بىرىككەن ۇلتتار ۇيىمىنىڭ دامۋ باعدارلاماسى (بۇۇدب) حالىقتىڭ وسال توپتارى ءۇشىن COVID-19 پاندەمياسىنىڭ الەۋمەتتىك-ەكونوميكالىق سالدارىن جەڭىلدەتۋگە بايلانىستى قازاقستان ۇكىمەتىنە قولداۋ كورسەتۋ شارالارىن قابىلداۋدا.
وسى ماقساتتا بۇۇدب COVID ۆيرۋسىمەن كۇرەسكە باعىتتالعان جەدەل قوردان قازاقستانعا ارناپ 100 مىڭ اقش دوللارى مولشەرىندە باستاپقى گرانت ءبولدى.
COVID-19 ۆيرۋسىنىڭ قارقىندى تارالۋى دامۋشى ەلدەر ءۇشىن دەنساۋلىق ساقتاۋ جۇيەسىنىڭ داعدارىسىن, سونداي-اق ۇزاق مەرزىمگە ۇلاساتىن ەلەۋلى الەۋمەتتىك-ەكونوميكالىق تاۋەكەلدەرگە سوقتىرادى. دامۋشى ەلدەردەگى كىرىس شىعىندارى 220 ميلليارد دوللاردان اسىپ, 2020 جىلى الەمدىك ەكونوميكا 3 پايىزعا كۇرت تومەندەيدى دەپ كۇتىلۋدە.
كليماتتىڭ وزگەرۋى, جاڭا كوروناۆيرۋس پاندەمياسى ەكونوميكانىڭ بارلىق سەكتورلارىندا, سونىمەن قاتار قوعامدىق دەنساۋلىق ساقتاۋ, الەۋمەتتىك قورعاۋ جانە مەملەكەتتىك باسقارۋدان باستاپ ەلدەردىڭ ءتيىمدى داعدارىستىق كوممۋنيكاتسيالارى مەن ەكونوميكالىق ساياساتىنا دەيىنگى بارلىق دامۋ سالالارىنداعى تۇراقتىلىققا سىن-قاتەر تۋعىزۋدا.
بۇۇ-نىڭ COVID ۆيرۋسىمەن كۇرەس جونىندەگى بىرلەسكەن كۇش-جىگەرى شەڭبەرىندەگى شارالار تۋرالى ايتىپ وتكەن قازاقستانداعى بۇۇدب تۇراقتى وكىلى ياكۋپ بەريش سونداي-اق بۇۇدب باستامالارى داعدارىستان زارداپ شەككەن تاۋەكەل توبىنداعى جاستار ءۇشىن جۇمىس ورىندارىن قۇرۋعا باعىتتالعان. وسى ماقساتتا بۇۇدب جاستاردى ارنايى وقىتۋ باعدارلاماسىن پسيحولوگيالىق-الەۋمەتتىك قولداۋدى, تالىمگەرلىكتى جانە باعدارلاۋدى قامتيتىن جۇمىسپەن قامتۋ جونىندەگى كەشەندى قۇرالدارعا بەيىمدەيدى.
كليماتتىڭ وزگەرۋ سالدارى پاندەميا جاعدايىندا دا وزەكتىلىگىن جوعالتپايتىنىن ەسكەرە وتىرىپ, بۇۇدب قورشاعان ورتانى قورعاۋ سالاسىنداعى يننوۆاتسيالار مەن تەحنولوگيالاردى پايدالانا وتىرىپ, «جاسىل» جوبالاردى ىلگەرىلەتۋ شارالارىنا قولداۋ بىلدىرۋدە. دامۋ جونىندەگى سەرىكتەستەرمەن بىرلەسە وتىرىپ, بۇۇدب قازاقسان ۇكىمەتىنە COVID-19 ناۋقاستارىن قابىلدايتىن ەلدىڭ ەمدەۋ مەكەمەلەرىندە زارارلى مەديتسينالىق ەلەمەنتتەردى كادەگە جاراتۋدىڭ قازىرگى زامانعى تەحنولوگيالارىن ەنگىزۋ ارقىلى مەديتسينالىق قالدىقتاردى جيناۋ مەن ولاردىڭ اينالىمىن قاۋىپسىز باسقارۋدى قامتاماسىز ەتۋدە قولداۋ كورسەتۋدى جوسپارلاۋدا.