قىزىلوردا وبلىستىق اۋماقتىق قورعانىس بريگاداسىنىڭ ارناۋلى جيىنىنا 25-35 جاس ارالاعىنداعى اسكەري مىندەتتى 96 ازامات شاقىرتىلدى. ولار وبلىس ورتالىعى مەن قازالى, شيەلى اۋداندارىنىڭ ەلدى مەكەندەرىندەگى قوعامدىق ءتارتىپتىڭ ساقتالۋىن قاداعالايدى. بۇل تۋرالى ايماق باسشىسىنىڭ قاۋىپسىزدىك جانە قورعانىس ماسەلەلەرى جونىندەگى كومەكشىسى عالىمجان تاسجانوۆ مالىمدەدى.
ەستەرىڭىزگە سالا كەتەيىك, 2 ءساۋىر كۇنى مەملەكەت باسشىسى قاسىم-جومارت توقاەۆ اسكەري مىندەتتىلەردى ارناۋلى جيىندارعا شاقىرۋ جونىندە جارلىققا قول قويعان بولاتىن. وسىعان بايلانىستى وبلىس اكىمىنىڭ شەشىمىمەن اۋماقتىق قورعانىس بريگاداسىنا اسكەري مىندەتتى 40 ازامات شاقىرتىلىپ, قىزىلوردا قالاسىنداعى ىندەت وشاقتارىن زالالسىزداندىرۋ جۇمىستارىنا جۇمىلدىرىلدى.
اسكەري قىزمەتكەرلەر وبلىستىق جۇمىلدىرۋ دايىندىعى باسقارماسى تاراپىنان ءۇش مەزگىل ىستىق تاماق, ارنايى كيىم جانە باسقا دا كەرەك-جاراقتارمەن قامتاماسىز ەتىلەدى.