بۇل تۋرالى ءبىلىم جانە عىلىم مينيسترلىگى حابارلادى. ۇلتتىق بىرىڭعاي تەستىلەۋدىڭ سۇراقتارى مەكتەپ باعدارلاماسىنىڭ شەڭبەرىندە مەڭگەرىلەتىن نەگىزگى تاقىرىپتاردى قامتيتىنى بەلگىلى. بىراق ۇلتتىق تەستىلەۋ ورتالىعى 2020 جىلعى ۇبت-دا پايدالانىلاتىن سۇراقتار IV توقسان باعدارلاماسىنىڭ بولمايتىنىن مالىمدەدى.
مۇنداي شەشىمگە كەلۋدىڭ سەبەبىن ورتالىق ءبىتىرۋشى سىنىپتى سوڭعى توقساندا نەگىزىنەن بۇرىنعى وتكەندەردى قايتالايتىنىن جانە جاڭا تاقىرىپتاردىڭ تىم از ەكەنىمىن بايلانىستىرادى.
ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ماماندار تەست تاپسىرمالارىنىڭ مازمۇنىن ەگجەي-تەگجەيلى تالداعانىن ايتادى.
ء«بىز قاشىقتان وقۋعا كوشۋ ۇبت-عا دايىندالۋعا اسەر ەتپەيدى دەپ ەسەپتەيمىز, ونىڭ ۇستىنە, مەكتەپ وقۋشىلارى ۇتو-نىڭ سايتىندا ورنالاستىرىلعان سىناما تەستىلەرىن تەگىن پايدالانۋ مۇمكىندىگىنە يە. ءاربىر ءپان بويىنشا 70 نۇسقا ازىرلەندى. ءبىز وقۋشىلاردىڭ سىناما تەستىلەرىن بەلسەندى پايدالاناتىنىن كورىپ وتىرمىز. كارانتين كەزىندە وقۋشىلاردىڭ ۇبت-عا جاقسى دايىندالۋى ءۇشىن بارلىق جاعداي جاسالۋدا. ونىڭ ۇستىنە ۇبت سۇراقتارى ءتورتىنشى توقساننىڭ تاقىرىپتارىن ەمەس, جالپى مەكتەپ باعدارلاماسىن قامتيدى. ايتپاقشى, سوڭعى جىلدارى فاكتولوگيالىق ماتەريالدى جاتتاۋ مەن ەستە ساقتاۋعا ەمەس, فۋنكتسيونالدىق ساۋاتتىلىققا بايلانىستى سۇراقتاردىڭ ۇلەسى ارتىپ كەلەدى», دەدى د.سماعۇلوۆ.
ورتالىق باسشىسى وسىعان قوسا ۇبت-نى وتكىزۋ بۇرىنعى فورماتتا قالاتىنىن, الايدا قوسىمشا سانيتارلىق شەكتەۋ شارالارى ەنگىزىلەتىنىن اتاپ ءوتتى. ال كارانتين ۇزارتىلعان جاعدايدا ۇبت-نى وتكىزۋدىڭ بالاما نۇسقاسى دايىندالىپ جاتىر.