«جۇمىسپەن قامتۋدىڭ جول كارتاسى» اياسىندا 11 مىڭنان اسا اقمولالىقتى جۇمىسپەن قامتۋ جوسپارلانعان. كوكشەتاۋدا بۇل باعىتتا 33 جوبا جۇزەگە اسىرىلماق. بۇل ەكى جارىم مىڭنان اسا جاڭا جۇمىس ورنىنىڭ اشىلۋىنا مۇمكىندىك بەرۋدە.
الايدا وكىنىشكە قاراي دايىن جۇمىستان باس تارتىپ, ەڭبەك ەتۋگە ق ۇلىقسىز جاندار دا كەزدەسەدى. قازىردىڭ وزىندە 200-گە جۋىق جۇمىسشى ماماندىعىنا سۇرانىس بار.
قالالىق جۇمىسپەن قامتۋ ورتالىعىندا جۇمىسسىز رەتىندە 540 ازامات تىركەلگەن. ورتالىق ماماندارى ولارعا لايىقتى جۇمىس ىزدەۋمەن اينالىسۋدا. قازىردىڭ وزىندە «جۇمىسپەن قامتۋدىڭ جول كارتاسىن» جۇزەگە اسىرۋ اياسىندا 200-گە تارتا جۇمىسشى قاجەت.
– كوبى جۇمىس ىستەۋگە ىنتاسىز. بىرەۋى جالاقىسى از دەسە, ەندى ءبىرى باسقا سەبەپتەردى العا تارتادى. باعدارلاما اياسىندا جۇمىسشىلاردىڭ جالاقىسى 85 مىڭ تەڭگەدەن باستالادى, جۇمىس اۋقىمىنا قاراي ودان جوعارى دا بولۋى مۇمكىن. ەسەپتە تۇرعانداردىڭ كوبىنىڭ جوعارى ءبىلىمى بار. سوندىقتان ولار قارا جۇمىسقا بارعىسى كەلمەيدى,–دەيدى قالالىق جۇمىسپەن قامتۋ ورتالىعىنىڭ مامانى الەكساندر سولودكا.
باعدارلاما اياسىندا قازىردە قۇرىلىس جانە جول جوندەۋ سالاسىنداعى ماماندارعا سۇرانىس جوعارى. ديپلوم ماڭىزدى ەمەس, ەڭ باستىسى, سول باعىتتا تاجىريبەسى بولسا جەتكىلىكتى, تىم قۇرىعاندا قۇلشىنىسى كەرەك دەيدى ورتالىق ماماندارى.
– جۇمىسپەن قامتۋ ورتالىعى جازعى دەمالىستا ستۋدەنتتەرگە لايىقتى جۇمىس تاۋىپ بەرۋگە كومەكتەسەتىنىن ەستىپ, كەلىپ وتىرمىن. وزىمە لايىقتى جۇمىس ىزدەۋدەمىن. تابىلسا ەڭبەك ەتەر ەدىم, – دەيدى ستۋدەنت ميلانا باتىرباەۆا.
«جۇمىسپەن قامتۋدىڭ جول كارتاسى» اياسىندا كوكشەتاۋ قالاسىندا جالپى سوماسى 10,4 ميلليارد تەڭگە بولاتىن 33 جوبا ىسكە اسىرىلۋدا. بۇل 2600 جاڭا جۇمىس ورىندارىنىڭ اشىلۋىنا مۇمكىندىك بەرۋدە. ونىڭ 1300-ءى جۇمىسپەن قامتۋ ورتالىعى ارقىلى ءوتۋى ءتيىس. جول كارتاسى اياسىندا ازىرگە 26 كوكشەتاۋلىق جۇمىسپەن قامتىلدى.