وتكەن جىلى ەلىمىزدە وزەندەردەگى كەمە قاتىناسىمەن جاسالعان تاسىمالدىڭ جالپى كولەمى 1,5 ملن. توننانى قۇراسا, بيىل بۇل كورسەتكىشتى 1,6 ملن. تونناعا جەتكىزۋ جوسپارلانىپ وتىر. ونىڭ 650 مىڭ تونناسى رەسەي باعىتىندا تاسىمال جاساۋى ءتيىس. بۇل تۋرالى يدم ءباسپاسوز قىزمەتى حابارلادى.
جالپى ناۆيگاتسيالىق ماۋسىمنىڭ اشىلۋى سۋ جولدارىنىڭ ۋچاسكەلەرىنە بايلانىستى 1 ءساۋىر مەن 12 مامىر ارالىعىندا جۇرگىزىلەدى. وسى ماۋسىمدى ۋاقىتىندا اشۋ ءۇشىن 2020 جىلعى 1-توقساندا دايىندىق جۇمىستارى جاسالدى. اتاپ ايتقاندا, 3814 ناۆيگاتسيالىق بەلگى, 3 كەمە وتكىزەتىن شليۋز جانە 147 تەحنيكالىق فلوت كەمەسى ازىرلەنىپ, جوندەلدى.
قازاقستاندا ناۆيگاتسيالىق ماۋسىم مەرزىمى ورتاشا العاندا 196 تاۋلىكتى قۇرايدى.
ەلىمىزدە وزەندەردەگى كەمە قاتىناسى ەرتىس, ورال-كاسپي جانە ىلە-بالقاش باسسەيندەرىندە جۇزەگە اسىرىلادى. بۇگىنگى تاڭدا بۇل سالادا 14 مىڭعا تارتا ادام ەڭبەك ەتەدى.
«نۇرلى جول» مەملەكەتتىك باعدارلاماسى اياسىندا كەمە وتكىزەتىن شليۋزدەردى كۇردەلى جوندەۋ جۇمىستارى جۇرگىزىلۋدە. بۇل شارا اپاتتار سانى 10,3% ازايتۋعا جانە وتكىزۋ قابىلەتىن جىلىنا 350 كەمەگە دەيىن جەتكىزۋگە مۇمكىندىك بەرەدى.
بيىل تەمىر-بەتون قۇرىلىمدارىن (الاڭى 18 مىڭ م2) جانە كوتەرگىش جابدىقتاردى (6 بىرلىك) جوندەۋ جوسپارلانعان. شليۋزدەردەگى جۇمىستار كۇنتىزبەلىك جوسپار-كەستەگە ساي ورىندالۋدا.
بۇدان باسقا, 2025 جىلعا دەيىنگى كەزەڭدە باعدارلاما شەڭبەرىندە تەحنيكالىق فلوتتىڭ 42 كەمەسىن جاڭارتۋ كوزدەلىپ وتىر, بۇل تەحنيكالىق فلوتتىڭ جالپى توزۋىن 78%-دان 55%-عا دەيىن ازايتۋعا مۇمكىندىك بەرەدى.