بۇگىن وسكەمەن قالاسى اكىمدىگى, ىشكى ساياسات, مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن وتكەن ۇلى ابايدىڭ 175 جىلدىق مەرەيتويى اياسىندا جاريالانعان «ولەڭ – ءسوزدىڭ پاتشاسى» اتتى رەسپۋبليكالىق ونلاين ءمۇشايراسى ءوز مارەسىنە جەتتى.
جاس اقىنداردىڭ ونلاين ءمۇشايراسىنا ولەڭدەر 15 ءساۋىر – 5 مامىر ارالىعىندا قابىلدانعان بولاتىن. جىر دوداسىنا 18 بەن 35 جاس ارالىعىنداعى 130-دان استام جاس اقىننان ولەڭدەر كەلىپ تۇسكەن.
جاس بۋىننىڭ تالانتى مەن تالعامىنا, پوەتيكالىق قارىمى مەن قۋاتىنا اقىن, حالىقارالىق «الاش» ادەبي سىيلىعىنىڭ لاۋرەاتى جانات اسكەربەكقىزى; اقىن باۋىرجان باباجان ۇلى وتەۋليەۆ; اقىن الىبەك شەگەباي; اقىن, ماحامبەت سىيلىعىنىڭ يەگەرى باقىتگۇل باباش; اقىن, «دارىن» مەملەكەتتىك جاستار سىيلىعىنىڭ لاۋرەاتى قالقامان سارين قازىلىق ەتتى.
حاكىم ابايدىڭ مەرەيتويى قارساڭىندا ونلاين وتكەن ولەڭ بايگەسى كوپتەگەن جاس اقىنداردىڭ قالامالىستارىن بايقاتتى. وسى ورايدا: «ەسىمدەرى تانىلىپ, ولەڭدەرى قازاق پوەزياسىنىڭ كوڭىل قۋانتارلىق تۋىندىسىنا اينالىپ ۇلگىرگەن ساقا اقىندار مەن پوەزيا بايگەسىنە كەلىپ قوسىلعان جاس اقىنداردىڭ جىرلارىنا قۋاندىق. جاڭا ەسىمدەر جارقىراپ كورىنسە ەكەن, قازاق پوەزياسىنان ءوز ورىندارىن الىپ ۇلگەرگەن اقىندارىمىز ىزدەرىن باسىپ, وزدەرىن وكشەلەپ كەلە جاتقان بۋىننىڭ تىنىسىن سەزىپ, ولەڭ ءسوزدىڭ ولمەيتىنىنە بەك سەنىمدى بولسىن دەگەن نيەتپەن جاستاردىڭ «ىشىندەگى جاستارىنا» بارىنشا قولداۋ ءبىلدىرۋدى ماقسات ەتتىك», دەيدى ۇيىمداستىرۋشىلار.
سونىمەن اتالعان ءمۇشايرادا تومەندەگى تالانتتى اقىندار ۇزدىك دەپ تانىلدى.
ءبىرىنشى ورىن: داۋرەن تىلەۋحان (700 مىڭ)ەكىنشى ورىن : ەربولات قۋاتبەك, تاسقىن بولات ۇلى (ارقايسىسى 500 ءمىڭنان)ۇشىنشى ورىن: اينۇر تولەۋ, ءبىرجان احمەر, قۋانىش ەركىن ۇلى (ارقايسىسى 300 مىڭنان)
ارناۋلى سىيلىق:نۇرلان ماۋكەن ۇلى اتىنداعى سىيلىق – ميراس اسان (200 مىڭ)باۋىرجان ۇسەنوۆ اتىنداعى سىيلىق – مەرەي قارت (200 مىڭ)امانحان ءالىم ۇلى اتىنداعى سىيلىق – اسىلبەك جاڭبىرباي (200 مىڭ)سەرىك عابدۋللين اتىنداعى سىيلىق – باۋىرجان القوجا (200 مىڭ)عالىم بايباتىروۆ اتىنداعى سىيلىق – جانات جاڭقاش ۇلى (200 مىڭ)حاميت بالشابەكوۆ اتىنداعى سىيلىق – راۋان قابيولدين (200 مىڭ)