ەل پرەزيدەنتى قاسىم-جومارت توقاەۆ وتانداستارىمىزعا ارناعان مالىمدەمەسىندە توتەنشە جاعداي كەزەڭىندە حالىققا كورسەتىلگەن قامقورلىق شارالارىن اتاپ ءوتىپ, مەملەكەت ءوز ازاماتتارىن نازاردان تىس قالدىرمايتىنىن جەتكىزدى. سونىمەن بىرگە توتەنشە جاعداي رەجىمىن 11 مامىرعا دەيىن سوزدى. دەسە دە ساقتىق شارالارىن قاتاڭ ساقتاۋدى جالعاستىرۋ قاجەت ەكەنىن جەتكىزدى.
ادامزات تاريحىندا مۇنداي اپاتتار از بولعان جوق. قيىندىقتا توپتاسقان, بىرىگە بىلگەن ەل جەڭىسكە جەتكەن. ادام بالاسىنا جاپپاي تونگەن اۋىرتپاشىلىق تەك قيىندىق اكەلىپ قويمايدى, سونىمەن بىرگە جاڭاشىلدىققا جول ىزدەتەدى. وسىناۋ سىني جاۋاپتى شاقتا ۇلت بولىپ ۇيىسىپ, ەل بولىپ قاۋىمداسۋدىڭ جانە توزىمدىلىك, شىدامدىلىق, قايىرىمدىلىق پەن تارتىپتىلىكتىڭ ۇلگىسىن كورسەتۋ – پارىز. سوندىقتان رۋحىمىز مىقتى ءارى بيىك بولۋى ءتيىس. دەمەك, اعا بۋىن زيالىلاردىڭ حالىقتى ىنتىماققا, جاقسىلىققا بەلسەنە شاقىراتىن, جاستاردىڭ ءوز بويىنداعى جاسامپازدىق كۇش-قايراتىن جۇزەگە اسىراتىن كەزى كەلدى. ادامزاتتىڭ پاراساتتى ىستەرى, ىزگى امالدارى, عىلىم مەن ءبىلىمنىڭ جەتىستىكتەرى, حالىقتىڭ مىزعىماس تۇتاستىعى مەن تاباندىلىعى بارلىق قيىندىقتاردى جەڭىپ شىعار جول تابۋعا بولاتىنىن دالەلدەيدى.
تاياۋدا ەلباسى نۇرسۇلتان نازارباەۆ «بىرلەسە بىلگەن ەل ءبارىن جەڭەدى» اتتى ماقالاسىندا دا كوپ دۇنيەنىڭ باسىن تۇيگەن-ءدى. مەملەكەت باسشىسىنىڭ مالىمدەمەسى اتالعان ماقالامەن مازمۇنداس, ۇندەس. جالپى, ەلباسى تاۋەلسىزدىك تاڭى اتقان كەزدەن باستاپ ءوز حالقىنىڭ تاعدىرى جولىنداعى تالاي تۇيىندەردىڭ كۇرمەۋىن تارقاتىپ, ءارى الەمدىك دەڭگەيدەگى بەتبۇرىستى وقيعالار تۋرالى وي ءبولىسىپ كەلەدى. تارلان تاريح بەتتەرىن پاراقتاساق, وسىناۋ ءداستۇردىڭ تامىرىن تەرەڭنەن تارتاتىنىن بايقايمىز.
بىزدە اۋرۋدىڭ الدىن الۋ ءىسى دەر كەزىندە باستالدى. اۋىرتپالىقتى ەڭسەرۋگە قاجەتتى رەسۋرستار جەتكىلىكتى بولدى, سىرتقى ەلدەرمەن دوستاستىق ساياساتى, الەۋمەتتىك-ەكونوميكالىق, ءبىلىم جانە عىلىم سالالارىندا جۇرگىزىلگەن تابىستى رەفورمالار بۇل قيىندىقتى دا جەڭىپ شىعۋعا مۇمكىندىك بەرەدى. بىرلىك جەڭىسكە جەتكىزەدى. بىراق بىرلىكتىڭ ماتەريالدىق, قارجىلىق, باسقا دا نەگىزدەرى بار. ءبىرىنشى – ءتارتىپ. ءتارتىپ – حالىقتىڭ وزىنە تونگەن قاۋىپتەن ساقتانۋ دەڭگەيىنىڭ جوعارىلاۋ قابىلەتى. بۇل تۇستا ەلباسى قازاق حالقىنىڭ داڭقتى پەرزەنتى باۋىرجان مومىش ۇلىنىڭ ءتارتىپ تۋرالى ءسوزىن ەسكە سالادى. ءبىزدى بىرىكتىرۋشى, ءبىر مۇددە مەن ماقساتقا جەتەلەۋشى كۇش – ەل ىشىندەگى اۋىزبىرشىلىك پەن تۇسىنىستىك, قامقور كوڭىل, جىلى نيەت.
