جاز شىعا پەتروپاۆلدىق پوليتسەيلەردىڭ مازاسىن الاتىن تاعى ءبىر ۇرلىق ورىستەيدى. ول - ۆەلوسيپەد ۇرلىعىمەن بايلانىستى قىلمىستار. ولاردىڭ الدىن الۋ بويىنشا جۇيەلى جۇمىس جۇرگىزۋگە تۋرا كەلەدى. بۇل جۇمىسقا بيىلدان باستاپ جەدەل ۋاكىلدەر مەن ۋچاسكەلىك ينسپەكتورلاردان باسقا ەرىكتىلەر دە بەلسەندى قاتىسۋعا نيەت ءبىلدىرىپ وتىر.
ولاردىڭ بەلسەندىلىكتەرى جۇمىستىڭ ناتيجەلى بولاتىنىنا سەنىم ۇيالاتادى. وسىعان سايكەس پەتروپاۆل قالاسىنىڭ پوليتسيا باسقارماسى ءبىرىنشى پوليتسيا ءبولىمىنىڭ قىزمەتكەرلەرى ارنايى الگوريتم بويىنشا بىرلەسكەن رەيد جۇرگىزدى. پوليتسەيلەر ۆەلوسيپەدشىلەرمەن جانە ءوتىپ بارا جاتقان تۇرعىندارمەن اڭگىمە جۇرگىزسە, ەرىكتىلەر جادىنامالار مەن بۋكلەتتەر تاراتتى. سقو بويىنشا ىزدەستىرۋ جاساعىنىڭ جەتەكشىسى ەۆگەني سولوۆەۆتىڭ ايتۋىنشا, وڭىردەگى ىزدەستىرۋ-قۇتقارۋ جاساعىنان وننان استام ەرىكتى تارتىلىپ, ءبىر-ەكى ساعات ىشىندە بىرنەشە تۇرعىن ءۇيدى ارالاپ شىققان.
پەتروپاۆل قالالىق ءبىرىنشى پوليتسيا ءبولىمىنىڭ باستىعى, پوليتسيا پولكوۆنيگى بالابەك ءجاحيننىڭ ايتۋىنشا, جۇمىس تيىمدىلىگىن ارتتىرۋ ماقساتىندا پوليتسەيلەر ءتۇسىندىرۋ جۇمىسىندا ءتۇرلى ىقپال ەتۋ ادىستەرىن پايدالانادى. ۆەلوسيپەد ۇرلىعىنىڭ الدىن الۋ جۇمىسىنان باسقا ۋچاسكەلىك ينسپەكتورلار كىرەبەرىستەر مەن پاتەرلەردەگى ۇرلىقتان ساقتانۋ جولدارىن دا تۇسىندىرەدى. بۇل جۇمىسقا ەرىكتىلەرمەن قاتار پيك توراعالارى دا كىرىسكەن.
وسى كۇندەرى قالالىق پوليتسيا باسقارماسىنىڭ پاترۋلدىك پوليتسيا باتالونى قىزمەتكەرلەرى ءتۇسىندىرۋ اكتسياسىن وتكىزدى. ينسپەكتورلار جاياۋ جۇرگىنشىلەر مەن ۆەلوسيپەدشىلەردى توقتاتىپ, قالا كوشەلەرىمەن دۇرىس ءجۇرۋ, جاياۋ جۇرگىنشىلەر جولاقتارى مەن قيىلىستاردان ءوتۋ ەرەجەلەرىن ءتۇسىندىرىپ, اڭگىمە سوڭىندا ارقايسىسىنا بەتپەردە دە تابىستادى.
پەتروپاۆل