شۆەد پروفەسسورى وكە سەلستروم باستاعان بۇۇ-نىڭ حيميالىق قارۋ جونىندەگى ساراپشىلار توبى داماسكىگە قايتىپ ورالدى.
ەسكە سالا كەتسەك, ساراپشىلار الەپپو جانە يدليب پروۆينتسيالارىندا حيميالىق قارۋ قولدانىلعانى تۋرالى مالىمدەمەنى تەرگەۋ ءۇشىن تامىز ايىنىڭ ەكىنشى جارتىسىندا سيريادا بولعان ەدى. بىراق 21 تامىزدا داماسك تۇبىندە حيميالىق قارۋ قولدانىلدى دەگەن حاباردان كەيىن ساراپشىلار سول جەرگە بارىپ, سودان سوڭ بايانداما دايىنداۋ ءۇشىن ەلدەن كەتكەن بولاتىن. ەندى ولار داماسك تۇبىندە زارين گازى بار قارۋدىڭ قولدانىلعانىن راستاپ وتىر. رەسەي بولسا ساراپشىلار حيميالىق قارۋ قولدانۋدىڭ بارلىق جاعدايلارىن جەتە زەرتتەۋى ءتيىس دەگەن تالاپ قويۋدا.
ساراپشىلار داماسكىگە قايتا ورالدى
شۆەد پروفەسسورى وكە سەلستروم باستاعان بۇۇ-نىڭ حيميالىق قارۋ جونىندەگى ساراپشىلار توبى داماسكىگە قايتىپ ورالدى.
ەسكە سالا كەتسەك, ساراپشىلار الەپپو جانە يدليب پروۆينتسيالارىندا حيميالىق قارۋ قولدانىلعانى تۋرالى مالىمدەمەنى تەرگەۋ ءۇشىن تامىز ايىنىڭ ەكىنشى جارتىسىندا سيريادا بولعان ەدى. بىراق 21 تامىزدا داماسك تۇبىندە حيميالىق قارۋ قولدانىلدى دەگەن حاباردان كەيىن ساراپشىلار سول جەرگە بارىپ, سودان سوڭ بايانداما دايىنداۋ ءۇشىن ەلدەن كەتكەن بولاتىن. ەندى ولار داماسك تۇبىندە زارين گازى بار قارۋدىڭ قولدانىلعانىن راستاپ وتىر. رەسەي بولسا ساراپشىلار حيميالىق قارۋ قولدانۋدىڭ بارلىق جاعدايلارىن جەتە زەرتتەۋى ءتيىس دەگەن تالاپ قويۋدا.
ءزىلزالا قۇرباندارىنىڭ سانى وسە تۇسۋدە
پاكستانداعى قۋاتتى جەر سىلكىنىسىنەن قۇربان بولعاندار سانى 246-عا جەتىپ, 400-دەي ادام زارداپ شەككەن. جاراقاتتانعانداردى ورنالاستىرۋعا اۋرۋحانالاردا ورىن جەتپەي جاتقانى دا بەلگىلى بولىپ وتىر.
تەربەلىسى 7,7 بالدى قۇرايتىن قۋاتتى جەر سىلكىنىسى تاياۋدا بەلۋدجيستان پروۆينتسياسى اۋماعىندا ورىن العان بولاتىن. ءزىلزالا وشاعى 20 شاقىرىم تەرەڭدىكتە بولعان كورىنەدى. جەر سىلكىنىسى سالدارىنان بەلۋدجيستاننىڭ التى وكرۋگى زارداپ شەككەن. قازىرگى ۋاقىتتا قۇتقارۋشىلارعا اسكەريلەر مەن شەكاراشىلار كومەككە جىبەرىلدى. اۋىر جاراقات العاندار تىكۇشاقپەن كورشى اۋدانداردىڭ اۋرۋحانالارىنا جونەلتىلۋدە.
كەنيادا بريتاندىق ازامات ۇستالدى
كەنيانىڭ استاناسى نايروبيدە ۇلىبريتانيا ازاماتى قاماۋعا الىنعان. ول تۋرالى بريتاندىق سىرتقى ىستەر مينيسترلىگىنە سىلتەمە جاساي وتىرىپ, ۆۆس News اگەنتتىگى حابارلادى.
