نۇر-سۇلتان قالاسىنىڭ تۇرعىندارىنا قاۋىپسىزدىك شارالارىن قاتاڭ ساقتاي وتىرىپ, اۋلالاردا سەرۋەندەۋگە رۇقسات بەرىلدى.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس مەملەكەتتىك كوميسسيا تۇرعىندارعا اۋلا جانە بالالار الاڭدارىندا سەرۋەندەۋگە رۇقسات بەرۋ ماسەلەسىن تالقىلادى. ەلوردا تۇرعىندارىنا 27 ساۋىردەن باستاپ اۋلاعا شىعۋعا رۇقسات ەتىلدى. سوزىلمالى اۋرۋى بار جانە ەگدە ادامدار ەرەكشە ساق بولۋى كەرەك. ولارعا اسا قاجەتتىلىك تۋىنداماعان جاعدايدا دالاعا شىعۋدان باس تارتۋ ۇسىنىلادى, سەبەبى بۇل ساناتتاعى ازاماتتار Covid-19 ينفەكتسياسىن جۇقتىرۋعا اسا بەيىم.
تۇرعىندار ساقتىق شارالارىن قاتاڭ ساقتاپ, قورعانىس قۇرالدارىن پايدالانۋى قاجەت. بالالار الاڭدارىندا قاشىقتىقتىڭ ساقتالۋى شارت. قالا بويىنشا كۇن سايىن دەزينفەكتسيا جۇمىستارى جۇرگىزىلىپ جاتىر. اۋلا اۋماقتارى, الاڭدار جانە ت.ب. قامتىلدى. دەزينفەكتسيا جۇمىستارى كۇشەيتىلەدى.
27 ساۋىردەن باستاپ قاتاڭ سانيتارلىق نورمالاردى ساقتاي وتىرىپ, تۇرمىستىق ەلەكتر تەحنيكاسىن ساتاتىن دۇكەندەرگە (اۋدانى 2 مىڭ شارشى مەتردەن استام), بانك قىزمەتى مەن ميكروقارجى ۇيىمدارىنا, ساقتاندىرۋ قىزمەتىنە; ريەلتەرلىك كومپانيالارعا, اگەنتتىكتەرگە, جىلجىمايتىن م ۇلىكتى باعالاۋ جونىندەگى كونسالتينگتىك قىزمەتتەرگە, تۇقىم ساتاتىن دۇكەندەرگە, زووماگازيندەرگە جۇمىسىن قايتا باستاۋعا رۇقسات ەتىلەدى.
ينفەكتسيانى جۇقتىرۋ قاۋپى جويىلماعاندىقتان ويىن-ساۋىق جانە ساۋدا ورتالىقتارى, كينوتەاترلار, رەستوراندار, ساياباقتار مەن ادام كوپ جينالاتىن باسقا دا ورىندار ازىرگە جابىق بولادى. قوعامدىق كولىكتىڭ جۇمىسى كارانتين سوڭىنا دەيىن توقتاتىلدى.
بالاباقشالار, ۇيىرمەلەر مەن سەكتسيالار جۇمىس جاسامايدى. ال جوعارى وقۋ ورىندارى, كوللەدجدەر, مەكتەپتەر قاشىقتان وقىتۋدى جالعاستىرا بەرەدى.