«مەن – ابايدىڭ ۇرپاعى» اتتى رەسپۋبليكالىق كونكۋرس ءوتتى

ۇزاق دايىندىق جۇمىستارىنىڭ ناتيجەسىندە قازبسقا جانىنداعى ليتسەي يۋنەسكو كلۋبىنىڭ تولىق قۇقىقتى مۇشەسى بولىپ تابىلادى, بۇل وقۋشىلارعا حالىقارالىق جوبالارعا قاتىسۋعا كەڭ مۇمكىندىك بەرەدى. قازبسقا جانىنداعى ليتسەي ءتۇرلى جوبالاردى بەلسەندى ەنگىزىپ, ءبىلىم بەرۋ ساپاسىن جاقسارتۋ جانە وقۋشىلاردىڭ شىعارماشىلىق دەڭگەيىن ارتتىرۋ ءۇشىن باستاما جاسايدى.

قازبسقا جانىنداعى ليتسەيدىڭ قازاق ءتىلى مەن ادەبيەتىنىڭ وقىتۋشىسى ن.ت.سافۋللينا «مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» ماقالاسىندا ابايدىڭ تۇلعاسى مەن مۇراسىن ۇلىقتاۋ ماقساتىندا ءبىلىم بەرۋ سالاسىنا ۇلكەن مىندەتتەر جۇكتەدى. قازاقتىڭ ءبىرتۋار ۇلدارىنىڭ ءبىرى, دانىشپان اقىن, ويشىل, دانا عۇلامالارىنىڭ ءبىرى, قازاق ادەبيەتىنىڭ شوقتىعى بيىك ءىرى تۇلعاسى اباي ەڭبەكتەرىنىڭ ءنارىن وسكەلەڭ ۇرپاقتىڭ ساناسىنا ءسىڭىرۋ ماقساتىندا ۇجىمى ءىس-شارالار ۇيمداستىرۋدى قازبسقا جانىنداعى ليتسەي باسشىلىققا الدى. قازاق باس ساۋلەت - قۇرىلىس اكادەمياسىنىڭ 40 جىلدىعىن جانە ۇلى اباي قۇنانباەۆتىڭ 175 جىلدىعىن مەرەكەلەۋگە ارنالعان ءىس-شارالار اياسىندا يننوۆاتسيا ينستيتۋتى جانە قوسىمشا ءبىلىم بەرۋ جانە جەكەمەنشىك ءبىلىم بەرۋ ۇيىمدارىنىڭ رەسپۋبليكالىق قاۋىمداستىعىنىڭ قولداۋىمەن, قازبسقا جانىنداعى ليتسەي «مەن –– ابايدىڭ ۇرپاعى» اتتى رەسپۋبليكالىق قاشىقتىق كونكۋرسىن وتكىزدى جانە قازاقستان رەسپۋبليكاسىنىڭ جالپى ءبىلىم بەرۋ مەكەمەلەرىنىڭ 4-11 سىنىپ وقۋشىلارىن قاتىسۋعا شاقىردى» دەپ اتاپ ءوتتى.

«...ابايدىڭ ءوزى ولسە دە, ءسوزى ولگەن جوق,

ابايعا ەشبىر اقىن تەڭەلگەن جوق.

ماڭگىلىك بۇگىنگىدەي سەنىڭ جىرىڭ,

ەسكىرىپ ايتقان ۇلگىڭ كونەرگەن جوق.

حالىققا ۇلگى بەرگەن سەنەن وزگە

اقىندا ءسىز سياقتى شەبەر دە جوق....» دەپ اقىن قاسىم امانجولوۆ  جىرلاعانداي, ابايدىڭ ءوزى  ولسە دە, ارتىندا قالدىرعان  مۇراسى عاسىردان-عاسىرعا  جەتەرى  انىق. اباي قۇنانباي ۇلى - قازاقتىڭ جۇرەگىندەگى  ماڭگىلىك ەسىم.