قازىرگى ۋاقىتتا اتالعان ۆەدومستۆو وعان كونسۋلدىق كومەك كورسەتۋ ءۇشىن قولعا تۇسكەن اداممەن بايلانىس ورناتۋعا تالپىنۋدا. دجومو كەننياتى ەسىمدى 35 جاسار ەر ادام كەنيادان كەتەيىن دەپ جاتقان جەرىندە حالىقارالىق اۋەجايدا ۇستالعان كورىنەدى. بريتاندىقتىڭ ۇستالۋى جەرگىلىكتى ساۋدا ورتالىعىندا بولعان تەررورلىق اكتىنى تەرگەۋگە بايلانىستى ەكەنى دە بەلگىلى بولىپ وتىر. سودىرلار ۇيىمداستىرعان تەررورلىق اكت سالدارىنان 60-تان استام ادام قازا تاپقان بولاتىن.
بەرلۋسكونيدىڭ ۇيلەنۋى مۇمكىن بە؟
يتاليانىڭ بۇرىنعى پرەمەر-ءمينيسترىنىڭ قازىرگى ناقسۇيەرى فرانچەسكا پاسكالە ساياساتكەرگە تۇرمىسقا شىعۋعا دايىن جانە ونىڭ تۇپكىلىكتى شەشىمىن كۇتۋدە.
فرانچەسكا پاسكالە بەرلۋسكونيدەن جارتى عاسىرعا جۋىق كىشى. قىزدىڭ جاسى 28-دە بولسا, «قارتايمايتىن» سيلۆيو تاياۋداعى جەكسەنبىدە 77-گە تولادى. سونىمەن بىرگە, قىز ەكى اراداعى قارىم-قاتىناسقا ءوزىنىڭ باستاماشى بولعانىن, 2006 جىلى ساياساتكەرگە تەلەفون نومىرلەرىن الماسۋ جونىندە ۇسىنىس ايتقانىن دا جاسىرىپ وتىرعان جوق. جاس قىزدىڭ ءوز ومىرىندە ەلەۋلى ورىن الاتىنىن بەرلۋسكونيدىڭ ءوزى دە جاسىرمايدى. پاسكالە سوڭعى جىلدارداعى ەڭ ءبىر اۋىر كەزەڭدەردە مەنىڭ قاسىمدا بولىپ, مەنى شىنايى ايەل ماحابباتىنىڭ بولاتىنىنا سەندىردى, دەپ اتاپ وتكەن ول.
كورولگە وپەراتسيا جاسالدى
يسپانيا كورولى حۋان كارلوس ءى ءۇشىنشى رەت سول جاق مىقىنىنىڭ بۋىنىن اۋىستىرۋعا ءماجبۇر بولعان. سوڭعى ءۇش جىلدا ول وسىمەن سەگىزىنشى وپەراتسيانى باستان وتكە ءرىپ وتىر.
بۋىندى اۋىستىرۋ وپەراتسياسىن اقش-تان ارنايى ۇشىپ كەلگەن حيرۋرگ ميگەل كابانەلا جاساعان كورىنەدى. «باقىتىمىزعا قاراي, ونىڭ مارتەبەسى ءۇشىن دە, ءبىز ءۇشىن دە, ەل ءۇشىن دە ءبارى ءساتتى اياقتالدى», دەپ مالىمدەگەن دارىگەر ءباسپاسوز ءماسليحاتىندا. سونىمەن بىرگە, م.كابانەلا ۋاقىتشا سالىنعان بۋىندى ەكى ايدان كەيىن تۇراقتى ورنىعاتىن بۋىنعا اۋىستىرۋعا تۋرا كەلەتىنىن, ال كورولدىڭ ەكىنشى وپەراتسيادان كەيىن التى اپتادان سوڭ عانا جۇرە الاتىنىن اتاپ كورسەتكەن.
