«شوقان وقۋلارى» – ءداستۇرلى جىل سايىن وتكىزىلەتىن شارالاردىڭ ءبىرى. بيىل 24 - ءشى رەت ۇيىمداستىرىپ وتىر. ۆيرتۋالدى كەزدەسۋگە ۆەنگريا, مونعولويا جانە رەسەيدىڭ كورنەكتى عالىمدارى قاتىستى.
قازاق حالقىنىڭ اعارتۋشى عالىمى, ەتنوگراف شوقان ءۋاليحانوۆتىڭ سانالى عۇمىرىندا ءجۇرىپ وتكەن سارا جولى مەن قالدىرعان مول مۇرالارى بۇگىنگى كونفەرەنتسيا قاتىسۋشىلارى تاقىرىبىنىڭ وزەگىنە اينالدى. ولار اعارتۋشى عالىم شوقان ءۋاليحانوۆتىڭ تاريح عىلىمىنا قوسقان ۇلەسىن سارالاپ, ەڭبەكتەرىن كەڭىنەن ناسيحاتتاۋ ماسەلەسىن تالقىلادى.
– شوقان ءۋاليحانوۆتىڭ ءومىرىنىڭ ءار كەزەڭى ەسكەرۋسىز قالمۋى كەرك. عالىمنىڭ عۇمىرى قامشىنىڭ سابىنداي قىسقا بولدى. نەبارى 29 جاسىندا دۇنيەدەن وزدى. ايتكەنمەن ارتىنا مول مۇرا قالدىردى,–دەيدى تاريح عىلىمدارىنىڭ دوكتورى, پروفەسسور قادىرجان ابۋەۆ.
القالى جيىنعا شەت ەل عالىمدارى مەن ۋنيۆەرسيتەت پروفەسسورلارى بەلسەندى قاتىستى. 337 عىلىمي ماقالا ۇسىنىلىپ, 4 تومدىق ەلەكتروندى فورماتتاعى جيناق جاريالانعان.