كوكشەتاۋلىق كۋرسانت سۋدى مۇنايدان تازارتۋدىڭ ءادىسىن تاپتى

جانات ءادىلحان – بولاشاق ءورت ءسوندىرۋشى. الماتى ءوڭىرىنىڭ تۋماسى وسىدان ءۇش جىل بۇرىن كوكشەتاۋ تەحنيكالىق ينستيتۋتىنا وقۋعا تۇسكەن. ءوز ماماندىعىن عىلىمسىز ەلەستەتە المايدى. تاياۋدا جاس عالىم جەتەكشىسىمەن بىرگە عىلىمي جاڭالىق اشتى. ول جاڭالىق – وبلىس وڭىرىندە وسەتىن قۋراي, قوعا تەكتەس وسىمدىكتەردىڭ كومەگىمەن سۋ بەتىنە توگىلگەن مۇنايدى تازارتۋ. عىلىمي جاڭالىعى ەلىمىز بويىنشا وتكىزىلگەن بايقاۋدا جۇلدە الدى.

ء–ارتۇرلى عىلىمي بايقاۋلارعا قاتىستىم. ەڭ الدىمەن, كافەدرالار اراسىنداعى جارىستان وزىپ شىعىپ, ودان سوڭ وبلىستاعى عىلىمي جوبالار جارىسىنان ءبىرىنشى ورىن الىپ, كەيىن رەسپۋبليكا بويىنشا جوعارى وقۋ ورىندارى اراسىنداعى عىلىمي بايقاۋدا 1-ورىن يەلەندىم, دەيدى كۋرسانت جانات ءادىلحان.  

جاستاردىڭ عىلىمعا قۇمارتۋى يگىلىكتى ءىس.

–اپاتتى توگىلگەن مۇنايدى سۋ بەتىنەن تازالاۋ ءۇشىن ءبىز مىنانداي 5 ليترلىك ىدىسقا سۋ قۇيىپ, سۋدىڭ بەتىنە مۇنايدى توگەمىز. سول مۇنايدىڭ بەتىنە الدىن الا دايىندالىپ ۇساتىلعان وسىمدىكتەر قالدىعىن سەبەمىز. كوبىنەسە, قۋراي تۇقىمداس جانە قوعا تۇقىمداستارىن قولدانامىز. ولاردى الدىن-الا زەرتحاناعا اكەلىپ, قۇرعاتىپ, سودان كەيىن كولەمى 2-5 مم قىلىپ ۇساقتايمىز. سول ۇساتىلعان وسىمدىكتى توگىلگەن مۇنايدىڭ بەتىنە سەبەمىز. 10-15 مينۋت ۋاقىتتىڭ ىشىندە ول وسىمدىكتەر وزىنە مۇنايدى ءسىڭىرىپ الادى. مۇنايدى ءسىڭىرىپ العانى, مىنە بايقالىپ تۇر, وسىمدىك قارايىپ كەتەدى. كەيىن سۋ بەتىنەن وسى وسىمدىكتەردى ءسۇزىپ الىپ تاستاعاندا سۋ تازا كۇيىندە قالادى, دەيدى كوكشەتاۋ تەحنيكالىق ينستيتۋتىنىڭ اعا وقىتۋشىسى, ازاماتتىق قورعانىس كاپيتانى رۇستەم ءشارىپوۆ.  

تەحنيكالىق ينسيتۋتتا كۋرسانتتاردىڭ عىلىممەن اينالىسۋى ءۇشىن بار مۇمكىندىك جاسالعان. مۇندا حيميالىق تاجىريبەلەر ءجيى جاسالىپ, بولاشاق قۇتقارۋشىلار ءورت شالعان عيماراتتىڭ ماتەريالىنىڭ قۇرامىن, ونىڭ ورتەنۋ پروتسەسى قالاي جۇزەگە اساتىنىن, حيميالىق سۇيىقتىقتاردىڭ جانۋ جىلدامدىعىن, لاپىلداۋ مەن جارىلۋ كۇشىن دە زەرتتەيدى.