باتىس قازاقستان وبلىسىندا سوڭعى ەكى تاۋلىكتە «COVID-19» ينفەكتسياسىن جۇقتىرعان 20 ادام انىقتالىپ, بارلىق اۋىرعاندار سانى 146-عا جەتتى. بۇلاردىڭ 8-ءى – رەسەي فەدەراتسياسىنان كەلگەن تۇركىستان وبلىسىنىڭ جانە شىمكەنت قالاسىنىڭ تۇرعىندارى ەكەن.
جالپى العاندا وڭىردە تىركەلگەن 146 ناۋقاستىڭ 119-ى – سىرتتان, نەگىزىنەن رەسەي فەدەراتسياسىنان كەلگەن ەكەن. 26 ناۋقاس اۋرۋ اداممەن قارىم-قاتىناستا بولىپ, ىندەت جۇقتىرعان. باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسى مۇحامعالي ارىسپاەۆ تاعى ءبىر ناۋقاستىڭ دەرتتى قايدان جۇقتىرعانى انىقتالماي جاتقانىن ايتتى.
- قازىر اۋرۋحانادا جاتقان ناۋقاستاردىڭ 80 پايىزىندا اۋرۋ جەڭىل وتۋدە, قالعان 20 پايىزىنىڭ جاعدايى ورتاشا. قاتتى اسقىنعان ءتۇرى جوق. 6 ناۋقاستىڭ بويىنان پنەۆمونيا تابىلدى, بىراق ولاردىڭ تىنىس الۋىندا اسقىنۋ جوق. ءبىر بايقاعانىمىز, كوروناۆيرۋس دەرتى وتە الدامشى, باستاپقى كەزەڭى جوتەلسىز, قىزۋسىز وتەدى. كۇدىكتى ادامداردى دەر كەزىندە تەكسەرىپ, اۋرۋدى ەرتە انىقتاعاننىڭ ارقاسىندا اسقىنۋعا جىبەرمەي وتىرمىز, - دەدى باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆ.
بۇدان بۇرىن حابارلانعانداي, «COVID-19» ينفەكتسياسىن سول ىندەتپەن كۇرەسىپ جۇرگەن باتىسقازاقستاندىق مەديتسينا قىزمەتكەرلەرى دە جۇقتىرعان وقيعالار كەزدەستى. قازىر ولاردىڭ سانى 10-عا جەتكەن. ىندەتكە قارسى مايداننىڭ العى شەبىندە جۇرگەن اق جەلەڭدى ابزال جانداردىڭ جاعدايى قالاي؟
- كوروناۆيرۋس ىندەتىنە بايلانىستى قۇرىلعان كارانتيندىك ستاتسيوناردا جانە ناۋقاستار ەمدەلىپ جاتقان ينفەكتسيالىق اۋرۋحانادا جۇمىس ىستەپ جۇرگەن ارىپتەستەرىمىز ارنايى جاتاقحانادا, قوناقۇيدە تۇرىپ جاتقانىنا ءبىراز بولدى. ولار توتەنشە جاعداي رەجىمىنە سايكەس, ءوز ۇيلەرىنە بارمايدى. ءبىز ولاردىڭ دەنساۋلىعىن ەكى اپتادا ءبىر مارتە تولىق سكرينينگتىك زەرتتەۋدەن وتكىزىپ وتىرمىز. قازىر انىقتالعان وقيعالار – سول تەكسەرۋدىڭ ناتيجەسى. وسىلايشا اۋرۋدى اسقىندىرماي, ەرتە انىقتادىق. قازىر ولاردىڭ ءبارى وبلىستىق جۇقپالى اۋرۋلار اۋرۋحاناسىنا جاتقىزىلدى. ولارمەن قارىم-قاتىناستا بولعان 11 ادام كارانتيندىك ستاتسيونارعا وقشاۋلاندى, - دەيدى مۇحامعالي ارىسپاەۆ.
- وسى وقيعانىڭ ءوزى «COVID-19» ينفەكتسياسىنىڭ وتە قاۋىپتى ەكەندىگىن كورسەتىپ تۇر. دارىگەرلەر بارىنشا ساقتىق شارالارىن جاساعاننىڭ وزىندە ۆيرۋس جۇقتىرىپ وتىر. ەگەر ەلىمىزدە, وبلىسىمىزدا وسىنداي توتەنشە جاعداي, كارانتيندىك شارالار جاسالماسا, تارالعان دەرتتىڭ اۋقىمى باسقاشا بولار ەدى. ەرتە بايقاپ, جەدەل ەمدەگەننىڭ ناتيجەسىندە دەر كەزىندە اسقىندىرماي توقتاتىپ جاتىرمىز. بۇل وتە قاۋىپتى ىندەت! دارىگەرلەردىڭ جۇمىسىنىڭ قادىرىن بىلىڭىزدەر. ساقتىق شارالارىن ۇمىتپاڭىزدار, جەكە گيگيەنانى ساقتاڭىزدار. مەملەكەت قولعا العان شارالاردىڭ ءبارى حالىقتىڭ دەنساۋلىعى ءۇشىن جاسالىپ وتىر, - دەدى بولاتبەك امانگەلدى ۇلى.
ايتا كەتەيىك, بۇگىندە باتىس قازاقستان وبلىستىق جۇقپالى اۋرۋلار اۋرۋحاناسىندا - 137 ادام, پروۆيزورلىق ستاتسيوناردا - 31, كارانتيندىك ستاتسيوناردا - 85, ءۇي وقشاۋلاۋىندا - 1958 ادام دارىگەرلەر باقىلاۋىندا. 9 ادام كوروناۆيرۋستىق جۇقپادان جازىلىپ شىقتى.