الماتى قالاسى توتەنشە جاعدايلار دەپارتامەنتىنىڭ مالىمەتى بويىنشا, بۇگىن كەشكى 17:15-تە كەزەكشى بولىمىنە مەدەۋ اۋدانىنداعى كەرەي مەن جانىبەك حاندارى كوشەلەرىنە جاقىن ماڭداعى تاۋدا ءورت شىققانى تۋرالى حابارلاما تۇسكەن.
ءورت سالدارىنان بولاي تاۋىنداعى (موحناتكا) 1 گەكتار اۋماقتى وت شارپىعان. ءورت سوندىرۋگە 24 مامان شۇعىل جۇمىلدىرىلىپ, جەلدىڭ سوققانىنا قاراماستان, ءتىلسىز جاۋ ءبىر ساعاتتىڭ ىشىندە اۋىزدىقتالدى. ءورت ءسوندىرۋ قىزمەتىنە ىلە الاتاۋى پاركىنىڭ 15 قىزمەتكەرى, 5 تەحنيكا تارتىلعان.
قالانىڭ تجد باستىعى س.اۋباكىروۆتىڭ ايتۋىنشا, ءورت بولعان اۋماققا تۇنگى كۇزەت قويىلادى. سونداي-اق, تجد كوكتەمگى مەزگىلدە جەر ءۇي تۇرعىندارىن ورتتەن اباي بولۋعا شاقىرادى. قۋراعان ءشوپ, جاپىراقتاردى ورتەگەن كەزدە قاۋىپسىزدىك شارالارى قاتاڭ ساقتالۋى قاجەت. ونىڭ سالدارى تۇرعىن-جايلاردى, تىپتەن گاز قۇبىرلارىنىڭ, جانارماي بەكەتتەرىنىڭ ورتەنۋىنە سوقتىرۋى ابدەن مۇمكىن. كىنالىلەر اكىمشىلىك, جاعدايدىڭ سالدارىنا بايلانىستى قىلمىستىق جاۋاپكەرشىلىككە دە تارتىلادى.
الماتى