ء«بىز بىرگەمىز!» اكتسياسى اياسىندا وبلىستىق «77TV» تەلەارناسى توتەنشە جاعداي كەزىندە ەل نازارىن تابيعات انانىڭ تىلسىم سۇلۋلىعىمەن قانىقتىرۋ ماقساتىندا ەرەكشە يگى باستامانى قولعا العانى بەلگىلى.
اتاپ ايتقاندا, «77TV» ارناسى جامبىل وبلىسى وتان-وشاعى بولىپ سانالاتىن جابايى قىزعالداقتىڭ گۇلدەۋ كەزەڭىندە ەكو-تۋريزمگە ارنالعان ماتەريالداردى ءتۇسىرۋ بويىنشا فوتوەكسپەديتسياعا اقپاراتتىق قولداۋ كورسەتتى.
بۇل فوتوەكسپەديتسيا وبلىستىق تۋريزم باسقارماسىنىڭ ۇيىمداستىرۋىمەن جۋالى, قورداي, مەركى اۋداندارىندا وتكىزىلدى.
ماقساتى – جامبىل وبلىسىنىڭ تابيعي فلوراسى مەن فاۋناسى تۋرالى جوعارى ساپالى فوتوماتەريالدار دايىنداۋ جانە ءبىزدىڭ ايماقتىڭ ەرەكشەلىگى سانالاتىن قىزعالداقتاردى كەڭىنەن ناسيحاتتاۋ.
ءدال وسى فوتوماتەريالدار بولاشاقتا وڭىرىمىزگە تۋريستەردى تارتۋ ءۇشىن تۋريستىك كاتالوگتار, بروشيۋرالار, بۋكلەتتەر جانە باسقا دا جارنامالىق ماتەريالداردى دايىنداۋعا نەگىز بولماق.
تاريحى تەرەڭ, تابيعاتى سۇلۋ كيەلى جامبىل جەرىنىڭ جاۋقازىندارىن حالىقتىڭ نازارىنا ۇسىنۋ شاراسىنا جامبىل وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى, وبلىستىق «اق جول», «زناميا ترۋدا», «اراي» گازەتتەرى اتسالىستى.
التىنبەك قارتاباي