بيىل قاۋىپتى ىندەتتىڭ تارالۋىنا جول بەرمەۋ ماقساتىندا مەكتەپ تۇلەكتەرى ءۇشىن سوڭعى قوڭىراۋ سوعىلمايدى. بىراق اتتەستاتتاردى تاپسىرۋ ءراسىمى وتكىزىلەدى. ونىڭ ۋاقىتى دا جىلداعىدان وزگەرتىلىپ, ماۋسىمنىڭ 3-4 كۇندەرىنە بەلگىلەندى. ال پاندەميا كەزىندە اتتەستات تاپسىرۋ ءراسىمى قالاي وتكىزىلەدى؟
ءبىلىم جانە عىلىم مينيسترلىگى وسىعان وراي ارنايى «Birgemiz: تۇلەك-2020» اتتى مەكتەپ ءبىتىرۋ ءىس-شارالارىن وتكىزۋدىڭ تۇجىرىمداماسىن ازىرلەدى. اتالعان تۇجىرىمداماعا سايكەس ءىس-شارا مەكتەپ اۋماعىندا, اشىق الاڭدا وتكىزىلەدى. شارا ءار سىنىپ ءۇشىن بولەك ۇيىمداستىرىلۋى قاجەت. ال ءار سىنىپ ءراسىمىنىڭ ۋاقىت ارالىعى 20 مينۋتتان كەم بولماعانى ءجون. تۇلەكتەر اتتەستات تاپسىرۋ شاراسىنا مەكتەپ فورماسىندا قاتىسۋى قاجەت. راسىمگە ءاربىر تۇلەكپەن 1 نەمەسە 2 اتا-انا عانا قاتىسا الادى, ودان كوپ بولماۋى كەرەك. سونىمەن قاتار سانيتارلىق تالاپتار مەن ادامدار اراسىنداعى اراقاشىقتىق ساقتالىپ, شاراعا قاتىسۋشىلاردىڭ بارلىعى ماسكا تاعۋى ءتيىس.
بۇدان بولەك جاۋاپتى ۆەدومستۆو مەكتەپ ءبىتىرۋ ءىس-شارالارىن وتكىزۋدىڭ تۇجىرىمداماسىندا جول بەرىلمەيتىن جاعدايلار دا انىق كورسەتىلگەن. تۇجىرىمدامادا بەلگىلەنگەن تالاپتارعا ساي مەكتەپ نەمەسە پەداگوگتەرگە سىيلىق الۋ ءۇشىن اقشا جيناۋعا; يۆەنت-اگەنتتىكتەردى, ياعني مەرەكەلىك شارالاردىڭ ۇيىمداستىرۋشىلارىن تارتىپ, انيماتورلاردى شاقىرۋعا; مەرەكەلىك داستارحان جاساپ, سالتاناتتى تۇردە وتكىزۋگە; اۆتوكولىكتەردى جالعا الىپ, قالا ىشىندە ەكسكۋرسيا (شەرۋ) جاساۋعا; مەيرامحانا, ءدامحانا جانە كوڭىل كوتەرۋ ورىندارىندا وتىرىس ۇيىمداستىرۋعا بولمايدى.