اباي قۇنانباي ۇلىنىڭ 175 جىلدىعىنا وراي قازاق ۇلتتىق قىزدار پەداگوگيكالىق ۋنيۆەرسيتەتىندە «ۆيزۋالدى ونەردە اباي الەمىن بەينەلەۋ» تاقىرىبىنداعى رەسپۋبليكالىق جاس سۋرەتشىلەر بايقاۋى مارەگە جەتتى.
كاسىپتىك ءبىلىم كافەدراسىنىڭ مۇرىندىق بولۋىمەن ۇيىمداستىرىلعان شىعارماشىلىق سايىسقا كوللەدج جانە مەكتەپ ءبىتىرۋشى تۇلەكتەر قاتىسىپ, وزدەرىنىڭ تىرناقالدى تۋىندىلارىن ۇسىندى.
– بايقاۋعا قاعاز بەتىنە نەمەسە كەنەپكە ءتۇرلى-ءتۇستى بوياۋمەن نەمەسە گرافيكالىق قۇرالدارمەن اباي قۇنانباي ۇلىنىڭ شىعارمالارىنا ارنالىپ سالىنعان جۇمىستار قابىلداندى. سۋرەتتى سالۋعا بار بولعانى 2 ساعات ۋاقىت ءبولىندى. Zoom پلاتفورماسى ارقىلى كوميسسيا مۇشەلەرىنىڭ باقىلاۋىمەن قاتىسۋشىلاردىڭ تۋىندىلارى باعالاندى. العاشقى سايىسقا 26 جاس تالاپ قاتىسىپ, باقتارى مەن باپتارىن سىنادى, – دەيدى كاسىپتىك ءبىلىم كافەدراسىنىڭ مەڭگەرۋشىسى راحيا دارمەنوۆا.
ونلاين فورماتتا وتكەن شىعارماشىلىق سايىستا ءبىرىنشى ورىندى «جەلسىز تۇندە جارىق اي» تاقىرىبىنداعى كارتينانى سالعان قىزىلوردا وبلىسىنىڭ ارال اۋدانىنداعى №260 مەكتەپتىڭ 11-سىنىپ وقۋشىسى فاريدا جولمىرزاەۆا يەلەندى. ەكىنشى ورىنعا «ابايتانۋ» تۋىندىسىمەن دايىندىق كۋرسىنىڭ تىڭداۋشىسى ءبۇلدىرشىن تۇردىباي لايىق دەپ تانىلسا, ءۇشىنشى ورىن «قانسوناردا بۇركىتشى شىعادى اڭعا» اتتى سۋرەتتىڭ اۆتورى الماتى تەحنولوگيا جانە فلوريستيكا كوللەدجىنىڭ ستۋدەنتى مەرۋەرت سادىقوۆاعا بۇيىردى.
سونىمەن ءبىرىنشى ورىن العان بويجەتكەن قىزدار ۋنيۆەرسيتەتىندە وقۋعا ءبىر جىلدىق وقۋ اقىسىنا 50 پايىزدىق, ەكىنشى ورىن العان قىز 25 پايىزدىق جانە ءۇشىنشى ورىن العان قاتىسۋشى 15 پايىزدىق جەڭىلدىك الادى.
– اباي تۋرالى, ونىڭ پوەزياسى جايلى از ايتىلعان جوق. الايدا, بۇگىن مەن بولاشاقتىڭ التىن دىڭگەگىنە اينالعان ويشىلدىڭ تۇلعاسىن تولىق تانىپ ۇلگەردىك دەۋ اسىعىستىق. سىرى مەن جۇمباعىن ىشىنە بۇككەن شىعارمالارى ءالى دە بارشىلىق. بۇل ونىڭ تىم تەرەڭدىگىن اڭعارتسا كەرەك. ادامزاتتىڭ اقىلمانى ەڭ الدىمەن ۇلتىن شەكسىز ءسۇيۋدىڭ قانداي بولاتىنىن كورسەتتى. سىنادى, سىناۋ ارقىلى ۇلتىنىڭ ءوسىپ-وركەندەگەنىن كوزدەدى. ابايدىڭ ەرەكشەلىگى – ناداندىقتىڭ ورنىنا بىلىمپازدىقتى, تايتالاستىڭ ورنىنا تاتۋلىقتى, داڭعويلىقتىڭ ورنىنا دانالىقتى ءسىڭىستىرىپ, حالقىمىزدىڭ رۋحاني قاسيەتتەرىن پاش ەتكەندىگى. اقىن مەرەيتويى قارساڭىندا تۇڭعىش رەت ۇيىمداستىرىلعان بايقاۋ اباي ۇلىلىعىن جاستار اراسىندا كەڭىنەن دارىپتەۋدى ماقسات تۇتۋدان تۋىندادى, – دەيدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ باسشىسى جاندار اسان.
الماتى