قازاقستاندىقتارعا قولايلى بولۋ ءۇشىن حقو-عا كەزەكتى برونداۋ ادىستەرىنىڭ ءتۇرى كوبەيتىلدى. ەندى قىزمەت الۋشىلار حقو-عا كەزەكتى تەك egov.kz پورتالىندا نەمەسە 1414 بايلانىس ورتالىعى ارقىلى عانا ەمەس, سونداي-اق eGovKzBot2.0 تەلەگرام-بوتىنىڭ كومەگىمەن دە برونداي الادى, دەپ حابارلايدى «ازاماتتارعا ارنالعان ۇكىمەت» مك ماڭعىستاۋ وبلىسى بويىنشا فيليالىنىڭ ءباسپاسوز قىزمەتى.
ول ءۇشىن قىزمەت الۋشى ءموبيلدى ازاماتتار بازاسىندا تىركەلۋى كەرەك جانە ونىڭ ۇيالى تەلەفونىنا تەلەگرام قوسىمشاسى جۇكتەلگەن بولسا بولعانى. ءموبيلدى ازاماتتار بازاسىنا egov.kz ەلەكتروندى ۇكىمەت پورتالىنداعى ۆيرتۋالدى اسسيستەنتتىڭ كومەگىمەن تىركەلۋگە بولادى. سونىمەن, حقو-عا كەزەكتى برونداۋ ءۇشىن پايدالانۋشى مازىردەن «حقو-عا كەزەكتى برونداۋ» قىزمەتىن تاڭدايدى. ارى قاراي جۇيە مەملەكەتتىك قىزمەتتەردى الۋعا ىڭعايلى ايماقتى, حقو مەكەنجايىن, بارۋ ماقساتىن, ىڭعايلى كۇنى مەن ۋاقىتتى تاڭداۋدى ۇسىنادى.
بارلىق قادامدار جاسالعان سوڭ قىزمەت الۋشىنىڭ ۇيالى تەلەفونىنا ونىڭ جسن, تاڭدالعان حقو مەكەنجايى, كۇنى مەن ۋاقىتى كورسەتىلگەن sms كەلەدى. حقو-عا كەلگەن كەزدە وسى sms-حابارلامانى كورسەتۋ ارقىلى كەزەكتى الدىن الا برونداعانىڭىزدى راستايسىز.
ايتا كەتەيىك, قازىرگى تاڭدا eGovKzBot2.0 تەلەگرام-بوتى ارقىلى 28 مەملەكەتتىك قىزمەت پەن سەرۆيس قولجەتىمدى. ولاردىڭ ىشىندە كەڭ قولدانىسقا يە بولعاندارى دارىگەردى ۇيگە شاقىرۋ, ايىپپۇلداردى تەكسەرۋ, مەديتسينالىق مەكەمەلەردەن الىنعان انىقتامالار, زەينەتاقى اۋدارىمدارى تۋرالى انىقتامالار جانە ت. ب.
ەستەرىڭىزگە سالا كەتەيىك, كوروناۆيرۋس پاندەمياسى جاعدايىندا جانە ازاماتتاردىڭ ءبىر جەرگە شوعىرلانۋىن بولدىرماۋ ماقساتىندا حقو-لار egov.kz پورتالىندا قولجەتىمسىز قاعاز تۇرىندەگى مەملەكەتتىك قىزمەتتەردى تەك الدىن الا برونداۋ بويىنشا كورسەتەدى. Egov.kz پورتالىندا ونلاين برونداۋ قىزمەتى حقو-لار ءوز قىزمەتىن قايتا باستاعان وڭىرلەر ءۇشىن عانا جارامدى.
ماڭعىستاۋ وبلىسى