كۇندەلىكتى ءومىرىمىزدىڭ ءبىر بولشەگىنە اينالعان الەۋمەتتىك جەلىنىڭ پايداسى مەن زيانى تۋرالى ءبىرتالاي سىن-پىكىر ايتىلىپ تا جاتىر. شىنتۋايتىنا كەلگەندە, ونسىز ءومىرىمىزدىڭ ءمان-ماڭىزى جوعالعانداي. بۇگىنگى تاڭدا تانىمال ءانشى جۇلدىزدار, پسيحولوگ-كوۋچتەر, بيزنەس-ترەنەرلەر ءوزىنىڭ سەمينار-ساباقتارىن Instagram جەلىسىندە جارنامالاپ, اينالىمعا تۇسىرۋدە. «ەبىن تاپقان ەكى اسار» دەگەن وسى بولسا كەرەك-ءتى. ۇيدەگى كۇيبەڭ تىرشىلىكتىڭ يىرىمىنە ءتۇسىپ كەتكەن انالارىمىز بەن قىز-كەلىنشەكتەردىڭ قولى بوساي قالسا سەمينار-ساباقتارعا قاتىسىپ, كەيدە ءبىر كۇنىنىڭ تورتتەن ءبىر بولىگىن وسىعان ارنايدى. ارينە بۇل تەك قالا توڭىرەگىندە عانا... دەگەنمەن دە پسيحولوگيا سالاسىن مەڭگەرمەسە دە پسيحولوگ مامانداردىڭ نانىن تاۋىپ جۇرگەن جاندار قانشاما. اتتارىن دارداي قىلىپ ايتپاساق تا كوپشىلىككە ءمالىم.
جالپى, ءبىراز سەميناردا اففيرماتسيا جايىندا اقپاراتتار لەگى وتە كوپ. ارينە بۇل ءسوزدىڭ نە ماعىنا بىلدىرەتىنىن بىلمەيتىن قاۋىم بارشىلىق. قازاقشا اۋدارماسى دا جوق. باسقا بالاماسىن تابا دا المايسىڭ. اففيرماتسيا – كۇندەلىكتى ومىردە ءبىر نارسەنى قايتالاۋ ارقىلى جاقسى ناتيجەگە جەتۋ. «مەن باقىتتىمىن!.. مەن ادەمىمىن!.. مەنىڭ قولىمنان بارلىعى كەلەدى!..» دەگەن سياقتى سوزدەردى تۇپساناڭىزعا جەتكىزۋىڭىز كەرەك. عىلىمدا ەگەر ادام بالاسى كەز كەلگەن نارسەنى 21 رەت قايتالاسا ميدا جاتتاندى تۇردە ىسكە اساتىنى ايتىلادى. وسىنداي جاعدايلاردىڭ ءبىرى ايجان اپكەمىزدىڭ باسىنان ءوتتى. ول دا ترەنينگتەردىڭ بىرىنە بارعان. ونىڭ ايتۋىنشا: ء«بىزدىڭ ءۇيىمىز ءزاۋلىم, ادەمى بولادى!.. باي بولامىز!.. مەنىڭ كۇيەۋىم مەنەن باسقا ەشكىمگە قارامايدى!.. ىشكەنىم الدىمدا, ىشپەگەنىم ارتىمدا بولادى!..» دەپ 1 اي كولەمىندە قايتالاي بەرگەن. بۇدان مەزى بولعان وتاعاسى زايىبىنا «قوي» دەپ قاتتى-قاتتى ايتقانىن دا بىلەمىن... اففيرماتسيانى دۇرىس جاققا باعىتتاماعان اپكەمىزدىڭ بۇل ىسىنەن كەيىن اعامىز باسقا ترەنينگتەرگە بارماۋىن قاداعالادى. ناتيجەسىندە ويدا قۇرالعان فورمۋلانىڭ بۇزىلۋىنان وتباسىندا كيكىلجىڭ تۋىندادى.
راسىندا, سەمينار-ترەنينگتەرگە ۋاقىتىڭىز بەن اقشاڭىزدى جۇمساماي-اق, بەلگىلى ءبىر يگى ىسكە ۇمتىلۋ قاجەت سەكىلدى. پسيحولوگ-كوۋچتەردىڭ ايتقان اڭگىمەسىن ءسىز ومىرىڭىزدە دە كەزدەستىرەسىز. ولاردىڭ ساباقتارىنان كەيىن: «مەن بۇل جاعدايدى كورىپ, ەستىپ ءجۇرمىن عوي», دەپ تاڭدانا تۇسەسىز. اقشاڭىزدىڭ بوسقا كەتكەنى تۇيسىگىڭىزگە سول ساتتە عانا جەتەدى. تۇك جىلۋى جوق سۇلۋ سوزدەردىڭ جەتەگىندە كەتكەنشە, ويىڭىزدى تەك ءبىلىم مەن تانىمىمىزدىڭ باستاۋ ارناسىنا باعىتتاعان ءجون بولار...
ايىم بولاتقىزى