قۇرمانعازى اۋدانىندا برويلەر ەتىن وندىرەتىن قۇس فابريكاسىنىڭ جۇمىسى جاندانا باستادى. وسى كەزگە دەيىن جالپى كولەمى 30 توننادان اساتىن ءونىمنىڭ ءتورت پارتياسى تۇتىنۋشىعا جىبەرىلدى.
اۋدان ورتالىعىنان بەس شاقىرىم قاشىقتاعى «بۇيىرعىن» اتالاتىن جەردە جۇمىسىن باستاعان جاڭا جوبانى جەرگىلىكتى ەكى كاسىپكەر قارجىلاندىردى. ولار 2018 جىلدان بەرى قۇس فابريكاسىنىڭ جوباسىنا 300 ملن تەڭگە ينۆەستيتسيا سالدى. جۇمىسشىلارعا ارنالعان جاتاقحانا مەن اسحانا, ءۇش وندىرىستىك نىسان بوي كوتەردى. ەندى ءتورتىنشى نىساننىڭ قۇرىلىسى سالىنىپ جاتىر.
– قۇس جەمىن ۋفادان ساتىپ الامىز. توتەنشە جاعدايعا بايلانىستى ەلدى مەكەندەرگە ءونىم جەتكىزۋ قيىنداعان ەدى. بىراق, بۇل ماسەلە جەرگىلىكتى بيلىكتىڭ قولداۋىمەن وڭ شەشىمىن تاپتى. ءبىز قازىر 500-600 گرامم سالماق قۇرايتىن بالاپان ءوسىرۋدى جولعا قويدىق. سونداي-اق, سالماعى 1,5 كيلولىق تاۋىق جانە 3,5 كيلو بولاتىن برويلەر ەتىن ءوندىرۋدى جانداندىردىق, -دەيدى «بۇيىرعىن» اۋىل شارۋاشىلىعى وندىرىستىك كووپەراتيۆىنىڭ توراعاسى گۇلنار ومارعاليەۆا.
ونىڭ ايتۋىنشا, قازىر قۇس فابريكاسىندا ۆاحتالىق اۋىسىممەن جەرگىلىكتى جەردىڭ 43 ادامى جۇمىس ىستەيدى. مەملەكەت تاراپىنان جوباعا سالىنعان ينۆەستيتسيالىق قارجىنىڭ 25 پروتسەنتى كولەمىندە سۋبسيديا بەرىلىپ جاتىر. سونداي-اق, اگروسەكتوردى قارجىلاندىرۋ جۇيەسىمەن جىلدىق ءوسىمى 8 پروتسەنتتى قۇرايتىن نەسيە الىپتى. جوبا قۇرىلتايشىلارى ءوز قاراجاتى ەسەبىنەن گاز جانە ەلەكتر جەلىلەرىن جۇرگىزىپتى. ازىرگە سۋدى كولىكپەن تاسيدى. سول سەبەپتەن, ەندى سۋ قۇبىرىن تارتۋ كوزدەلىپ وتىر.