كىتاپ كارانتينگە قارسى...

كىتاپحانا سالاسىنىڭ بارلىق ماماندارى مەن عالىمدارعا ۇلتتىق قۇندىلىقتاردى ساقتاۋ, قولداۋ, رۋحاني-ادامگەرشىلىك جانە مادەني اسپەكتىلەردى, جاڭا ۆيرۋستىڭ پاندەمياسى كەزىندە كىتاپحانا جۇمىسىنىڭ باعىتىن ساقتاۋ ماسەلەلەرى بويىنشا پىكىرتالاستىق كەزدەسۋگە قاتىسۋعا مۇمكىندىك بەرۋ ءۇشىن اقپاراتتىق جانە عىلىمي-مادەني ونلاين-الاڭ قۇرۋ ماقساتىن دىتتەگەن فورۋم ءتۇرلى تاقىرىپتاردى تالقىعا سالدى.

ۇلتتىق اكادەميالىق كىتاپحاناسىنىڭ باسشىسى ءۇمىتحان داۋرەنبەكقىزىنىڭ مودەراتورلىعىمەن وتكەن ونلاين-فورۋمعا رەسەي فەدەراتسياسى (ماسكەۋ, سانكت-پەتەربۋرگ, ءنوۆوسىبىر), قىتاي حالىق رەسپۋبليكاسى, يتاليا, رۋمىنيا, بولگاريا, مالايزيا, تۇركيا, ياكۋتيا, چۋۆاش, وزبەكستان (حورەزم, بۇحارا, سامارقاند, دجيزاك, ناۋوي, ءاندىجان, سىرداريا, بوز, قاشقاداريا, نامانعان, اساقان, جالاقۇدىق, قورعانتەلى, قاراكول), ازەربايجان, قىرعىزستان, گرۋزيا, ۋدمۋرتيا, مولدوۆا مەملەكەتتەرىنىڭ ۇلتتىق كىتاپحانالارى مەن ەلىمىزدىڭ كىتاپحانالارى قاتىستى.

كونفەرەنتسيا مودەراتورى شارا قاتىسۋشىلارىنا العىس بىلدىرە وتىرىپ:

– ۇلى قازاق اقىنى, فيلوسوف, ويشىل اباي قۇنانباي ۇلى «تەگىندە ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق» دەدى. بۇل جوعارى قاسيەتتەر ءومىر بويى ادامزات جيناقتاعان ۇزدىك الەمدىك ادەبيەتتى وقۋ ارقىلى يە بولادى. بۇگىن الەمدى ۆيرۋس پاندەمياسى جاۋلاعان كەزدە, ادامدارعا ءوزىن-ءوزى دامىتۋ مەن ءوزىن-ءوزى جەتىلدىرۋگە كىتاپحانا مەن كىتاپتار العاشقى كومەكشىسى بولدى دەپ ايتۋعا تولىق سەبەپ بار. ويتكەنى, قازىر كارانتين كەزىندە بارشا ادامزات قاۋىمى جاپپاي كىتاپ وقۋعا كىرىسىپ كەتتى, – دەدى.

فورۋم بارىسىندا بايانداما جاساعان رەسەي مەملەكەتتىك كىتاپحاناسىنىڭ باس ديرەكتورى دۋدا ۆاديم ۆالەرەۆيچ كارانتين كەزىندەگى اتقارىلعان جۇمىستارىن اتاپ ءوتىپ, قاشىقتىقتان جۇمىس ىستەۋدىڭ ەرەكشە تاسىلىمەن ءبولىستى.

- ءبىز قورىمىزداعى قۇجاتتاردى وقىرماندارعا جەتكىزۋدە ءتيىمدى ءتاسىلدى قولداندىق. وقىرمان بەلگىلى ءبىر بولىمگە ءوتىنىم بەرگەن سوڭ, سول كىتاپ اۆتوماتتى تۇردە سكانەردەن وتكىزىلىپ, وقىرماننىڭ جەكە كابينەتىنە كەلىپ تۇسەدى. وسى تاسىلمەن كۇنىنە 700-800 كىتاپقا تاپسىرىس قابىلداپ, وقىرمانعا جەتكىزەمىز. سحەما بويىنشا جۇمىس ىستەگەن وتە ءتيىمدى دەپ تانىلىپ وتىر جانە ءتىپتى كارانتيننەن كەيىن دە وسى ءادىس ارقىلى جۇمىس ىستەۋدى جالعاستىرا بەرەمىز. وسى جۇيە ارقىلى تمد ەلدەرى اراسىنداعى ەلەكتروندى كىتاپحانالار بىرلەسىپ قىزمەت اتقارامىز دەپ سەنەمىز, – دەدى رەسەي مەملەكەتتىك كىتاپحاناسىنىڭ باس ديرەكتورى.

