نەگىزى ۇبت-عا ءوتىنىش قابىلداۋ مەرزىمى 10 مامىردا اياقتالدى. دەگەنمەن دە ءبىلىم جانە عىلىم مينيسترلىگى ەكى ءتۇرلى ساناتتاعى تالاپكەرگە 15 مامىرعا دەيىن ءوتىنىش بەرۋگە بولاتىنىن ايتادى.
ولاردىڭ ءبىرى – قازاقستان رەسپۋبليكاسىنىڭ ازاماتى بولىپ تابىلمايتىن ۇلتى قازاق تالاپكەر, ەكىنشىسى – شەتەلدە وقۋ ورنىن بىتىرگەندەر. بيىل العاش رەت ۇبت-عا ءوتىنىشتىڭ باسىم بولىگى ونلاين-رەجىمدە قابىلداندى. ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆتىڭ ايتۋىنشا, قابىلدانعان وتىنىمدەر سانى بۇرىنعىمەن سالىستىرعاندا رەكوردتىق كورسەتكىشكە جەتكەن. وعان ونلاين-رەجىمدە قۇجات قابىلداۋ ىقپال ەتىپتى.
«بيىل تۇلەكتەردىڭ 82%-ى ۇبت-عا قاتىسۋعا نيەت ءبىلدىردى. تالاپكەرلەر سانى جىل سايىنعى 70%-دىق كورسەتكىشتەن اسىپ ءتۇستى. ونلاين فورماتتىڭ ارتىقشىلىعى كوپ. ەڭ باستىسى, مەكتەپ تۇلەكتەرىنە تولىقتاي ەركىندىك بەرىپ وتىر. وكىنىشكە قاراي وسى ۋاقىتقا دەيىن مەكتەپ اكىمشىلىگى تاراپىنان ۇلگەرىمى تومەن وقۋشىلاردىڭ تەستىلەۋدى تاپسىرۋ مۇمكىندىگىن شەكتەۋ فاكتىلەرى ورىن العان. ەندى بۇل ماسەلە شەشىلدى», دەدى د.سماعۇلوۆ.
مينيسترلىكتىڭ مالىمدەۋىنشە, ۇبت-عا 131 471 ادامنان ءوتىنىش تۇسكەن, ونىڭ ىشىندە 111 017-ءسى – مەكتەپتى بيىل بىتىرگەندەر, 20 454-ءى – كوللەدج جانە بۇرىنعى مەكتەپ تۇلەكتەرى. ۇبت-عا قاتىسۋعا 100 مىڭنان اسا ءوتىنىش ونلاين قابىلداندى.
مەكتەپتى بيىل ءبىتىرىپ, ۇبت-دا ەڭ جوعارى 140 ۇپايدى ءادىل جيناعان ءار تۇلەككە سوڭعى مودەلدەگى نوۋتبۋك سىيعا تارتىلماق. ال تەستىلەۋگە كىرگىزۋ كەزىندە زاڭسىز زات تابىلعان تالاپكەر تەستىلەۋگە جىبەرىلمەيدى جانە وسى جىلى ۇبت تاپسىرۋ مۇمكىندىگىنەن ايىرىلادى. ۇبت اياقتالعاننان كەيىن كۇنتىزبەلىك جىلدىڭ 25 تامىزىنا دەيىن بەينەباقىلاۋ جازبالارى تالدانادى. تالاپكەردىڭ تىيىم سالىنعان زاتتاردى پايدالانعانى انىقتالسا, ونىڭ ۇبت جانە ءبىلىم بەرۋ گرانتىن تاعايىنداۋ كونكۋرسىنىڭ ناتيجەلەرى جويىلادى.