كىتاپحاناشىلار تاقىرىبى: جەڭىسكە تاعزىم

ۇلى وتان سوعىسىندا ەرلىكپەن قازا تاپقان ارداگەرلەردى ەسكە الىپ, وسكەلەڭ ۇرپاقتى رۋحاني, ادامگەرشىلىك جانە پاتريوتتىق رۋحتا تاربيەلەۋدىڭ نەگىزگى فاكتورلارى رەتىندە قوعامدىق تاتۋلىققا ەرەكشە ءمان بەرۋدى ماقسات تۇتقان ونلاين-مارافون ۇلتتىق اكادەميالىق كىتاپحاناسىنىڭ باسشىسى ءۇمىتحان مۇڭالباەۆانىڭ مودەراتورلىعىمەن ءوتتى.

ء–بىزدىڭ حالقىمىزدىڭ مايدانداعى وراسان زور كۇش-جىگەرىنىڭ, تىلداعى ەرلىكتەرىنىڭ ارقاسىندا ۇلى جەڭىس كۇنىنە جەتتى. قازاقستان حالقىنىڭ دا وسى ءبىر ءومىردىڭ قاتال ەمتيحانىنا توتەپ بەرگەنىن ماقتان تۇتا ايتا الامىز. بۇل سوعىسقا ءبىر جارىم ميلليون قازاقستاندىقتار قاتىستى. ادامداردىڭ جۇرەگىندە وتان قورعاۋشىلارعا دەگەن قۇرمەت ارقاشان ءومىر ءسۇرۋى كەرەك, – دەپ ءسوز باستاعان جيىن مودەراتورى سۇم سوعىستىڭ ۇلت تاريحىنداعى ماڭىزىنا توقتالدى.

ونلاين-كەزدەسۋگە قاتىسقان رەسەي مەملەكەتتىك كىتاپحاناسىنىڭ برەند-مەنەدجەرى ناتاليا شكۋدنوۆا 75 جىلدىقتىڭ قارساڭىندا جاسالىپ جاتقان جۇمىستارىمەن ءبولىسىپ:  

– ۇلى جەڭىستىڭ 75 جىلدىعىنا وراي «كىتاپحانا ءتۇنى. ءبىزدىڭ جەڭىسىمىزدىڭ ەستەلىگى» اتتى جوبانى قولعا الدىق. بۇل جوباعا قازاقستاندىقتار دا قاتىستى. ءاربىر قاتىسۋشى ۇلى وتان سوعىسى تاقىرىبىندا شىعارمالار وقىپ, ۆيدەوروليكتەرىن الەۋمەتتىك جەلىلەردە جاريالادى. 4000-نان استام كىتاپحانالاردان ءارتۇرلى جۇمىستار كەلىپ ءتۇستى. جالپى ونلاين مارافونعا 40 000-استام ادام قاتىستى. سونداي اق, ولەڭ وقىپ جولداعان بالالار دا بولدى, – دەدى.

تاريحى تەرەڭنەن تامىر تارتاتىن ۇلتتىق كىتاپحانا قىزمەتكەرلەرىنىڭ باسىم بولىگى مايدانعا اتتانىپتى. اتاپ ايتساق, اعايىندى احمەتوۆتەر, يۆان ۆاندارەنكو, ۆلاديمير ماحاۆيكوۆ, كىتاپحانا ديرەكتورى مۇحتار جانعالين بار. بارلىعى 20 ادام بولعان: ونىڭ ىشىندە 10-ى قىز بالا. بۇل تۋرالى ۇلتتىق كىتاپحانا ديرەكتورى باقىتجامال وسپانوۆا ايتتى. سونداي-اق:

– سوعىس جىلدارىندا ءبىزدىڭ كىتاپحانانىڭ وقۋ زالىندا تولستوي, ۋسپەنسكي, ماشاك, ابريكوسوۆ, چەركاسوۆتار جۇمىس ىستەگەن. بۇل كىسىلەر كەڭەس وداعىنىڭ ەرەكشە تالانتتى, شىعارماشىل تۇلعالارى بولاتىن. الماتىدا «يۆان گروزنىي» ءفيلمى تۇسىرىلگەنى جونىندە ۇلتتىق كىتاپحانانىڭ سيرەك كىتاپتار جانە قولجازبالار بولىمىندە ەيزەنشتەيننىڭ فيلم تۇسىرىلىمىنەن سوڭ تۇسكەن 8 سۋرەت سالعان داپتەرى ساقتاۋلى تۇر. مۇندا ارتىستەردىڭ كيىمى, باس كيىمى, اياق كيىمى قالاي بولۋى كەرەكتىگى جازىلعان. بۇل داپتەرلەردى سول كەزدە رەجيسسەردەن كىتاپحانا ديرەكتورى 1300 رۋبلگە ساتىپ العان ەكەن, – دەپ ءسوزىن جالعادى.

شىعىس قازاقستان وبلىسىنىڭ 109 تۇرعىنى «كەڭەس وداعىنىڭ باتىرى» اتاعىن العانى تۋرالى بايانداعان ا.پۋشكين اتىنداعى شىعىس قازاقستان وبلىستىق كىتاپحانانىڭ ديرەكتورى بيبىگۇل شاگيەۆا:

- كەيىنگى ولكەتانۋشىلار بۇرىن كوتەرىلمەگەن تاقىرىپتار اياسىندا زەرتتەۋ جۇمىستارىن جۇرگىزىپ جاتىر. ءاربىر ۇلى وتان سوعىسىنا قاتىسقان باتىر تۋرالى بيبليوگرافيالىق زەرتتەۋ جيناقتالۋدا. بۇل بازادا زەرتتەۋ جۇمىستارى جۇرگىزىلىپ, جاڭا تىڭ اقپاراتتارمەن تولىقتىرىلۋدا. سوعىسقا جىبەرىلگەن 10 وق-ءدارىنىڭ 9-ى وسكەمەن قالاسىنداعى زاۆودتاردان شىعارىلعان.  باتىرلارىمىزدىڭ انالارى, جۇبايلارى, ءتىپتى, بالالارى دا ءبىر كىسىدەي جۇمىلىپ, ەگىن القاپتارىندا, جۇمىسشى كۇش قاجەت ەتىلگەن ءوندىرىس ورىندارىندا  قىزمەت ەتكەن, – دەپ وي تارقاتتى.

كەزدەسۋ بارىسىندا ۇاك قورلارىنداعى سوعىس تۋرالى كىتاپتار مەن سوعىس جىلدارىنداعى كىتاپحانالاردىڭ تاريحى تۋرالى قىزىقتى دەرەكتەر قامتىلىپ, كىتاپ كورمەسى ۇيىمداستىرىلدى. اتالعان كونفەرەنتسيا قازاق جانە ورىس تىلدەرىندە ءوتتى. شارا سوڭىندا ونلاين قاتىسۋشى قوناقتار «تىرنالار» ءانىن بىرگە شىرقادى.