2020 جىلعى 29 ساۋىردە وتكەن «قازمۇنايگاز» ۇك اق ديرەكتورلار كەڭەسىنىڭ وتىرىسىندا جاڭا ۇيىمدىق قۇرىلىمدى بەكىتۋ تۋرالى شەشىم قابىلداندى. شەشىم كومپانيانىڭ قارجى جاعدايىن تۇراقتاندىرۋ جانە نارىقتىق فاكتورلاردىڭ جاعىمسىز ىقپالىن ازايتۋعا باعىتتالعان ءىس-شارالاردىڭ اياسىندا قابىلداندى. بۇل تۋرالى اتالعان كومپانيانىڭ جۇرتشىلىقپەن بايلانىس دەپارتامەنتى حابارلادى.
قمگ ورتالىق اپپاراتى ۇيىمدىق قۇرىلىمىنىڭ جاڭا جوباسى تومەندەگىلەردى قامتيدى:
-گەولوگيا, بارلاۋ جانە ءوندىرىس بولىكتەرىن بىرىكتىرۋ. سايكەسىنشە, باسقارما توراعاسىنىڭ گەولوگيا جانە بارلاۋ جونىندەگى ورىنباسارىنىڭ قىزمەتى قىسقارتىلدى;
-باسقارۋ دەڭگەيلەرىن ازايتۋ. ناتيجەسىندە 22 باسقارۋشى ديرەكتوردىڭ لاۋازىمدارى جويىلادى;
-دەپارتامەنتتەردىڭ سانىن ءۇش ەسە ازايتۋ.
-كورپوراتيۆتىك ورتالىقتىڭ قۇرىلىمى شاعىن ءارى جەدەل قيمىلداۋعا جانە بيزنەس ءۇشىن داعدارىس سالدارىن از شىعىنمەن ەڭسەرۋ ءۇشىن ءتيىمدى شەشىمدەر قابىلداي الاتىنداي بولۋى ءتيىس. داعدارىسقا قارسى ستراتەگيانى جۇزەگە اسىرۋعا باسا نازار اۋدارۋ ماقساتىمەن كوپتەگەن قىزمەت تۇرلەرىنەن باس تارتامىز جانە ەنشىلەس كومپانيالارمەن ىقپالداستىقتىڭ تەتىكتەرىن قايتا قاراستىراتىن بولامىز, دەدى قمگ باسقارما توراعاسى اليك ايدارباەۆ.
قمگ-دا بيزنەس-پروتسەستەر وڭتايلاندىرىلىپ, داعدارىسقا بايلانىستى وزەكتىلىگىن جوعالتقان كوپتەگەن جوبالار مەن ءىس-شارالاردى جۇزەگە اسىرۋ بويىنشا جوسپارلار قايتا قاراستىرىلۋدا. ناتيجەسىندە ورتالىق اپپاراتتاعى قىزمەتكەرلەردىڭ شتاتتىق سانىن 34%-عا – 729-دان 480 ادامعا دەيىن ازايتۋ تۋرالى شەشىم قابىلداندى.
قمگ باسشىلىعى جۇمىسشىلار مەن ولاردىڭ وتباسى مۇشەلەرىنىڭ الدىنداعى الەۋمەتتىك جاۋاپكەرشىلىگىن تەرەڭ ۇعىنا وتىرىپ, بوساتىلعان قىزمەتكەرلەرگە بارىنشا قولداۋ كورسەتۋگە نيەتتى. بوساتىلعان قىزمەتكەرلەردىڭ تاڭداۋى بويىنشا قولداۋدىڭ بىرنەشە ءتۇرى كورسەتىلمەك. اتاپ ايتقاندا, بىرجولعى جاردەماقى تولەۋ نەمەسە باسقا جۇمىسقا تۇرۋ ءۇشىن رەكرۋتينگتىك ۇيىمداردىڭ قىزمەتىن ۇسىنۋ نە قمگ ەسەبىنەن قايتا وقىتۋدان ءوتۋ. الەۋمەتتىك جاۋاپكەرشىلىككە نەگىزدەلگەن بوساتۋ شارالارى «سامۇرىق-قازىنا» قورىنىڭ تاپسىرماسىن ورىنداۋ اياسىندا دايىندالادى.