الماتى وبلىسىنداعى يرريگاتسيا جۇيەسىنىڭ جالپى ۇزىندىعى 17 مىڭ شاقىرىمعا جەتەدى ەكەن. ياعني, جەتىسۋ ولكەسى سۋارمالى القاپتار كولەمىن جاعىنان دا ەل بويىنشا الدىڭعى ورىندا تۇر.
قۋانارلىعى, بۇل كورسەتكىش جىل سايىن ءوسىپ كەلەدى. ويتكەنى, وڭىردە سۋ شارۋاشىلىعى سالاسىنداعى قالپىنا كەلتىرۋ ءىسى جۇيەلى جۇرگىزىلىپ وتىر. ماسەلەن, بيىلعى جىلى «جۇمىسپەن قامتۋدىڭ جول كارتاسى» شەڭبەرىندە الماتى وبلىسىنداعى سۋ شارۋاشىلىعىنىڭ 4 نىسانى قايتا جاڭعىرتىلادى ەكەن. ونىڭ ىشىندە اۋىز تولتىرىپ ايتارلىق جۇمىس كوكسۋ مەن قاراتال بوگەتتەرى, پانفيلوۆ اۋدانىنىڭ وسەك سۋ تورابى جانە تالدىقورعان قالاسىنىڭ سۋارۋ جەلىلەرىندە ءجۇرىپ جاتىر. بۇعان رەسپۋبليكالىق بيۋدجەتتەن 3,662 ملرد تەڭگە قارجى ءبولىندى. ناتيجەسىندە 2300 گەكتار سۋارمالى جەردى قالپىنا كەلتىرۋ جوسپارلانۋدا.
وبلىستىق اۋىل شارۋاشىلىعى باسقارماسىنىڭ مالىمەتىنشە, 2016 جىلدان بەرى سۋارۋ جەلىلەرىن قايتا قۇرۋ ارقىلى الاڭى 137,8 مىڭ گەكتار سۋارمالى القاپ قالپىنا كەلگەن. بۇل سۋارمالى جەرلەردى قالپىنا كەلتىرۋ باعدارلاماسى اياسىندا ىسكە اسىرىلا باستاعان جۇمىستىڭ ءبىر پاراسى. قازىر وسى ماقساتتا وبلىس بيۋدجەتىنەن 3,1 ملرد تەڭگە سوماعا سۋارۋ جەلىلەرىن قايتا جاڭارتۋدىڭ جوبالىق-سمەتالىق قۇجاتتارى تاعى ازىرلەۋنۋدە. ال 2019 جىلدان باستاپ يسلام دامۋ بانكىنىڭ قاراجاتى ەسەبىنەن اقسۋ, الاكول, ەسكەلدى, كوكسۋ اۋداندارىنىڭ سۋارۋ جەلىلەرىن قايتا جاڭعىرتۋ جوبالارى ىسكە اسىرىلۋدا. وسى ءتورت اۋداندا بارلىعى 35,4 مىڭ گا سۋارمالى جەر قالپىنا كەلتىرىلەدى.
وبلىستا كوممۋنالدىق مەنشىكتەگى سۋ شارۋاشىلىعى وبەكتىلەرىن كۇردەلى جوندەۋ دە نازاردان تىس قالمايدى. جىل سايىن سۋ شارۋاشىلىعى نىساندارىن كۇردەلى جوندەۋگە 2 ملرد تەڭگەگە دەيىن قاراجات بولىنۋدە. بيىل 11 سۋ شارۋاشىلىعى - رايىمبەك اۋدانىنداعى ۇكىرشى ماگيسترالدى كانالى, جامبىل اۋدانىنداعى دوستىق, قۇتىرعان, كنيجەۆسكي, تالاپ ساسىقباي سۋ قويمالارى, ىلە اۋدانىنداعى قىزىل تۋ-1, قىزىل تۋ-2 توعاندارى مەن ك-32 سۋ قويماسى, قاراساي اۋدانىنداعى وكتيابر-2 سۋ قويماسى, تالعار اۋدانىنداعى تومەنگى قۇتەنتاي سۋ قويماسى, كەربۇلاق اۋدانىنداعى ەنكول جانە ارال توبە سۋ قويمالارى كۇردەلى جوندەۋدەن وتكىزىلەدى.
سونىمەن قاتار وبلىستا جاڭا سۋارمالى جەرلەردى اينالىمعا تارتۋدى كوزدەيتىن «2028 جىلعا دەيىن سۋارمالى جەرلەردى دامىتۋ جوسپارى» دا بار. سوعان سايكەس وبلىستا جاڭادان 81,8 مىڭ گا سۋارمالى جەرلەردى ىسكە قوسۋ مەجەلەنگەن. ول ءۇشىن ءوڭىردىڭ 10 اۋدانىندا 5 جاڭا سۋ قويماسى, يرريگاتسيالىق جۇيەلەر, سورعى ستانتسيالارى مەن ۇڭعىمالاردىڭ قۇرىلىستارى جانە قايتا جاڭارتۋ جۇمىستارى جاسالماق.
الماتى وبلىسى