دامىعان ەلدەردە تالاپكەرلەر وقۋ ورنىنا قۇجاتتارىن ارقالاپ بارمايدى. بۇل شارۋانى كومپيۋتەردىڭ كومەگىمەن ءبىر-اق ساتتە بىتىرە سالادى. مىنەكي, ەندى ءبىزدىڭ تالاپكەرلەر دە ءبىلىم بەرۋ ۇيىمىنىڭ عيماراتى الدىندا تابان توزدىرىپ, كەزەككە تۇرىپ, وعان قوسا تىزىمدەگى 5-6 قۇجاتتىڭ نوتاريۋسپەن كۋالاندىرىلعان بىرنەشە كوشىرمەسىن دايىنداپ سابىلمايدى. وتىنىشتەر بيىلدان باستاپ ەلەكتروندى تۇردە قابىلدانادى.
ءبىلىم جانە عىلىم مينيسترلىگى مۇنداي جوسپارىمەن نەگىزىنەن بىلتىر بولىسكەن ەدى. ءبىلىم جانە عىلىم ۆيتسە-ءمينيسترى رۇستەم بيعاري Astana Hub تەحنوپاركىندەگى الەۋمەتتىك يننوۆاتسيالار زەرتحاناسىنىڭ اشىلۋىندا: ء«بىلىم بەرۋ جۇيەسىندە 67 قىزمەت ەلەكتروندى تۇردە قولجەتىمدى. ماسەلەن, قازىرگى ۋاقىتتا جوعارى وقۋ ورنىنا قۇجات تاپسىرۋ قيىن جۇمىس بولىپ كورىنەدى. 2020 جىلدان باستاپ ونىڭ قاجەتى بولمايدى. ويتكەنى جىل سوڭىنا دەيىن بارلىق اقپارات تسيفرلانادى. «كۇندەلىك» جۇيەسىندەگى دەرەكتەر اۆتوماتتى تۇردە جوو-عا بەرىلەدى, سايكەسىنشە قۇجاتتاردى قايتا تاپسىرۋدىڭ كەرەگى جوق», دەپ مالىمدەگەن بولاتىن. ەندى جاقىندا وسى جوسپاردىڭ ناقتى قولعا الىنىپ, ىسكە اسىرىلعانى ايتىلدى.
وسىلايشا الداعى قۇجات قابىلداۋ قىزاتىن كەزەڭدە كوللەدجدەر مەن جوو تالاپكەرلەردىڭ ءوتىنىشىن eGov.kz ارقىلى قابىلدايدى. بۇل تۋرالى جاقىندا ءبىلىم جانە عىلىم ءمينيسترى اسحات ايماعامبەتوۆ حابارلادى. ءمينيستردىڭ مالىمدەۋىنشە, ەندى تالاپكەرلەرگە قۇجاتتاردى قاعاز تۇرىندە تاپسىرۋدىڭ قاجەتى جوق. ءاربىر بولاشاق ستۋدەنت ءوزى تاڭداعان كوللەدجدىڭ جانە جوو-نىڭ سايتتارى نەمەسە «ەلەكتروندىق ۇكىمەت» پورتالى ارقىلى قۇجاتتارىن تاپسىرا الادى. «قۇجات تىگەتىن پاپكالاردى, كونۆەرتتەردى ساتىپ الۋ, قاعاز انىقتامالاردى تاپسىرۋ, تاڭ اتپاستان جوعارى وقۋ ورىندارى مەن كوللەدجدەردىڭ قابىلداۋ كوميسسيالارىندا كەزەكتە تۇرۋ نەمەسە باسقا ەلدى مەكەنگە قاتىناۋ ماسەلەلەرى تۋىندامايدى. مۇنىڭ ءبارى بۇدان بىلاي وڭاي جانە ىڭعايلى بولادى. سايتقا كىرىپ, ءبىر تەتىكتى باسۋ ارقىلى بارلىق قۇجاتتى جىبەرە الادى», دەدى مينيستر.