اپاتتى كەسەل – COVID-19 قامتىعان الەمنىڭ بارشا ەلدەرى سياقتى قازاقستان رەسپۋبليكاسىنىڭ اۋماعىندا كارانتين رەجيمىنىڭ جاريالانعانىنا دا ءبىر جارىم اي ۋاقىت بولىپتى. وسى مەرزىم ەلىمىز ءۇشىن اسا ءبىر جاۋاپتى ءارى سىناق كەزەڭى بولعاندىعى اقيقات. كارانتين رەجيمىندە وتىرۋ ەل-جۇرتقا وڭاي تيمەدى, ال ونىڭ باسقا دا قوسىمشا زارداپتارى ۇشان-تەڭىز بولعانى ايتىپ اۋىز جەتكىزگىسىز.
وسىعان وراي بيىل, 27 ساۋىردە مەملەكەت باسشىسى قاسىم-جومارت توقاەۆ قازاقستان حالقىنا كوپتەن كۇتكەن مالىمدەمە جاسادى.
پرەزيدەنت ەلدىڭ باسىنا تۇسكەن اۋىرتپالىققا نازار اۋدارا وتىرىپ, «...قازىرگىدەي كۇردەلى كەزدە ءاربىر ازامات ءبىزدىڭ نازارىمىزدا بولادى. مەملەكەت ەشكىمدى قيىندىقتا قالدىرمايدى», – دەپ استىن سىزىپ ايتتى.
مالىمدەمەدە ەلدە بولىپ جاتقان جاعدايعا بايلانىستى قانداي ءىس-شارالار جاسالىنىپ جاتقاندىعى, وسى تۇرعىدا حالىققا, جۇمىسشىلار مەن شاعىن جانە ورتا بيزنەس وكىلدەرى جانە باسقا دا ءتۇرلى الەۋمەتتىك توپتارعا بەرىلگەن كومەك پەن بولىنگەن قارجى جونىندە قىسقاشا ەسەپ بەرىلىپ, تۇڭعىش پرەزيدەنت – ەلباسى قۇرعان «بىرگەمىز» قورى مەن «Nur Otan» پارتياسى تاراپىنان بولىپ جاتقان كومەك جايىندا ايتىلدى.
اسىرەسە, پرەزيدەنت ق-ج. توقاەۆتىڭ «ەلىمىزدە ازىق-ت ۇلىك تاپشىلىعى جوق», – دەگەن ءسوزى, جاقسىلىقتان ءۇمىت كۇتكەن كوپ ادامنىڭ جۇرەگىنە جىلى تيگەنى انىق.
وسى ءتىلسىز جاۋمەن, كورىنبەيتىن مايداندا ارپالىسىپ جۇرگەن دارىگەرلەر قاۋىمىنىڭ ولشەۋسىز ەڭبەگىن اتاي وتىرىپ, ولارعا ۇكىمەت تاراپىنان بەرىلىپ جاتقان ەرەكشە قولداۋ جونىندە ايتتى.
بۇل ۇندەۋدە ەلدەگى كوروناۆيرۋس جاعدايىندا قوزعالعان ماسەلەلەر مەن ونى شەشۋ جولدارىنىڭ بارشاسى تىلگە تيەك ەتىلدى دەسە دە بولادى.
مالىمدەمەدەگى پرەزيدەنتتىڭ «توتەنشە جاعداي رەجيمىن بيىلعى 11 مامىرعا دەيىن ۇزارتۋ تۋرالى جارلىق شىعارۋ جونىندە شەشىم قابىلداۋ جانە سونىڭ نەگىزىندە زاڭعا سايكەس 11 مامىردا توتەنشە جاعداي رەجيمى اياقتالادى», – دەۋى, حالقىمىزعا قۋاڭشىلىقتان كەيىن كەلىپ جاۋعان, كوپشىلىكتىڭ كوپتەن كۇتكەن يگىلىكتى جاڭبىرىنداي بولعانى انىق.
ءار نارسەنىڭ ءبىر قايىر بولادى, ەل ارقاسى وسى ىزگى حاباردان كەيىن ءبىر كەڭىپ قالعانداي اسەر قالدى.
«جۇمىلا كوتەرگەن جۇك جەڭىل» دەمەكشى, حالىق بولىپ وسى مالىمدەمەدەگى پرەزيدەنت ايتقان تالاپتار مەن قاراپايىم ەرەجەلەردى بۇلجىتپاي ورىنداپ, قاتەردەن امان شىعۋ ءبىزدىڭ – ياعني, بارشا ۇلتتىڭ ءوز قولىندا.
سول سەبەپتى, ءبىر جاعادان قول, ءبىر جەڭنەن باس شىعارا وتىرا, پرەزيدەنت ۇندەۋىن شامشىراق قىپ ۇستاپ قيىندىقتى بىرلەسە جەڭىپ شىعاتىنىمزعا سەنىمىمىز مول.
باۋىرجان ىدىرىسوۆ,
مەملەكەت تاريحى ينستيتۋتىنىڭ عىلىمي قىزمەتكەرى,
تاريح ماگيسترى