ماڭعىستاۋ وبلىستىق اۋرۋحاناسىنىڭ نەيروحيرۋرگتەرى كۇردەلى وتا جاسادى. دارىگەرلەر ءوز تاجىريبەسىندە باس ميىنىڭ الىپ انەۆريزماسى بار مۇنداي كولەمدەگى ناۋقاستى العاش كورۋى ەكەندىگىن جاسىرمادى, دەپ حابارلايدى ماڭعىستاۋ وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.
1964 جىلى تۋعان ناۋقاس ۇستىمىزدەگى جىلدىڭ اقپان ايىندا ءوزىن العاش رەت جايسىز سەزىنگەن, كوزىنىڭ كورۋ قابىلەتى ناشارلاپ, باسى بىرنەشە رەت اۋىرعان. ءسويتىپ وسى ايدىڭ باسىندا دارىگەرلىك كومەككە جۇگىنگەن. ماگنيتتى-رەزونانستى توپوگرافيا جاسالىپ, دياگنوز قويىلعان.
- ءبىزدىڭ تاجىريبەمىزدە مۇنداي الىپ انەۆريزمانىڭ 2,5 سم كولەمىندە العاش رەت كەزدەستىردىك. ۋاقىتىندا قارالماعان جاعدايدا ناۋقاستىڭ ينسۋلت الۋى مۇمكىن ەدى. انەۆريزما سەزىمتال كورۋ جۇيكەسىن قىسىپ تاستاعان, بۇل ءوز كەزەگىندە ميدىڭ باسقا دا بولىكتەرىنە زيانىن تيگىزە باستاعان. ناتيجەسىندە كوزدىڭ كورۋى ناشارلاي تۇسكەن. ەگەر وسىلاي جالعاسا بەرسە بۇل ميداعى قان تامىرلارى جارىلىپ, مۇگەدەكتىككە اكەلىپ سوعۋى مۇمكىن ەدى. باس سۇيەكتى اشۋ قاجەتتىلىگى جوق دەپ شەشكەن بولاتىنبىز, سەبەبى بۇل وتە قاۋىپتى. ويلانا كەلە ەندوۆاسكۋليارلى وتا جاساۋ قاجەت دەگەن توقتامعا كەلدىك. وتا جاساۋ 4,5 ساعاتقا جالعاستى. ناۋقاستىڭ قازىر جاعدايى جاقسى, ۇيىنە قايتارۋدى جوسپارلاپ وتىرمىز, دەيدى دۋمان مىرزابەكوۆ.
ەڭ باستىسى وتا جاساۋ كەزىندە دارىگەرلەر زاماناۋي جولدى تاڭداعان. ناتيجەسىندە ناۋقاستا وتادان كەيىن تىرتىق قالمادى جانە ەرتەسىنە وزدىگىنەن ەمىن-ەركىن ءجۇرىپ قوزعالۋىنا كەدەرگى جوق.
ايتا كەتۋ كەرەك, نەيروحيرۋرگ دۋمان مولدابەك ۇلى بۇعان دەيىن نۇر-سۇلتان قالاسىنداعى ۇلتتىق نەيروحيرۋرگيا ورتالىعىندا بىلىكتىلىگىن ارتتىرۋ ماقساتىندا جۇمىس جاساپ, تاجىريبەى مامانداردان ءتالىم العان. سونىڭ جەمىسى بولسا كەرەك, وبلىستىق اۋرۋحانادا جاسالعان وتا ءساتتى اياقتالدى. باسقارما وكىلدىگىنىڭ ايتۋىنشا, وسىنداي دياگنوزى بار ناۋقاستارعا بۇدان بىلاي ات تەرلەتىپ باسقا وڭىرلەرگە بارۋ قاجەتتىلىگى جوق, ەندى كۇردەلى وتالار ءوزىمىزدىڭ وڭىردە دە جاسالا بەرمەك.
ماڭعىستاۋ وبلىسى