بۇل سۇراققا نۇر-سۇلتان قالاسى ءبىلىم باسقارماسىنىڭ باسشىسى شولپان قادىروۆا جاۋاپ بەردى. ءبارىمىز بىلەتىندەي, 2020 جىلدىڭ 18 ناۋرىزىنان باستاپ بارلىق مەكتەپكە دەيىنگى ءبىلىم بەرۋ ۇيىمدارى مەنشىك نىسانىنا قاراماستان ءوز قىزمەتىن توقتاتتى.
– بالاباقشا قىزمەتكەرلەرى مەن مەڭگەرۋشىلەرىنە ءوز قالاۋى بويىنشا اقىلى ەڭبەك دەمالىسى بەرىلدى. مەنشىك نىسانىنا قاراماستان بارلىق مەكتەپكە دەيىنگى ۇيىمدار توتەنشە جاعداي كەزەڭىندە مەملەكەتتىك تاپسىرىس بويىنشا قارجىلاندىرۋمەن تولىق قامتاماسىز ەتىلگەن.
مەكتەپ جاسىنا جەتكەن بالالاردى بالاباقشادان شىعارۋ جىل سايىن 1 تامىزعا دەيىن, سونداي-اق بالالاردى جاس ەرەكشەلىكتەرىنە بايلانىستى ءبىر توپتان كەلەسى توپقا اۋىستىرۋ اعىمداعى جىلعى 1-31 تامىز ارالىعىندا جۇزەگە اسىرىلادى. سونىمەن قاتار, قر-دا توتەنشە جاعداي رەجيمى مەن كارانتين ەنگىزىلۋىنە بايلانىستى مەكتەپكە دەيىنگى ۇيىمداردىڭ قىزمەتى توتەنشە جاعداي رەجيمى اياقتالعانعا دەيىن توقتاتىلدى, – دەدى ش.قادىروۆا.
اتالعان ۆەدومستۆو باسشىسىنىڭ ايتۋىنشا, باسقارما مەكتەپكە دەيىنگى ۇيىمدارداعى بوساعان ورىندار مەن تۇلەكتەردىڭ سانىنا مونيتورينگ جۇرگىزۋدە. جيناقتاۋ مەرزىمى تۋرالى شەشىم توتەنشە جاعداي رەجيمى الىنعاننان كەيىن قابىلدانادى.
مەكتەپكە دەيىنگى ۇيىمدار ءوز جۇمىسىن باستاۋ ءۇشىن دەنساۋلىق ساقتاۋ مينيسترلىگى وبەكتىلەردى پايدالانۋعا بەرۋ ءتارتىبى مەن ەرەجەلەرىن ازىرلەۋدە. بۇل قۇجاتتا وبەكتىلەردە سانيتارلىق-دەزينفەكتسيالىق رەجيمدى ساقتاۋ نورمالارى, سونداي-اق مەكتەپكە دەيىنگى بالالار ۇيىمدارىنىڭ كەزەكشى توپتارىنىڭ رەجيم الگوريتمى كورسەتىلەدى. بالاباقشالاردىڭ ناقتى قاي ۋاقىتتا جۇمىسىن باستايتىنى توتەنشە جاعداي اياقتالعاننان كەيىن بەلگىلى بولادى.