ابايدى قالاي دارىپتەسەك تە جاراسادى. ونىڭ عيبراتتى عۇمىرى مەن شىنايى شىعارماشىلىعى – قازاق حالقىنا عانا ەمەس, جاھان جۇرتىنا دا ۇلگى-ونەگە. ابايدىڭ ادام مەن قوعام, ءبىلىم مەن عىلىم, ءدىن مەن ءداستۇر, تابيعات پەن قورشاعان ورتا, مەملەكەت پەن بيلىك, ءتىل مەن قارىم-قاتىناس تۋرالى ايتقان وي-تۇجىرىمدارى عاسىرلار وتسە دە ماڭىزىن جوعالتپايدى. ويتكەنى اقىننىڭ مۇراسى – بۇكىل ادامزات بالاسىنىڭ رۋحاني ازىعى. ولاي بولسا, اباي قۇنانباەۆتىڭ شىعارماشىلىق مۇراسىن ناسيحاتتاۋدى, ابايدىڭ شىعارماشىلىق مۇراسىنا دەگەن سۇيىسپەنشىلىككە تاربيەلەۋدى, وقۋشىلاردىڭ رۋحاني وي-ءورىسىن كەڭەيتۋ مەن وزگە ۇلت وكىلدەرىنىڭ قازاق مادەنيەتى مەن ادەبيەتىنە قىزىعۋشىلىعىن ارتتىرۋدى جانە دارىندى وقۋشىلاردى انىقتاۋ جانە قولداۋدى ماقسات ەتكەن بايقاۋعا جۇمىستار ءۇش تىلدە قابىلدانىپ, جاس ساناتتارى بويىنشا وتكىزىلدى. ءبىرىنشى توپ – 4-5 سىنىپ وقۋشىلارى (مانەرلەپ وقۋ سايىسى). وسى توپتىڭ ءار قاتىسۋشىسى ابايدىڭ شىعارمالارىن مانەرلەپ وقۋ ارقىلى بەينەروليك ۇسىندى. قاتىسۋشىلاردىڭ باياندامالارى تاقىرىپقا سايكەستىگى, ساحنا مادەنيەتى, سويلەۋدىڭ ينتوناتسيالىق مانەرلىلىگى, سويلەۋدىڭ ەموتسيالىق-ەكسپرەسسيۆتى بوياۋىنا بايلانىستى ( مۋزىكالىق جانە حورەوگرافيالىق بەزەندىرۋ ) باعالاندى.

ەكىنشى توپ – 6-7 سىنىپ وقۋشىلارى ( اباي اندەرىن ورىنداۋ بايقاۋى). وسى توپتىڭ ءار قاتىسۋشىسى اباي اندەرىن ورىنداۋمەن بەينەروليك ۇسىندى. قاتىسۋشىلاردىڭ باياندامالارى مۋزىكالىق, تاقىرىپقا سايكەستىگى, ساحنا مادەنيەتى, ارتىستىك جانە ورىنداۋ ەرەكشەلىگى; ورىنداۋ تەحنيكاسى بويىنشا باعالانعان.

ءۇشىنشى توپ – 8-9 سىنىپ وقۋشىلارى («اباي جولى» رومانىنان اباي مونولوگى). وسى توپتىڭ ءار قاتىسۋشىسى ابايدىڭ مونولوگىمەن بەينەروليك ۇسىندى.

قاتىسۋشىلاردىڭ قويىلىمدارى ساحنا مادەنيەتى, ارتىستىك جانە ورىنداۋ ەرەكشەلىگى بويىنشا باعالاندى. ال ءتورتىنشى توپ – 10-11 سىنىپ وقۋشىلارى «اباي - ۇلى, سوزدەرى - ماڭگىلىك» تاقىرىبىندا ەسسە جازدى.

بايقاۋ جەڭىمپازدارى قازبسقا باسشىلىعىنىڭ ماقتاۋ قاعازدارىمەن ماراپاتتالىپ, جەتەكشىلەرى وقۋشىلاردى بايقاۋعا دايىنداعانى ءۇشىن العىس حاتتار الدى. قاتىسۋشىلاردىڭ ديپلومدارى مەن العىس حاتتارى ونلاين جولداندى.