سولتۇستىك قازاقستانداعى تايىنشا اۋدانىنىڭ تۇرعىنىنان 187 ليتر الكوگولدىك ءونىم الىنعان. ءۇي يەسى, 65 جاستاعى ايەل بۇعان دەيىن دە اراقتى قولدان ىستەپ ساتقان. كورشىلەرى دە بۇل تۋرالى پوليتسياعا حابار بەرگەن. بىراق سوڭعى ۋاقىتقا دەيىن ول الكوگول ساتۋدى توقتاتپاعان. سوعان قاراعاندا كەرەكتى ادامدارمەن ء«بولىسىپ» تۇرعان سياقتى.
سوڭعىدا ايەلدىڭ ۇيىنەن 37 ىدىسقا قۇيىلعان 187 ليتر سپيرت الىنعان. بۇل جولى ونى كوشەدەگى ماسكۇنەمنىڭ ارقاسىندا پوليتسيانىڭ زاڭسىز اراق ساتۋدى تەكسەرەتىن ەمەس, باسقا قىزمەتى ۇستاعان. اياعىن زورعا باسقان ماسكۇنەمدى ۇستاعاندار ونىڭ قالتاسىنان 1,5 ليترلىك ىدىسپەن الكوگول ءونىمىن تاپقان. قايدان الدىڭ دەگەن سۇراققا ماسكۇنەم اراق ساتۋشىنىڭ اتى ءجونى مەن مەكەنجايىن اتاپ بەرگەن. وسىدان كەيىن ونىڭ ۇيىنە جۇرگىزىلگەن تەكسەرىس بارىسىندا جوعارىدا اتالعان سپيرت كولەمى تابىلعان.
الىنعان ىشىمدىكتىڭ ءبارى ساراپتاماعا جىبەرىلدى. اتالعان فاكتى بويىنشا اقتك 463-بابى 2-بولىگى بويىنشا اكىمشىلىك ماتەريال تولتىرىلعان. بۇل باپ مۇندايعا 30 ايلىق ەسەپتىك كورسەتكىش كولەمىندە ايىپپۇل سالۋدى كوزدەيدى. بۇدان بۇرىن ايەلگە اقپان ايىندا دا ايىپپۇل سالىنعان بولاتىن. بىراق ودان ايىلىن جيىپ, اياعىن تارتپاعان. ويتكەنى, ايىپپۇلدىڭ اسەرى ءالسىز بولىپ تۇرعان سياقتى.
«جىل باسىنان بەرى زاڭسىز اينالىمنان 400 ليتردەن استام الكوگولدىك ءونىم الىندى. بارلىق شارالار قۇقىق بۇزۋشىلىقتار مەن قىلمىستاردىڭ سەبەبى بولىپ جاتاتىن ماسكۇنەمدىككە قارسى كۇرەسكە باعىتتالعان. وسى جىلى الكوگولدىك ماساڭدىقپەن 200-دەن استام قىلمىس جاسالعان. قوعامدىق ورىندا ماساڭ كۇيدە جۇرگەنى ءۇشىن 3647 ادام اكىمشىلىك جاۋاپكەرشىلىككە تارتىلدى. ماجبۇرلەپ ەمدەلۋگە 62 سولتۇستىكقازاقستاندىق جىبەرىلدى, تاعى 55 ادامعا قاتىستى ەمدەلۋگە جىبەرۋ تۋرالى شەشىم قابىلداندى», - دەدى جەرگىلىكتى پوليتسيا قىزمەتى باسقارماسىنىڭ باستىعى پوليتسيا پودپولكوۆنيگى ايدىن بايماتوۆ.
سولتۇستىك قازاقستان وبلىسى