ەلباسىنىڭ توراعالىعىمەن قاۋىپسىزدىك كەڭەسىنىڭ وتىرىسى ءوتتى

بەينەكونفەرەنتسيا رەجيمىندە وتكەن وتىرىستا كوروناۆيرۋس ەپيدەمياسىمەن كۇرەستىڭ, ەكونوميكانى قالپىنا كەلتىرۋ مەن مەملەكەتتىڭ داعدارىستان كەيىنگى دامۋىنىڭ ستراتەگيالىق ماسەلەلەرى قارالدى.

ەلباسى جاھاندىق سىن-قاتەر اينالاسىنداعى جاعداي وتە كۇردەلى ەكەنىن جەتكىزدى.

«كوروناۆيرۋس سالدارى الەمدىك ەكونوميكانىڭ ومىرلىك ماڭىزدى جۇيەلەرىنە ىقپال ەتەدى. حالىقارالىق ۆاليۋتا قورىنىڭ ساراپشىلارى بۇل جاعدايدى ۇلى داعدارىسپەن سالىستىرىپ, « ۇلى كارانتين» دەپ اتادى. ولاردىڭ مالىمەتىنشە, 170 ەلدە جان باسىنا شاققانداعى تابىس قىسقارادى. بارىنەن بۇرىن ءالسىز ەكونوميكالار زارداپ شەگەدى. بۇل توقساندا ساراپشىلار پاندەميا مەن ەكونوميكالىق داعدارىستىڭ ءبىر ۋاقىتتا شارىقتايتىنىن بولجادى. بۇل - ەكىنشى دۇنيەجۇزىلىك سوعىستان كەيىنگى ونەركاسىپتىك ءوندىرىستىڭ ەڭ تومەنگى قۇلدىراۋى بولادى» دەدى تۇڭعىش پرەزيدەنت.

سونىمەن بىرگە نۇرسۇلتان نازارباەۆ جاقىندا الەم ەلدەرىنىڭ قيىن سىناقتارعا تاپ بولاتىنىن, قازاقستان دا بۇل ماسەلەلەردەن شەت قالمايتىنىن اتاپ ءوتتى.

«20 ءساۋىر كۇنى تاريحتا العاش رەت مۇناي باعاسى كەرى كەتتى. الەمدىك نارىقتا تەڭگەرىم جوعالدى. پاندەميا مەن وندىرىستىك قۇلدىراۋدان كەيىن جاھاندىق قارجىلىق داعدارىس بولادى دەپ بولجانعان. كەلەسى كەزەڭ - الەمدىك ازىق-ت ۇلىك داعدارىسى بولۋى مۇمكىن. بۇل بىرقاتار شيەلەنىس پەن قارابالاس تۋعىزادى» دەدى ەلباسى.

قاۋىپسىزدىك كەڭەسىنىڭ توراعاسى قيىن كەزەڭدى ەڭسەرۋ ءۇشىن قازاقستاننىڭ قازىر جاساپ جاتقان شارالارىنىڭ شەشۋشى ماڭىزعا يە بولاتىنىن باسا ايتتى. «مەملەكەت باسشىسى مەن پرەمەر-مينيستر داعدارىسقا قارسى بارلىق قاجەتتى شارالاردى قابىلدادى. ەلىمىزدە توتەنشە جاعداي ەنگىزىلىپ, كارانتين رەجيمى كۇشىنە ەندى. ەلىمىزدىڭ بارلىق ازاماتتارىن توتەنشە جاعداي تالاپتارىن ساقتاۋعا شاقىرامىن. ءبىزدىڭ تاريحىمىزدا بىرنەشە داعدارىس بولدى. بىراق, قازىرگىنىڭ ءجونى بولەك. ءاربىر قازاقستاندىق مەملەكەتتىك قولداۋدى سەزىنۋى ءۇشىن ءبارىن جاسايمىز. سونىمەن بىرگە, قازىر بولاشاققا قاراۋىمىز كەرەك. الەم ەندى بۇرىنعىداي بولمايدى» دەدى نۇرسۇلتان نازارباەۆ.