بۇگىن ماڭعىستاۋ وبلىسىندا بۇعان دەيىن تىركەلگەن ناۋقاستارمەن بايلانىستا بولعان, پروۆيزورلىق تەكسەرىستە جاتقان 6 ازاماتتان COVID-19 ينفەكتسياسى انىقتالدى.
ءبىر ناۋقاس كەشە قايتىس بولعان اسكەري قىزمەتكەردىڭ 1990 جىلى تۋعان ارىپتەسى. ول تۇراتىن 22 شاعىن اۋدانداعى ءۇي پودەزى كارانتينگە جابىلدى.
تاعى ەكەۋى قايتىس بولعان اسكەري قىزمەتكەردىڭ 2006, 2007 جىلى تۋعان ەكى بالاسى.
سونداي-اق بۇگىن انىقتالعان التى ادامنىڭ ىشىندە بۇعان دەيىن تىركەلگەن پوليتسيا قىزمەتكەرلەرىمەن بايلانىستا بولعان 1996, 1997 جىلى تۋعان ءتارتىپ ساقشىلارى بار. قازىرگى تاڭدا ولار تۇراتىن اقتاۋداعى 17 جانە 26 شاعىن اۋدانداعى ءۇي پودەزدەرى كارانتينگە جابىلدى. التىنشى ادام - وسىعان دەيىن تىركەلگەن پوليتسيا قىزمەتكەرىنىڭ ايەلى. بۇل مەكەن جاي دا كارانتينگە جابىلىپ, دەزينفەكتسيالاندى. ناۋقاستارمەن بايلانىستا بولعان بارلىق تۇلعا كارانتينگە الىندى. ەپيدەمياعا قارسى ءىس-شارالار جالعاسۋدا.
25 ساۋىردەگى جاعداي بويىنشا ماڭعىستاۋ وبلىسىندا اقتاۋدا – 15, جاڭاوزەندە – 4, ماڭعىستاۋ اۋدانىندا – 4, مۇنايلى اۋدانىندا – 3 – بارلىعى 26 ادامنان COVID-19 ۆيرۋسى تىركەلدى. 4 ادام ساۋىعىپ شىقسا, 1 ادام قايتىس بولدى.
تىركەلگەندەر اراسىندا 1 مەديتسينا قىزمەتكەرى, 5 پوليتسيا قىزمەتكەرى بولسا, 2 بالا, 2 زەينەتكەر جانە 2 اسكەري قىزمەتكەر, سونداي-اق 14 جۇمىسسىز ادام بار.
ماڭعىستاۋ وبلىسى