شىمكەنتتە كەنەگە قارسى زالالسىزداندىرۋ جۇمىستارى ءجۇرىپ جاتىر

مەگاپوليستەگى 15 تۇرعىن الاپقا قاراستى   6 250 000 مىڭ شارشى مەتر جەر دارىلەنەدى. زالالسىزداندىرۋ جۇمىستارى 7 ساۋىردەن باستالعان. قازىرگە دەيىن ماماندار  ەڭبەكشى اۋدانىنا قاراستى 467 641 شارشى مەتر اۋماقتى تولىقتاي توزاڭداتىپ شىققان. 

«ەڭبەكشى اۋدانى بويىنشا «جىلانبۇزعان», «بادام-1», «بادام-2», «تۇردابات», جانە «جۇلدىز» تۇرعىن الاپتارىن دارىلەۋ جۇمىستارى اياقتالدى", دەيدى ەڭبەكشى  اۋداندىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باس مامانى اقتوتى اسانباەۆا.

ماماندار دالالى ايماقتىڭ ءشوبىن «دەلتاپەس» دەپ اتالاتىن حيميالىق دارىنىمەن زالالسىزداندىرۋدا. شاڭداۋ جۇمىستارىنان كەيىن زوولوگ ماماندار تاعى دا تەكسەرۋ جۇرگىزەدى, دەيدى دەزينفەكتسيا ورتالىعىنىڭ بيولوگ مامانى گاۋھار كەمەلبەكوۆا.

كونگو-قىرىم قىزباسىن تاراتۋشى كەنەگە قارسى دارىلەۋ  جۇمىستارى ءساۋىر ايىنىڭ سوڭىندا تولىق اياقتالماق. حيميالىق سۇيىقتىقتىڭ جانۋارلارعا ەش زيانى جوق. دەگەنمەن تازارتىلعان اۋماقتارعا  بىر اپتاعا دەيىن مال جايۋعا تيىم سالىنعان. 

شىمكەنت