بۇگىندە ءبىلىم بەرۋ سالاسىنا ءجىتى كوڭىل ءبولۋ ماڭىزدى ماسەلە. سونىمەن قاتار, سانالى ۇرپاق ساپالى ءبىلىم ارقىلى قالىپتاسادى دەسەك, قازىرگى كەزدە بۇل تالاپتى ورىنداۋدىڭ ارتىقشىلىعى زور. مەملەكەت قولداۋىنىڭ ناتيجەسىندە بارلىق سالاعا كوڭىل ءبولىنىپ, ءبىلىم سالاسىنا باسىمدىق بەرىلۋدە.
قازىرگى تاڭدا تاراز قالاسىندا قۇرىلىس قارقىن الۋدا. تۇرعىن ۇيلەر سالىنىپ, كوشەلەر جوندەلۋدە. سونىمەن قاتار, ءبىلىم نىساندارىنا دا ءتيىستى دەڭگەيدە كوڭىل ءبولىنىپ, ولارعا جوندەۋ جۇمىستارى جۇرگىزىلۋدە.
جامبىل وبلىسىنىڭ اكىمى بەردىبەك ساپارباەۆ بۇگىنگى جاعدايعا بايلانىستى قاشىقتىقتان وقىتۋعا كوشكەن ءبىلىم نىساندارىن قۇر قاڭىراتپاي, ولاردى قۇرىلىس الاڭىنا اينالدىرۋدى تاپسىرعان بولاتىن. وسىعان وراي, تاراز قالاسىنداعى №17 ع.مۇراتباەۆ اتىنداعى ورتا مەكتەپتە كۇردەلى جوندەۋ جۇمىستارى باستالىپ كەتتى. ەندى بۇل جۇمىس كوپ ۇزاماي قالاداعى №2, №4, №22, №16 ورتا مەكتەپتەرىندە دە جالعاسىن تابادى. ءتىپتى كەيبىر ءبىلىم وشاقتارىنىڭ ورنىنا جاڭا مەكتەپتەر سالۋ جوسپارلانۋدا. جۇمىستى جۇيەلى جۇرگىزۋ, ونى ساپالى ءارى دەر كەزىندە اياقتاۋدى قاداعالاۋ ماقساتىندا تاراز قالاسىنىڭ اكىمى ايتقازى قارابالاەۆ اتالعان ءبىلىم نىساندارىنداعى قۇرىلىس ورىندارىندا بولدى.
سونداي-اق شاھار باسشىسى مەكتەپ سىرتىندا ورنالاسقان اجەتحانالاردى وڭتايلاندىرۋ جۇمىستارىمەن دە تانىستى. بۇل تىزىمدە 7 مەكتەپ بار ەكەن. ونىڭ ەكەۋى جاڭادان سالىناتىن مەكتەپ ەسەبىنەن رەتتەلسە, بەسەۋىنە ءتيىستى قارجى قاراستىرىلىپ, قۇرىلىسى باستالىپ كەتكەن. وبلىس اكىمى بەردىبەك ساپارباەۆتىڭ تاپسىرماسىنا ساي, ولارعا كارىز جۇيەسى جالعانعان بولۋى جانە مەكتەپ ىشىندە ورنالاسۋى قاجەت. قالا اكىمى ايتقازى قارابالاەۆ جۇمىس ساپاسىن تەكسەرۋ ءۇشىن قۇرىلىس باسىنا ءجيى بارىپ تۇراتىن بولادى.
جامبىل وبلىسى