سولتۇستىك قازاقستان وبلىسىنىڭ پوليتسەيلەرى 60 تونناعا جۋىق استىق ءدانىن ۇرلاعان ۇرىلاردىڭ ءىزىن كەستى, – دەپ حابارلايدى Polisia.kz.
سولتۇستىك قازاقستان وبلىسىنىڭ ساقشىلارى ءساۋىردىڭ 27-نەن باستاپ «استىق» جەدەل-پروفيلاكتيكالىق ءىس-شاراسىن وتكىزىپ جاتىر. اۋىل شارۋاشىلىعى كاسىپورىندارىنداعى م ۇلىكتەردىڭ ۇرلىعىن ءىزىن سۋىتپاي اشۋ جانە ونى بولدىرماۋ ماقساتىندا اۋدانداردا موبيلدىك توپتار قۇرىلدى. ولار قاراڭعى تۇسە اينالما جولدار مەن دالالى جەرلەردەگى جولداردى باقىلايدى, اۋىل شارۋاشىلىق ونىمدەرىن تاسىمالداۋمەن اينالىساتىن جۇرگىزۋشىلەردىڭ قولدارىنداعى قۇجاتتاردى تەكسەرەدى. پروفيلاكتيكالىق ءىس-شارا باستالعانعا دەيىن ءار اۋداندا اگراريلەرمەن كەزدەسۋلەر وتكىزىلدى. كەزدەسۋلەر كەزىندە كاسىپورىنداردىڭ تەحنيكالىق نىعايتىلۋى جانە قاۋىپسىزدىك قىزمەتتەرىنىڭ پوليتسەيلەرمەن ءىس-قيمىل جاساۋى تالقىلاندى.
ايتا كەتەتىن بولساق, ءوزارا ءىس-قيمىل جاساۋ جامبىل اۋدانىنداعى جشس بىرىنەن استىق ۇرلىعىن اشۋدا ماڭىزدى كومەك بولدى. 30 ساۋىردە وندا سەبۋگە دايىنداپ قويعان تۇقىمنىڭ 59 تونناسى جەتپەيتىنى انىقتالعان.
كەلتىرىلگەن شىعىن 6 ملن تەڭگەدەن استام. اۋداندىق پب باسشىسى اسان قايداروۆ حابارلاعانداي, جەدەل-تەرگەۋ توبى وقيعا ورنىنا دەرەۋ جەتكەن, سول كەزەڭدە كاسىپورىننىڭ كۇزەتشىلەرى 27 ساۋىرگە قاراعان ءتۇنى بەينەكامەرالاردى ءسوندىرۋ فاكتىسىن انىقتاعان. بۇل بىردەن پوليتسەيلەردىڭ جۇمىستى ءتيىستى باعىتتا جۇرگىزۋىنە سەپتىگىن تيگىزدى. سول كۇنى كۇدىكتىلەر انىقتالدى: ولار 1964, 1965 جانە 1989 جىلدارى تۋعان جشس جۇمىسشىلارى مەن 56 جاستاعى جەرگىلىكتى كاسىپكەر بولىپ شىقتى.
سوڭعىسى ۋاقىتشا ۇستاۋ يزولياتورىنا قامالىپ, كەيىن كەپىلدىكپەن بوساتىلعان. قالعاندارىنا قاتىستى مىندەتتى تۇردە كەلۋ تۇرىندەگى بۇلتارتپاۋ شاراسى تاڭدالدى. قر قىلمىستىق كودەكسىنىڭ 188-بابىنىڭ 4-بولىگى (ۇرلىق) بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. تۇقىم تيەلگەن ءۇش «كاماز» اۆتوكولىگى الىنىپ, ۇرلانعان استىق يەسىنە قايتارىلدى.