سولتۇستىك قازاقستان وبلىسىنىڭ «انتيكور» ورتالىعىندا سىبايلاس جەمقورلىققا قارسى اگەنتتىك وكىلدەرى پەتروپاۆلداعى ۇلتتىق ۇلاننىڭ اسكەري ينستيتۋتىندا كوپ جىلدار بويى قارجىلىق سالادا قىزمەت ىستەگەن ايەلدىڭ 27,8 ملن تەڭگە اقشانى جىمقىرىپ, ۇستالعانى تۋرالى مالىمدەدى.
بۇل قىلمىسىن ايەل 2014 جىلدان باستاپ, وسى ۋاقىتقا دەيىن جالعاستىرعان. وفيتسەرلەر جانە كەلىسىمشارتپەن جۇمىس ىستەۋگە ءتيىستى قىزمەتكەرلەردىڭ بوس قىزمەت ورىندارىنا (ۆاكانتتى) ول اقشا قورىتىپ, ونى ءوزىنىڭ كۇيەۋى مەن دوستارىنىڭ ەسەپشوتتارىنا اۋدارىپ وتىرعان. وسىنشا ۇزاق ۋاقىت بويى ۇستالماعانىنا قاراعاندا ينستيتۋتتا قارجىلىق ءتارتىپتىڭ تىم تومەن ەكەندىگى كورىنىپ تۇر. وسى ۋاقىت ارالاعىندا بيۋدجەت قاراجاتىنىڭ دۇرىس جۇمسالۋىن باقىلاۋعا ءتيىستى بىرنەشە تەكسەرىستەر دە جۇرگىزىلگەن. بىراق ولاردىڭ بىردە-ءبىرى مەملەكەت قاراجاتىنىڭ ۇرلانۋىن كورە الماعان. ناتيجەسىندە ايەل, جوعارىدا ايتىلعان, 27,8 ملن تەڭگەنى قولدى قىلعان.
سىبايلاس جەمقورلىققا قارسى كۇرەس اگەنتتىگىنىڭ قىزمەتكەرى بۇل ىسكە ايەلدىڭ باسشىلارى دا جاۋاپكەرشىلىك تارتىپ, ءبارىنىڭ دە جازاسىن سوت ايقىندايتىنىن ايتتى. ايەلدىڭ وزىنە جەتى جىلعا دەيىن باس بوستاندىعىنان ايىرىلۋ جازاسى بەرىلۋى مۇمكىن ەكەن. الايدا, بۇرىنعى تەكسەرىستەردى جاساعان جاندارعا قانداي جاۋاپكەرشىلىك جۇكتەلۋى مۇمكىن ەكەنىن ول اتامادى.
سونداي-اق وسى قىزمەت پەتروپاۆل قالاسى اكىمدىگىنىڭ جاۋاپتى قىزمەتكەرىنىڭ دە تۇتقىندالعانىن جاريالادى. ول ىندەتتى جويۋ مەن جايىلۋىنا قارسى قۇرىلعان وبلىستىق جەدەل شتابتىڭ مۇشەسى ەكەن. سوندىقتان جەكەمەنشىك ماشينا يەلەرىنە كارانتين كەزىندە ەركىن قوزعالۋعا مۇمكىندىك بەرەتىن رۇقسات قاعاز بەرۋگە مۇمكىندىگى بولعان. سوڭعى رۇقسات قاعازدى 50 مىڭ تەڭگەگە بەرىپ تۇرعان جەرىنەن ۇستالىپ, قازىر ۇستىنەن قىلمىستى ءىس قوزعالدى.
پەتروپاۆل