جامبىل وبلىسىنىڭ اكىمى بەردىبەك ساپارباەۆ توتەنشە جاعداي جونىندەگى جەدەل شتابتىڭ كەزەكتى وتىرىسىن وتكىزىپ, جيىندا ايماقتاعى ەپيدەميولوگيالىق جاعداي, كارانتيندىك رەجيمدى ساقتاۋ جانە كارانتيننەن كەيىنگى كەزەڭدە بىرقاتار ونەركاسىپتىك كاسىپورىندار مەن شاعىن بيزنەس نىساندارىنىڭ جۇمىسىن قايتا باستاۋعا بايلانىستى ماسەلەلەر تالقىلاندى.
وبلىس بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆتىڭ حابارلاۋىنشا, ەڭ كوپ ناۋقاس قورداي اۋدانى مەن تاراز قالاسىندا انىقتالعان. ينفەكتسيالىق ستاتسيوناردا 44 ناۋقاس ەمدەلۋدە. ەمدەلگەن 31 ادام ستاتسيوناردان شىعارىلعان. ولاردىڭ بارلىعى قازىر ءۇي كارانتينىندە مەديتسينالىق باقىلاۋعا الىنعان.
وبلىس اۋماعىندا ءاربىر كوروناۆيرۋس جاعدايىنا مىندەتتى ەپيدەميولوگيالىق تەكسەرۋ جۇرگىزىلەدى. دەرەك بويىنشا, ينفەكتسيا وشاقتارىندا ناۋقاستارمەن بايلانىستا بولعان 1029 تۇلعا انىقتالعان. ونىڭ ىشىندە 700 ادام جاقىن جانە 329 ادام ىقتيمال بايلانىستا بولعاندار. بارلىق جاقىن بايلانىستا بولعان ادامدار كارانتيندىك ستاتسيوناردا وقشاۋلانعان, ال ىقتيمال بايلانىسقاندار ءۇي كارانتينىندە تۇراقتى مەديتسينالىق باقىلاۋمەن قامتاماسىز ەتىلگەن. ال, وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى حاميت مىرزاقاسىموۆتىڭ ايتۋىنشا, كوروناۆيرۋستىق ينفەكتسيامەن كۇرەسۋ ءۇشىن 770 مەديتسينا قىزمەتكەرى دايارلانعان بولسا, ونىڭ 386-سى قازىرگى ۋاقىتتا كارانتيندەگى ناۋقاستارمەن جۇمىس ىستەپ جاتىر ەكەن. ەڭبەكاقىدان باسقا, ولارعا قوسىمشا تولەمدەر تولەنۋدە. اتاپ ايتساق, ناۋرىز ايىندا 270 دارىگەرگە, ونىڭ ىشىندە 40 دارىگەر مەن 129 ورتا مەديتسينالىق قىزمەتكەرگە 40,1 ميلليون تەڭگە ۇستەماقى تولەنگەن. ناۋرىز ايىنىڭ قورىتىندىسى بويىنشا 8 مەديتسينالىق ۇيىم قارجى ۇنەمدەۋ ەسەبىنەن 1319 قىزمەتكەرگە جالپى سوماسى 88,9 ميلليون تەڭگە سىياقى بەرگەن. مەديتسينالىق قىزمەتكەرلەردىڭ تۇرعىن ءۇي-تۇرمىستىق ماسەلەلەرى دە وڭ شەشىمىن تابۋدا.
وسى تۇرعىدا 232 مەديتسينالىق قىزمەتكەر قوناقۇيگە ورنالاستىرىلىپ, ولاردى جۇمىس ورنىنا تاسىمالداۋ ءۇشىن كولىك ۇيىمداستىرىلعان. جيىن سوڭىندا بەردىبەك ساپارباەۆ بارلىق جەردە الدىن الۋ شارالارىن كۇشەيتۋ كەرەكتىگىن تاپسىردى. سونىمەن قاتار, مەديتسينالىق قىزمەتكەرلەردى جەكە قورعانۋ قۇرالدارىمەن قامتاماسىز ەتۋ, COVID-2019 بويىنشا مەديتسينا, پوليتسيا جانە كوروناۆيرۋسقا قارسى ءىس-شارالارعا قاتىساتىن اسكەري قىزمەتكەرلەردى تەستىلەۋدەن وتكىزۋ, ولاردى جەكە قورعانۋ قۇرالدارىمەن قامتاماسىز ەتۋ قاجەتتىگى دە ايتىلدى. تاراز قالاسى مەن اۋىلدىق ەلدى مەكەندەردە كوشەلەردى, الاڭداردى جانە سكۆەرلەردى دەزينفەكتسيالاۋدى جالعاستىرۋ وتە ماڭىزدى ەكەنى ەسكەرتىلدى. سول سياقتى بەردىبەك ساپارباەۆ تاراز قالاسى مەن وبلىس اۋداندارىندا ورناتىلعان بلوك-بەكەتتەردىڭ ءالى دە ءتيىمسىز جۇمىس ىستەپ وتىرعاندىعىن العا تارتتى. سونداي-اق, اكىم جيىندا كارانتين جاعدايىندا ادامدار ازىق-ت ۇلىك پەن تاعامداردى ۇيگە جەتكىزۋ قىزمەتىنە كوبىرەك جۇگىنە باستاعاندىعىن ايتتى. سوڭعى ۋاقىتتا تاراز قالاسىندا جەتكىزىپ بەرۋ قارقىنى 8 مىڭنان 11,5 مىڭعا دەيىن وسكەن.
جامبىل وبلىسى