وتكەن جىلى تاراز قالاسىنداعى جىلۋ قۇبىرلارى اۋىستىرىلعان بولاتىن. اتالعان جۇمىستى ىسكە اسىرۋ كەزىندە شاھار ىشىندەگى بىرقاتار جولدار قازىلىپ, بىراق بۇل جەرگىلىكتى تۇرعىنداردىڭ نارازىلىعى مەن قالاىشىلىك اۆتوكولىك قوزعالىسىنىڭ قولايسىزدىعىن تۋدىرعان ەدى.
ءتىپتى كەيدە قار, جاڭبىر جاۋعاندا دا جولدىڭ قازىلعان جەرلەرى ويىلىپ, قوزعالىستى قيىنداتا تۇسەتىن. بۇگىندە سول ولقىلىقتىڭ ورنى تولىپ, تاراز قالاسى اكىمدىگىنىڭ باستاماسىمەن كوشەلەردى اسفالتتاۋ جۇمىستارى قولعا الىنۋدا. وتكەن جىلدان بەرى جوندەۋ جۇمىستارى جالعاسىپ كەلە جاتقان وبلىس ورتالىعىنداعى اباي داڭعىلى, قويگەلدى جانە بايزاق باتىر كوشەلەرى قالپىنا كەلتىرىلىپ, الداعى اپتادا جولاۋشىلار بۇل كوشەلەرمەن ەركىن جۇرە الادى. بۇگىنگى تاڭدا مۇندا قاجەتتى تەحنيكالار جەتكىزىلىپ, العاشقى جۇمىستار باستالىپ تا كەتتى. جامبىل وبلىسىنىڭ اكىمى بەردىبەك ساپارباەۆ قالادا قوزعالىس شەكتەلگەن كارانتين كەزىندە جول جوندەۋ جۇمىستارىن ۇيىمداستىرۋدى تاپسىرعان بولاتىن.
تاراز قالاسى اكىمدىگىنىڭ مالىمەتىنشە, جالپى اعىمداعى جىلى كونە شاھار ىشىندەگى 90 شاقىرىم جولدى جوندەۋ بويىنشا 100 جوبا جۇزەگە اسىرىلاتىن بولادى. ناتيجەسىندە قالادا 81 شاقىرىمدى قۇرايتىن 96 كوشەگە بىرقاتار جولاقتار سالىنادى. قالاداعى اباي داڭعىلى, باۋىرجان مومىش ۇلى, جەلتوقسان-قازىبەك بي, قويگەلدى-قوناەۆ كوشەلەرى بويىندا جاياۋ جۇرگىنشىلەر جولاعى سالىنادى. ءبىر ايتا كەتەرلىگى, اتالعان كوشەلەردىڭ 80 پايىزىندا بۇرىن-سوڭدى اسفالت بولماعان. ءتىپتى تولە بي داڭعىلى مەن تاشكەنت كوشەسى ارالىعىنداعى بايزاق باتىر كوشەسىنىڭ ءبىر شاقىرىمىندا جىلدار بويى جوندەۋ جۇمىستارى جۇرگىزىلمەگەن. بۇگىندە بۇل كوشەدە مەردىگەر «ايا-سەرۆيس» جاۋاپكەرشىلىگى شەكتەۋلى سەرىكتەستىگىنىڭ تەحنيكالارى كەلىپ, جول جابىندىسىن جوندەۋ جۇمىستارىن باستاپ كەتتى. تاراز قالاسىنىڭ اكىمى ايتقازى قارابالاەۆ مۇنداعى جوندەۋ جۇمىستارىنىڭ بارىسىن باقىلاپ, مەردىگەرگە جۇمىستى اياقتايتىن مەرزىمدى بەلگىلەپ بەردى.
جامبىل وبلىسى