كىتاپحانانىڭ الەمدىك رۋحانياتقا بىردەن-ءبىر اسەر ەتۋشى فاكتور ەكەنىن ايتقان ريم (يتاليا) ۇلتتىق كىتاپحاناسى ديرەكتورىنىڭ حالىقارالىق بايلانىس جونىندەگى ورىنباسارى دەزيرە دە ستەفانو:

–سمارت جۇمىسىمەن بايلانىستى ماسەلەلەردى جەدەل شەشە العان IT-مامانداردىڭ اتقاراتىن ماڭىزدى جۇمىسى تۋرالى دا ۇمىتپايىق. كىتاپحاناشىلار رەتىندە ءبىز بارلىق ۋاقىتتا قولداۋ سۇراعان پايدالانۋشىلارىمىزعا جاۋاپ بەرۋگە تىرىستىق. ەندى كىتاپحانانى اشۋ جاقىنداعاندا, ءبىز جاڭا شەشىمدەردى تاۋىپ, جاڭا قاۋىپسىزدىك تالاپتارىن ەسكەرە وتىرىپ, جاڭا قىزمەتتەردى ويلاپ تابۋىمىز كەرەك. كىتاپحانا ءتىرى ورگانيزم رەتىندە وزدەرىن قايتا ويلاستىرۋى جانە ءبىزدىڭ الدىمىزعا وسى جاڭا جانە جاھاندىق جاعدايدى قوياتىن قاجەتتىلىكتەرگە جاۋاپ بەرۋى ءتيىس, – دەپ ويىن تارقاتتى.

مالايزيا ۇلتتىق كىتاپحاناسىنىڭ باس ديرەكتورى مايزان بينتي ءيسمايلدىڭ سوزىنشە, اتالعان كىتاپحانانىڭ ەلەكتروندى جۇيەسىندە 24 ميلليون كىتاپ ساقتالعان ەكەن. ەگەر وقىرمان ونلاين تاپسىرىس بەرسە, كىتاپتى ۇيىنە جەتكىزىپ بەرەدى. سونداي-اق, كارانتين كەزىندە كىتاپحاناعا 23 000 جاڭا وقىرمان تىركەلگەن ەكەن. بۇل, ارينە, مالايزياداعى كىتاپحاناعا دەگەن سۇرانىستىڭ جوعارىلىعىن كورسەتسە كەرەك.

«وقىتۋدان وقىماق جاقسى» دەپ وزبەك اقىنى ايتقانداي, اليشەر ناۋاي اتىنداعى وزبەكستان ۇلتتىق كىتاپحاناسى ءبولىم مەڭگەرۋشىسى مۋراتوۆا مۋحتاراما كارانتيندىك رەجىم ادامداردىڭ ينتەللەكتۋالدىق دەڭگەيىن كوتەرۋىنە تاپتىرماس مۇمكىندىك ەكەنىن تىلگە تيەك ەتتى.

ال ساحا رەسپۋبليكاسى ۇلتتىق كىتاپحاناسى كىتاپحانالىق-اقپاراتتىق قىزمەت ءبولىمىنىڭ مەڭگەرۋشىسى پوپوۆا سۆەتلانا الەكساندروۆنا:

- كىتاپحاناشىلاردىڭ بارلىعى تسيفرلىق قىزمەت كورسەتۋدە.  ەلەكتروندى كىتاپحانادا 33 مىڭ كىتاپ بار. جالپى قوردا 1000600 كىتاپ. ەلەكتروندىق جۇيەدەگى ستاتيستيكا بويىنشا ەڭ كوپ وقىلاتىن كىتاپتار قاتارىنا ياكۋتتىق اۆتورلاردىڭ شىعارمالارىن جاتقىزامىز. سوڭعى مالىمەت بويىنشا كوش باسىندا ن.ا.لۋگينوۆتىڭ ەڭبەكتەرى وقىرمان سۇرانىسىنا يە, – دەپ وقىرمان تالعامىنداعى اۆتورلاردى دا اتاپ ءوتتى.

الەمنىڭ 15 ەلىنەن بايانداماشىلار قاتىسقان حالىقارالىق كونفەرەنتسيا قازاق, ورىس جانە اعىلشىن تىلدەرىندە ءوتتى. ونلاين-فورۋمدا كىتاپحانالاردىڭ قاشىقتان جۇمىس رەجىمى, اقپاراتتىق قىزمەتتىڭ قۇقىقتىق اسپەكتىلەرى, بولاشاق ەلەكتروندىق كىتاپ, زاڭنامالىق پروبلەمالار مەن باستامالار, كارانتين كەزەڭىندە حالىقتىڭ ەلەكتروندىق جانە باسپا اقپاراتىنا قول جەتكىزۋىن قامتاماسىز ەتۋ ماسەلەلەرى اياسىندا كىتاپحانالىق-اقپاراتتىق ينفراقۇرىلىم مەن ارالاس وبلىستاردى دامىتۋ سالاسىنداعى سوڭعى جەتىستىكتەر مەن يننوۆاتسيالار جاريالاناتىن بولادى.