سابيلەردىڭ اجالىنا نە سەبەپ؟
شىعىس قىتايداعى تسزيانسي پروۆينتسياسىنىڭ اكىمشىلىك ورتالىعى نانچان قالاسىنىڭ پوليتسياسى اعايىندى ەكى قىزدىڭ كىر جۋاتىن ماشينانىڭ بارابانىندا قازا بولۋىنا بايلانىستى ءىستى تەرگەۋدە.
اتا-انالارىنىڭ ايتۋلارىنا قاراعاندا, ەكى جانە ءۇش جاستاعى اعايىندى قىزدار وتكەن سەنبى كۇنى ويناپ ءجۇرىپ كىر جۋاتىن ماشينانىڭ بارابانىنا كىرىپ, سونىڭ ىشىندە تۇنشىعىپ ولگەن. دەگەنمەن وسى تۋرالى حاباردار بولعان ينتەرنەت پايدالانۋشىلار بارابانىندا اۋىر جۇك بار اۆتومات-ماشينانىڭ جۇمىس ىستەپ كەتۋىنە كۇمان كەلتىرۋدە. ازىرگە قايعىلى وقيعانىڭ ناقتى سەبەبى بەلگىسىز كۇيىندە قالىپ وتىر.
مەكسيكادا جاعداي ۋشىعىپ تۇر
مەكسيكاداعى جاعداي كۇن وتكەن سايىن ناشارلاي تۇسۋدە. ەلدىڭ 14 شتاتىندا توتەنشە جاعداي ەنگىزىلىپ وتىر. سۋ تاسقىنىنان قۇربان بولعاندار سانى 130-عا جەتىپ, 30 ادام حابار-وشارسىز كەتكەندەر تىزىمىندە تۇر.
تاسقىننىڭ سىرتىندا «ينگريد» جانە «مانۋەل» تسيكلوندارى لاي كوشكىنىن تۋعىزۋدا. الپىس مىڭعا تارتا ادام ەلدىڭ قاۋىپتى اۋداندارىنان كوشىرىلدى. قۇتقارۋشىلار ءالى كۇنگە دەيىن قازا بولعانداردىڭ دەنەلەرىن ارشىپ الۋدا. ءتىرى قالعانداردى تابۋعا دەگەن ءۇمىت بارعان سايىن ازايا تۇسۋدە. زارداپ شەككەن قالالار مەن پوسەلكەلەردى قالپىنا كەلتىرۋ جۇمىستارى جارتى جىلعا سوزىلادى دەگەن بولجامدار ايتىلۋدا. ەلدە تابيعات اپاتىنا قوسىمشا تىرىسقاق اۋرۋى دا بوي كورسەتە باستاعان.
پىلدەردى ۋلاپ ءولتىردى
زيمبابۆە ۇلتتىق تابيعي پاركىنىڭ باسشىلىعى ەلدەگى ەڭ ءىرى سانالاتىن حۆانگە رەزەرۆاتىندا 81 ءپىلدىڭ تسياندى كاليگە ۋلانىپ ولگەنى تۋرالى حابارلاعان.
ەلدىڭ تابيعات قورعاۋ اگەنتتىگىنىڭ قىزمەتكەرى دجەرري گوتورا ءولىم قۇشقان پىلدەر جايىلاتىن جەردە التىن وندىرەتىن ونەركاسىپتە پايدالانىلاتىن ءتسيانيدتىڭ تابىلعانىن مالىمدەگەن. بۇعان دەيىن بەلگىلى بولعان مالىمەتتەرگە سايكەس, ۋلى زات پىلدەر سۋ ىشەتىن سۋ كوزدەرىندە دە بولعان كورىنەدى. بۇل ىسكە براكونەرلەردىڭ قاتىسى بولۋى مۇمكىن دەگەن كۇدىك تە جوق ەمەس. قىركۇيەكتىڭ باسىندا 40 ءپىلدى تسياندى كاليمەن ۋلاپ ءولتىردى دەگەن كۇدىكپەن 40 ادام تۇتقىنعا الىنعان بولاتىن.
ينتەرنەت ماتەريالدارى نەگىزىندە ازىرلەندى.