ارشالى اۋدانىنىڭ قوستومار ەلدى مەكەنىندە ورتا ازياداعى ەڭ ءىرى جەل ەلەكتر ستانتسياسىنىڭ قۇرىلىسى جالعاسۋدا. جاڭا نىسان 10 000 وتباسىن ەنەرگيامەن قامتيدى دەپ كۇتىلۋدە.
بۇگىنگى تاڭدا تابيعاتقا قامقورلىق كورسەتۋ مادەنيەتىن قالىپتاستىرۋعا جانە بالامالى ەنەرگيا كوزدەرىن كەڭىنەن قولدانۋعا باسىمدىق بەرىلۋدە. بۇل باعىتتاعى جوبالاردى جۇزەگە اسىرۋدا قازاقستاننىڭ دامۋ بانكى قارجىلىق وپەراتور رەتىندە قولداۋ كورسەتىپ كەلەدى. اتالمىش قارجى ينستيتۋتىنىڭ نەسيەلەندىرۋىمەن «Green Energy» كومپانياسى ون جارىم جىلعا ۇزاق مەرزىمدى نەسيە الىپ, جەل ەلەكتر ستانتسياسى قۇرال-جابدىقتارىن جەتكىزىپ, قۇرىلىس جۇمىستارىن جۇرگىزۋدە. مۇنداي نىساندار جەل قۋاتىن ەلەكتر ەنەرگياسىنا اينالدىرىپ, قورشاعان ورتاعا ەشبىر نۇقسان كەلتىرمەيدى. نىساننىڭ قولدانىسقا ەنگىزىلۋى اتموسفەراداعى زياندى گازداردىڭ كولەمىن جىلىنا 230 مىڭ تونناعا ازايتۋعا مۇمكىندىك بەرەدى.
–قازىرگى تاڭدا ەكىنشى كەشەندە قۇرىلىس-مونتاجداۋ جۇمىستارى جۇرگىزىلۋدە. مۇندا ارقايسىسىنىڭ قۋاتى 3,3 مۆ, قۋاتتىلىق رەجيمى 3,45 مۆ بولاتىن «ۆەستوس» كومپانياسىنىڭ 15 جەل ەلەكتر ستانتسياسى بوي تۇزەيدى. قازىر 10 كيلوۆولتتىق ستانتسيا سالىندى. بۇدان بولەك, قويما, گاراج, ديسپەتچەرلىك باسقارۋ ءپۋلتى بار اكىمشىلىك-شارۋاشىلىق كەشەن ءتارىزدى نىساندار قۇرىلىسى دا اياقتالدى. جەل تۋربينالارىن ءوندىرۋشى «ۆەستوس» كومپانياسى وسى سالاداعى الەمدىك كوشباسشى. نىسان قۇرىلىسىنا شەتەلدىك جانە وتاندىق ماماندار جۇمىلدىرىلعان. وندىرىلگەن ەلەكترەنەرگياسى «KEGOC» اكتسيونەرلىك قوعامىنىڭ ەلەكتر جەلىلەرى ارقىلى بارشا رەسپۋبليكا اۋماعىنا تارالادى,–دەيدى «تساتەك green energy» سەرىكتەستىگىنىڭ باس ينجەنەرى ۆلاديسلاۆ گاربوۆسكي.
توتەنشە جاعداي رەجيمى جوبانىڭ جۇزەگە اسىرىلۋ مەرزىمىنە كەرى ىقپال ەتىپ وتىر. نىسان جوسپارلى ۋاقىتتان 6 اي مەرزىمگە كەشىگىپ ىسكە قوسىلۋى مۇمكىن. نىساننىڭ ىسكە قوسىلۋى قازاقستاننىڭ اتموسفەراعا ۋلى گازداردىڭ ءبولىنۋىن ازايتۋ جونىندەگى حالىقارالىق قاۋىمداستىق الدىنداعى مىندەتتەمەسىن ورىنداۋىنا سەبەپكەر بولماق. جەل ەلەكتر ساتانتسياسى تولىق قۋاتىنا كوشكەن سوڭ جىلىنا مەملەكەت قازىناسىنا 2 ملرد تەڭگە سالىق تولەيدى.
ء–بىز باس مەردىگەر رەتىندە 19 شاقىرىم جول قۇرىلىسىن جۇرگىزدىك. قۇرال-جابدىقتى ساقتاۋ قويمالارى, جۇمىس الاڭدارى ازىرلەندى. جەل تۋربينالارىنا ارنالعان 15 تاعان تارتىلدى. ولاردىڭ ارقايسىسىندا 75 توننا ارماتۋرا مەن 550 جوعارى ساپالى بەتون شەڭبەرى بار. بۇل جۇمىستىڭ بارلىعى جەلدى, دالالى ايماقتا اتقارىلدى,–دەيدى «سرەدازەنەرگوستروي» كومپانياسىنىڭ باس ينجەنەرى يۆان ديومين.
ەكولوگيالىق تيىمدىلىگىمەن قاتار, جەل ستانتسياسىنىڭ قۇرىلىسى 300 جۇمىس ورنىن ۇسىنىپ وتىر. نىسان قولدانىسقا ەنگىزىلگەن سوڭ مۇندا 19 مامان قىزمەت اتقارادى. جوسپار بويىنشا 2-ءشى كەشەن 4-ءشى توقساندا قولدانىسقا ەنگىزىلەدى دەپ كۇتىلۋدە. ايتا كەتەلىك, قۋاتى 50 مۆ-تى قۇرايتىن نىساننىڭ ءبىرىنشى كەشەنى وتكەن جىلدىڭ 26 تامىزىندا قولدانىسقا ەنگىزىلگەن بولاتىن.
اقمولا وبلىسى