وسى قاعيدانى پرەزيدەنتتىڭ كەشەگى مالىمدەمەسىنەن دە بايقادىق. ياعني بوساڭسۋعا بولمايدى. قازىرگى قابىلدانعان شارالار ەل ەكونوميكاسى مەن قاۋىپسىزدىگى ءۇشىن ەكەنىن ەستەن شىعارماعان ءلازىم.
ەلىمىزدىڭ باسىنا قارا بۇلت بولىپ تونگەن وسىنداي قيىن كەزەڭدە ءار ادام ءومىرى قىمبات بولسا, سونىڭ ىشىندە ءبىلىم مەن عىلىم سالاسىنداعى ادام كاپيتالىن ساقتاۋ اسا ماڭىزدى. وسى باعىتتا ءبىلىم جانە عىلىم مينيسترلىگى قابىلداعان شۇعىل دا ماڭىزدى شارالاردىڭ ءبىرى – ەلدەگى بارلىق ءبىلىم بەرۋ ۇيىمدارىن قاشىقتان وقىتۋ تەحنولوگياسىنا كوشىرۋى. بۇل قاتاردا قورقىت اتا اتىنداعى قىزىلوردا مەملەكەتتىك ۋنيۆەرسيتەتى دە قاشىقتىقتان وقىتۋ فورماتىنا كوشتى. وقۋ ۇدەرىسىن ساپالى ءارى ءتيىمدى ۇيىمداستىرۋ ءۇشىن ۋنيۆەرسيتەت پەداگوگتەرى بارلىق ەلەكتروندى پلاتفورمالاردى پايدالانۋدا. وقىتۋ فورماتى پلاتونۋس اقپاراتتىق جۇيەسىندە چات دارىستەر نەگىزىندە ۇيىمداستىرىلۋدا. سونىمەن قاتار ZOOM, Google Classroom.com, Moodle, Telegram, سكايپ ەلەكتروندى كوزدەرىندە ونلاين دارىستەر, چات-ساباقتار وتۋدە. يۋتۋب جەلىسىندە وقىتۋشىلاردىڭ بەينە دارىستەرى جازىلىپ دايىندالىپ, ۋنيۆەرسيتەتتىڭ رەسمي سايتىنا, اقپاراتتىق رەسۋرستارعا سالىنعان.
قاشىقتان ءبىلىم بەرۋ جاعدايىندا تۋىنداعان بارلىق سۇراققا جاۋاپ بەرۋ ماقساتىندا ۋنيۆەرسيتەت سايتىنا Call-ورتالىعى تۋرالى اقپارات ورنالاستىرىلىپ, وندا كەلىپ تۇسكەن سۇراقتارعا دەر كەزىندە جاۋاپ بەرىلۋدە. ساباقتان تىس ۋاقىتىن ءتيىمدى پايدالانۋ جانە وقۋعا قاجەتتى ماعلۇماتتارىن الۋ ماقساتىندا ەلەكتروندى كىتاپحانامەن جۇمىس ىستەۋ قامتاماسىز ەتىلدى.
پروفەسسور-وقىتۋشىلار ءۇشىن دە قاشىقتان جۇمىس ۇيىمداستىرىلعان. بۇگىنگى تاڭدا ولار تولىقتاي ءوز قىزمەتتەرىن ونلاين رەجىمدە اتقارىپ وتىر. قاشىقتان وقىتۋ تەحنولوگياسىن پايدالانۋ – بىلىكتىلىك پەن ءبىلىمنىڭ سىنالاتىن ۋاقىتىندا, ءوزىمىزدىڭ باسەكەگە قابىلەتتى ەكەنىمىزدى بايقاتۋعا جاسالعان بىردەن-ءبىر مۇمكىندىك. ەلىمىزدىڭ ەكونوميكاسىن دامىتىپ, وركەنيەتتىلىككە جەتكىزەتىن, سونداي-اق دامىعان ەلدەر قاتارىنا قوسىلۋىنا مۇمكىندىك جاسايتىن جاستاردى تاربيەلەۋ قازىرگى زامان ەنشىسىندەگى ۇلى قىزمەت ەكەنىن ءاردايىم ەسىمىزدە ۇستاعانىمىز ابزال. سول سەبەپتى, قالىپتى ومىرگە قايتا ورالۋ ءۇشىن وتپەلى كەزەڭدى بىرلىكپەن ەڭسەرىپ شىعۋ – ازاماتتىق پارىزىمىز.
ءبىزدىڭ بار كۇشىمىز بىرلىكتە. ۇلتتىق دىلىمىزگە ءتان ىزگىلىك پەن مەيىرىمدىلىك, يماندىلىق پەن سابىرلىلىق قاشاندا جاقسىلىقتىڭ باستاۋى بولماق. ءبىز بىرگەمىز!
بەيبىتكۇل كاريموۆا,
قورقىت اتا اتىنداعى قىزىلودا مەملەكەتتىك ۋنيۆەرسيتەتىنىڭ رەكتورى