ىشىندە سانيتارلىق-ەپيدەميولوگيالىق ماماندارمەن قاتار پوليتسيا مەن اكىمدىك قىزمەتكەرلەرى بار. ولار تۇرعىندار مەن كاسىپكەرلەرگە وبلىستىڭ باس مەملەكەتتىك سانيتارلىق دارىگەرى قاۋلىلارىنىڭ تارماقتارىن ءتۇسىندىرىپ, سانيتارلىق-اعارتۋ جۇمىستارىن جۇرگىزۋدە.
ناقتىلاي تۇسكەندە, قوسشى اۋىلىندا كوروناۆيرۋس جۇقپاسىنىڭ ەپيدەميولوگيالىق جاعدايىنىڭ ناشارلاۋىنا بايلانىستى ءار ءتۇرلى قىزمەت سالالارىنداعى 309 كاسىپكەرلىك نىساندارىنا كۇشەيتىلگەن تەكسەرىس جۇرگىزىلدى, ءاربىر ءۇيدىڭ اۋلاسىنا بارىپ, ۆيرۋستىق ينفەكتسيالاردىڭ تۇرلەرى, سونىڭ ىشىندە COVID-19 تۋرالى جادىنامالار تاراتىلدى. سونداي-اق, بۇل ءموبيلدى توپتاردىڭ ەپيدەميولوگ ماماندارى كوروناۆيرۋس وشاقتارىن زەرتتەۋ جۇمىستارىنا, ۆيرۋستى تەستىلەۋ جوسپارلارىن قۇرۋ, جۇمىس ىستەپ تۇرعان نىساندار بازاسىن قۇرۋ جانە ناقتىلاۋ بويىنشا ءىس-شارالارعا جۇمىلدىرىلدى. وسىلايشا ونداعى جۇمىستى كۇشەيتۋگە ىسساپارعا جىبەرىلگەن قىزمەتكەرلەر نۇرەسىل, قابانباي باتىر جانە اقمەشىت ەلدى مەكەندەرىندەگى بلوك-بەكەتتەرگە باقىلاۋ جۇرگىزدى. سوڭعى بىرنەشە كۇندە تالاپكەر, قاراوتكەل, قوسشى, قوياندى, ورازاق اۋىلدارىندا بارلىق سانيتارلىق-ەپيدەميولوگيالىق ءىس-شارالاردى اياقتادى.
مۇنداي اقپاراتتىق-تۇسىندىرمەلىك جۇمىستار كارانتين رەجيمى كەزىندە ۇزبەي جۇرگىزىلىپ تۇرادى دەيدى دەپارتامەنت ماماندارى.
اقمولا وبلىسى.