وسىدان ءۇش جىل بۇرىن قالامىزدا قىزىق ءبىر وقيعا بولعان ەدى. الماتىلىق ءاليا بوسانۋعا دەيىنگى قۇجاتتاردى راسىمدەۋ ۇشىن ازاماتتارعا ارنالعان ۇكىمەتتىڭ مەدەۋ اۋدانىنداعى حالىققا قىزمەت كورسەتۋ ورتالىعىنا كەلەدى. بىراق تالون الماي جاتىپ, ونىڭ تولعاعى باستالىپ كەتەدى. ورتالىق ماماندارى دەرەۋ جەدەل جاردەم شاقىرىپ, كليەنت ءبولىم باسشىسىنىڭ كابينەتىندە تولعاتىپ جاتادى.
حقو قىزمەتكەرلەرى ءاليانىڭ جانىندا بولىپ, بارىنشا دەم بەرەدى. جەدەل جەردەم كەلگەن بەتتە ول پەريناتالدىق ورتالىققا جەتكىزىلىپ, ەكى قىزدى دۇنيەگە اكەلەدى. وسىلايشا اتا-اناسىمەن بىرگە, تۇڭعىش ۇلدارى ءالي ءبىر كۇندە قوس قارىنداستى, حقو قىزمەتكەرلەرى «ەكى قىزدى» بولىپ قۋانعان ەدى.
ءاليا بوسانىپ, پەرزەنتحانادان شىعاتىن كۇنى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى فيليالىنىڭ قىزمەتكەرلەرى ەگىزدىڭ دۇنيەگە كەلۋىمەن قۇتتىقتاپ, ولاردىڭ ۇلكەن وتباسىلارىنا دەنساۋلىق پەن اماندىق تىلەگەن. سول كەزدە فيليال قىزمەتكەرلەرى «بۇل ەگىزدەر ءبىزدىڭ دە قىزدارىمىز بولسىن» دەپ كەلىسكەن.
وسىلايشا قاسيەتتى رامازان ايىندا ىستامبۇلدان سالەم جولداپ وتىرعان – «حقو-نىڭ قىزدارى» اتانعان ەسما مەن ەليف ەكەن.
ەگىزدەردىڭ اناسى ءاليا التۋنياي كارانتين كەزىندە الاڭداپ, ءارى حقو قىزمەتكەرلەرىنە قولداۋ بىلدىرەيىن دەپ شەشىپتى. «سىزدەرگە اللا ريزا بولسىن! العىسىمىز شەكسىز! ءبىز سىزدەردى جاقسى كورەمىز! ءبىز سىزدەرمەن بىرگەمىز!» دەلىنگەن حابارلامادا. جانە وسى سوزدەرمەن قولدان سالىنعان بالالار سۋرەتىن جولداپتى.
«مەن ەگىزدەرگە «سەندەر حقو-نىڭ» قىزدارىسىڭدار. حقو ماماندارىنىڭ دەر كەزىندە جەدەل جاردەم شاقىرىپ, مەنى پەرزەنتحاناعا ۋاقىتىندا جەتكىزبەگەندە, سەندەر تۋىلار ما ەدىڭدەر, تۋىلماس پا ەدىڭدەر دەپ قويامىن. تۇسىنسە دە, تۇسىنبەسە دە ك ۇلىپ قويادى...», – دەيدى ءاليا التۋنياي.
ەگىزدەرگە اتا-اناسى ەسما مەن ەليف دەپ ات بەرگەن. ياعني, تۇرىك تىلىنەن اۋدارعاندا – «جومارت» جانە «سابىرلى» دەپ اۋدارىلادى.
سودان بەرى حقو-نىڭ قىزمەتكەرلەرى «قىزدارىنىڭ» جاعدايىن سۇراپ, ەگىزدەردىڭ اناسى اليامەن حابارلاسىپ تۇرادى... ءاليا دا ريزاشىلىق سەزىممەن ۇنەمى بايلانىسىن ۇزبەگەن.
«ەسما پەن ەليف ءوسىپ كەلەدى. قازىر ەكى جارىم جاستا, كوپ نارسەنى تۇسىنەدى. وتە بەلسەندى, ءتىپتى تىم بەلسەندى دەسەم بولادى. ءبىر ورنىندا وتىرمايدى, ءبارىن بىلۋگە, كورۋگە قۇشتار. قازىر سوڭعى تىستەرى شىعىپ كەلەدى, سوعان ازداپ مازاسىزداناتىندارى بولماسا, وتە كوڭىلدى بالالار», – دەيدى اناسى.
الماتى